Mak 5 - Krio Fɔs Oli Baybul

Jizɔs Mɛn Wan Man we Gɛt Dɛbul Insay Am

¹ Jizɔs ɛn in lanin bɔy dɛn krɔs di wata go na di Garazinis pipul dɛn kɔntri.

² Wɛn Jizɔs kɔmɔt na di bot, wan man kɔmɔt insay di bɛriŋrɔn kam mit am. Di man bin gɛt dɛbul insay am.

³ Na bɛriŋrɔn di man bin tap ɛn nɔbɔdi nɔ bin ebul tay am wit chen sɛf.

⁴ Wɛn dɛn tay in an ɛn fut wit chen, i kin kɔt dɛn. Nɔbɔdi nɔ bin ebul fɔ kɔntrol am.

⁵ De ɛn nɛt di man kin de na bɛriŋrɔn ɔ pantap dɛn il. I kin de ala ɛn i kin de tek ston kɔt kɔt insɛf.

⁶ Wɛn di man si Jizɔs fawe, i rɔn go mit am ɛn nil dɔŋ bifo am fɔ sho se i rɛspɛkt am.

⁷ I ala big wan se, “Jizɔs, yu we na Gɔd we pas ɔl, in Pikin, wetin yu want du mi? A tek Gɔd beg yu, nɔ mek a sɔfa!”

⁸ Di man tɔk dat bikɔs Jizɔs tɛl di dɛbul fɔ kɔmɔt insay di man.

⁹ So Jizɔs aks di man se, “Wetin na yu nem?” Di man se, “A nem ‘Plɛnti plɛnti Soja man,’ wi plɛnti!”

¹⁰ Di man beg Jizɔs plɛnti tɛm fɔ mek i nɔ drɛb di dɛbul dɛn kɔmɔt na di kɔntri.

¹¹ Bɔt da sem tɛm de sɔm ɔg dɛn bin de it na wan il klos di say we Jizɔs bin de.

¹² Di dɛbul dɛn beg Jizɔs fɔ lɛ dɛn go insay di ɔg dɛn.

¹³ Jizɔs gri fɔ lɛ di dɛbul dɛn kɔmɔt insay di man ɛn go insay di ɔg dɛn. Na bɔt tu tawzin ɔg dɛn bin lib de. Wɛn di dɛbul dɛn go insay di ɔg dɛn, di ɔg dɛn rɔn go dɔŋ di il, dɛn ɔl fɔdɔm insay di wata ɛn dɛn ɔl drawn.

¹⁴ Di pipul dɛn we bin de mɛn di ɔg dɛn rɔn go tɛl di pipul dɛn we de na di tɔŋ ɛn di kɔntri, wetin bi. Plɛnti pipul kam luk.

¹⁵ Dɛn mit di man we bin gɛt plɛnti dɛbul insay am sidɔm klos Jizɔs de lisin to am. Di man bin soba ɛn i bin wɛr klos. Wɛn di pipul dɛn si dat, dɛn fred.

¹⁶ Dɛn pipul we si wetin bi to di man we di dɛbul dɛn bin de insay ɛn wetin bi to di ɔg dɛn, tɛl di wan dɛn we kam luk ɔl wetin bi.

¹⁷ Dat mek di pipul dɛn beg Jizɔs fɔ kɔmɔt na dɛn kɔntri.

¹⁸ Wɛn Jizɔs bin de go insay di bot, di man we di dɛbul dɛn bin de insay beg fɔ fala Jizɔs go.

¹⁹ Bɔt Jizɔs nɔ gri, i se, “Go na yu os to yu pipul dɛn, ɛn tɛl dɛn wetin di Masta dɔn du fɔ yu ɛn aw i dɔn sɔri fɔ yu.”

²⁰ Di man go na di eria we dɛn kɔl di Tɛn Tɔŋ dɛn ɛn tɛl pipul wetin Jizɔs du fɔ am. Na so pipul bin de wɔnda.

Wan Gyal Pikin we Day ɛn da Uman we Tɔch Jizɔs In Klos

²¹ Wɛn Jizɔs dɔn tek bot krɔs go oba say, bɔku pipul go gɛda rawnd am na di bich.

²² Wɛn i lib de wan pan di bigman dɛn na di Ju mitin os we bin nem Jayrɔs go to Jizɔs; wɛn i mit am, i nil dɔŋ bifo am.

²³ I beg am se, “Masta, mi gyal pikin de day, duya, kam put yu an pan in ed ɛn pre fɔ am mek i nɔ day.”

²⁴ So Jizɔs fala Jayrɔs go; plɛnti pipul fala Jizɔs wɛn i de go, na so di pipul dɛn bin de push dɛn kɔmpin.

²⁵ Wan uman bin de na di krawd we bin dɔn de blid fɔ twɛlv ia.

²⁶ Di uman bin dɔn sɔfa na plɛnti dɔkta dɛn an we dɛn de tray fɔ mɛn am, ɛn i bin dɔn wes ɔl in kɔpɔ, bɔt i nɔ si bɛtɛ. Bifo dat di sik bin de wɔs mɔ ɛn mɔ.

²⁷ Dis uman bin dɔn yɛri bɔt Jizɔs ɛn wetin i de du, so i push midul di krawd sote i rich nia Jizɔs ɛn tɔch in klos.

²⁸ Di uman bin dɔn tɔk nain at se, if in tɔch Jizɔs in klos, in go wɛl.

²⁹ So i tɔch Jizɔs in klos ɛn i wɛl wantɛm. Di uman insɛf fil se in dɔn wɛl.

³⁰ Jizɔs no wantɛm se pawa kɔmɔt pan am, i tɔn rawnd to di krawd ɛn aks dɛn se, “Udat tɔch mi klos?”

³¹ In lanin bɔy dɛn se, “Yu si di krawd de push ɔlɔbɔt so, yu de aks udat tɔch yu klos?”

³² Jizɔs luk rawnd fɔ si udat na di pɔsin we tɔch in klos.

³³ We di uman no wetin dɔn bi to am, i fred, i trimbul. I kam nil dɔŋ bifo Jizɔs ɛn tɛl am ɔl wetin bi to am.

³⁴ Jizɔs se, “Mi pikin, bikɔs yu biliv, yu dɔn wɛl, go wit kol at ya, da kayn sik de nɔ go kam pan yu igen.”

³⁵ Wɛn Jizɔs bin de tɔk to di uman, nain sɔm pipul kam tɛl Jayrɔs se mek i nɔ wɔri di Masta igen, bikɔs in pikin dɔn day.

³⁶ Jizɔs yɛri wetin dɛn tɔk, bɔt i nɔ mɛn dɛn. Nain i se, “Jayrɔs, nɔ fred, yu jɛs biliv.”

³⁷ Jizɔs nɔ gri mek ɔlman fala am go, pas Pita, Jems ɛn Jɔn we na Jems in brɔda.

³⁸ Wɛn dɛn rich na Jayrɔs in os, Jizɔs yɛri plɛnti pipul de mek nɔys, dɛn bin de kray bita bita wan.

³⁹ Wɛn Jizɔs dɔn go insay di os, i se, “Wetin mek una de kray bita bita wan so ɛn mek nɔys? Di pikin nɔ day, na slip i de slip.”

⁴⁰ Di pipul dɛn laf Jizɔs. Bɔt Jizɔs mek ɔlman kɔmɔt insay di os, pas di pikin in mama ɛn papa, ɛn di tri lanin bɔy dɛn nɔmɔ. Dɛn go insay di rum we di pikin bin de.

⁴¹ Jizɔs ol di pikin in an ɛn se, “Talita kumi” dat min, “Mi pikin, grap!” Nain laŋwej.

⁴² Di pikin grap ɛn bigin waka wantɛm. (Di pikin bin dɔn ol twɛlv ia). Dɛn wɔnda!

⁴³ Jizɔs wɔn dɛn nɔ fɔ tɛl ɛnibɔdi wetin bi so. I tɛl dɛn fɔ gi di pikin sɔntin fɔ it.