Mak 4 - Krio Fɔs Oli Baybul

Parebul bɔt Wan Fama we Plant Sid

¹ Jizɔs bigin lan di pipul dɛn bak wɛn dɛn sidɔm na di bich klos Lek Galili. Di krawd we gɛda rawnd am bin tu big, so i go sidɔm insay wan bot na di wata, klos di bich.

² Na parebul i pul fɔ lan dɛn plɛnti tin; wan pan di parebul dɛn nain dis: I se,

³ “Wan fama bin de plant sid.

⁴ Wɛn i de skata di sid dɛn, sɔm fɔdɔm na di rod, ɛn bɔd kam it dɛn.

⁵ Sɔm fɔdɔm pan ston ston, we bɛtɛ dɔti nɔ de. Di lili dɔti we bin lib de mek di sid dɛn bɔs kwik,

⁶ bɔt wɛn san ɔt, di yɔŋ plant dɛn wida ɛn day, bikɔs dɛn rut nɔ bin go dɔŋ na grɔn.

⁷ Sɔm sid fɔdɔm na chuk chuk bush, di chuk chuk dɛn gro ɛn kɔba di plant dɛn so dɛn nɔ ebul bia.

⁸ Sɔm sid fɔdɔm na gud grɔn, dɛn gro fayn ɛn bia plɛnti. Sɔm bia tati, sɔm siksti ɛn sɔm ɔndrɛd.”

⁹ Jizɔs se, “Udat gɛt yes fɔ yɛri, mek i yɛri!”

Di Parebul dɛn Minin

¹⁰ Wɛn di krawd dɔn go, sɔm pan di pipul dɛn we bin lɛf ɛn di twɛlv lanin bɔy dɛn aks Jizɔs wetin di parebul dɛn we i pul, min.

¹¹ Jizɔs ansa dɛn se, “Na una gɛt di chans fɔ no di sikrit bɔt Gɔd in rul, bɔt dɛn pipul we nɔ de wit wi, na parebul nɔmɔ dɛn de yɛri,

¹² so dat ‘Dɛn go luk gud, bɔt dɛn nɔ go si; dɛn go yɛri, bɔt dɛn nɔ go ɔndastand. If nɔto dat, dɛn bin fɔ tɔn to Gɔd, dɛn layf bin fɔ chenj ɛn Gɔd bin go padin dɛn.’”

Jizɔs Ɛksplen di Parebul bɔt di Fama we Plant Sid

¹³ Jizɔs aks dɛn se, “If una nɔ ɔndastand dis parebul, aw una go ɔndastand dɛn ɔda parebul dɛn?

¹⁴ Di fama we de plant di sid na di pɔsin we de go tɛl ɔda pipul di Gud Nyuz.

¹⁵ Di sid dɛn we fɔdɔm na di rod na pipul we yɛri di Gud Nyuz; as dɛn yɛri am so, Setan kam pul am kɔmɔt na dɛn at.

¹⁶ Dɛn sid we fɔdɔm na grɔn we gɛt ston ston, na dɛn pipul we yɛri di Gud Nyuz ɛn biliv am wantɛm ɛn gladi.

¹⁷ Bɔt di wɔd nɔ sidɔm gud na dɛn at; dɛn tan lɛkɛ plant we nɔ gɛt rut. Wɛn trɔbul mit dɛn, ɔ pipul ambɔg dɛn bikɔs dɛn biliv di Gud Nyuz, dɛn kin kɔmɔt na di rayt rod.

¹⁸ Dɛn sid we fɔdɔm na chuk chuk bush na dɛn pipul we yɛri di Gud Nyuz,

¹⁹ bɔt di tin dɛn na dis wɔl we dɛn want du, di jɛntri we dɛn want, ɛn di ɔda tin dɛn we dɛn want mek di Gud Nyuz nɔ gɛt ples fɔ prɛd na dɛn at lɛkɛ wɛn plant de bia.

²⁰ Bɔt dɛn sid we fɔdɔm na gud grɔn na dɛn pipul we yɛri di Gud Nyuz ɛn biliv am gud; dɛn tan lɛkɛ plant we bia: sɔm bia tati, sɔm siksti, ɛn sɔm ɔndrɛd.”

Lamp ɔnda Kitul

²¹ Jizɔs aks dɛn se, “If pɔsin gɛt lamp, i go kɔba am wit kitul, ɔ put am ɔnda tebul? I nɔ go put am pantap tebul?

²² Natin nɔ de we ayd we nɔ go kɔmɔt na do. Natin nɔ de we na sikrit we pɔsin nɔ go no.

²³ Udat gɛt yes fɔ yɛri, mek i yɛri!”

²⁴ Jizɔs se, “Una lisin mi gud; di lɔ we una de tek jɔj una kɔmpin mɔtalman, na di sem lɔ Gɔd go tek jɔj una. Gɔd go jɔj una traŋa pas aw una de jɔj una kɔmpin mɔtalman.

²⁵ Pɔsin we gɛt sɔntin, Gɔd go gi am mɔ, bɔt pɔsin we nɔ gɛt natin, di lili bit sɛf we i gɛt, Gɔd go tek am.”

Di Parebul bɔt Sid we De Gro

²⁶ Jizɔs tɛl dɛn igen se, “Gɔd in rul jɛs tan lɛkɛ we wan pɔsin skata sid na fam fɔ plant am.

²⁷ De ɛn nɛt, if i wek ɔ if i de slip, di sid dɛn de gro, bɔt insɛf nɔ no aw dɛn de gro.

²⁸ Na di grɔn de mek sid dɛn gro. Wɛn sid dɛn de gro, na di pat we bɔs fɔs yu kin si fɔs, dɛn yu go si di ɔda pat, dɛn yu go si di tin dɛn we i bia, las.

²⁹ Wɛn di plant dɔn big du, di fama go tek wan kayn nɛf we dɛn kɔl sikul fɔ kɔt am, bikɔs i dɔn rich tɛm fɔ kɔt ɔl wetin i bin plant.”

Di Parebul bɔt di Mɔstad Sid

³⁰ Jizɔs aks dɛn se, “Aw Gɔd in rul tan? Us parebul wi go pul bɔt Gɔd in rul?

³¹ Gɔd in rul tan lɛkɛ mɔstad sid we dɛn plant we smɔl pas ɔl dɛn ɔda sid dɛn.

³² Bɔt wɛn i gro, i kin gro big pas ɔl di ɔda smɔl tik dɛn, ɛn i kin gɛt plɛnti an we bɔd kin bil os pan.”

³³ Na plɛnti dɛn kayn parebul ya Jizɔs bin de tek lan di pipul dɛn di Gud Nyuz, mek dɛn go ɔndastand wetin i de tɔk.

³⁴ Na parebul dɛn nɔmɔ i bin de pul fɔ di pipul dɛn, bɔt wɛn in ɛn in lanin bɔy dɛn lɛf, i kin tɛl dɛn wetin di parebul dɛn min.

Jizɔs Tɛl di Briz ɛn di Swɛlin fɔ Stɛdi

³⁵ Da sem ivintɛm de, Jizɔs tɛl in lanin bɔy dɛn se, “Una lɛ wi krɔs di wata go oba say.”

³⁶ Di lanin bɔy dɛn lɛf di pipul dɛn ɛn go insay di bot we Jizɔs sidɔm, dɔn dɛn tek di bot go. Ɔda bot dɛn fala dɛn go.

³⁷ Wɛn dɛn de go, big briz bigin blo, swɛlin bigin shek di bot ɛn wata kam ful insay di bot.

³⁸ Jizɔs bin de na di bak pat na di bot de slip; i bin le in ed pan pila. Dɛn go wek am, dɛn se, “Yu nɔ bisin if wi day?”

³⁹ Jizɔs grap. I tɛl di briz fɔ tap ɛn di wata fɔ stɛdi. Di briz tap fɔ blo ɛn di swɛlin go dɔŋ.

⁴⁰ Jizɔs tɔn to in lanin bɔy dɛn, i se, “Wetin mek una de fred, una nɔ biliv pan Gɔd?”

⁴¹ Dɛn ɔl wɔnda ɛn bigin aks dɛn kɔmpin se, “Uskayn man dis we de tɛl di briz ɛn di wata wetin dɛn fɔ du ɛn de du wetin i tɛl dɛn?”