Mak 15 - Krio Fɔs Oli Baybul

Dɛn Kɛr Jizɔs Go bifo Paylet

¹ Wɛn do klin, di bigman dɛn we de mek sakrifays fɔ pipul sin, di ɔda Ju bigman dɛn, di Ju Lɔ ticha dɛn, ɛn ɔl di ɔda mɛmba dɛn na di Ju gran kot go ɛŋ ed. Dɛn mek dɛn tay Jizɔs ɛn kɛr am go bifo Paylet.

² Paylet aks Jizɔs se, “Na yu na di Ju pipul dɛn kiŋ?” Jizɔs ansa se, “Na so yu se!”

³ Di bigman dɛn we bin de mek sakrifays fɔ pipul sin tɔk se Jizɔs du plɛnti bad tin,

⁴ so Paylet aks Jizɔs igen se, “Yu nɔ gɛt natin fɔ se? Yɛri ɔl wetin dɛn tɔk se yu du!”

⁵ Bɔt Jizɔs nɔ gri fɔ tɔk ɛnitin, so Paylet wɔnda.

Dɛn Kɔndɛm Jizɔs

⁶ Wɛn di Pasova ɔlide kam, Paylet kin pul wan pɔsin we di Ju pipul dɛn want, kɔmɔt na jel.

⁷ Dis tɛm ya, wan man we nem Bara bas bin de na jel wit sɔm ɔda pipul we dɛn ɔl bin mek plɛnti pipul fɛt na di kɔntri ɛn kil pɔsin.

⁸ Plɛnti pipul go mit Paylet ɛn tɛl am mek i du lɛkɛ aw i kin du da Ju ɔlide de.

⁹ Paylet aks dɛn se, “Una want fɔ mek a fri di Ju pipul dɛn kiŋ?”

¹⁰ I bin no se di bigman dɛn we de mek sakrifays fɔ pipul sin an Jizɔs oba gi am bikɔs dɛn jɛlɔs Jizɔs.

¹¹ Dɛn tɛl di pipul dɛn fɔ tɛl Paylet se, na Bara bas i fɔ pul kɔmɔt na jel.

¹² Paylet aks dɛn se, “Wɛl, wetin a fɔ du di man we una de kɔl di Ju pipul dɛn kiŋ?”

¹³ Dɛn ala big wan se, “Nel am pan di krɔs!”

¹⁴ Paylet se, “Wetin du? Wetin i du we bad?” Na da tɛm de dɛn ala big big wan pas aw dɛn bin ala fɔs, se, “Nel am pan di krɔs!”

¹⁵ So fɔ mek di pipul dɛn gladi, Paylet fri Barabas. I mek di soja man dɛn bit Jizɔs, dɔn i lɛf am gi dɛn fɔ mek dɛn nel am pan di krɔs.

Di Sojaman dɛn Masaka Jizɔs

¹⁶ Di soja man dɛn kɛr Jizɔs go insay Paylet in os, dɔn dɛn gɛda di ɔda soja man dɛn.

¹⁷ Dɛn drɛs Jizɔs wit dak rɛd klos, dɛn mek krawn wit chuk chuk ɛn wɛr am nain ed.

¹⁸ Dɔn dɛn bigin masaka am ɛn se, “Mek di Ju pipul dɛn Kiŋ gɛt lɔŋ layf!”

¹⁹ Dɛn bit am wit tik nain ed, dɛn pit pan am, dɔn dɛn nil dɔŋ bifo am lɛkɛ se dɛn de wɔship am.

²⁰ Wɛn dɛn dɔn masaka am dɔn, dɛn pul di dak rɛd klos kɔmɔt pan am, ɛn wɛr in yon klos pan am bak; dɔn dɛn kɛr am go fɔ go nel am pan di krɔs.

Dɛn Nel Jizɔs pan di Krɔs

²¹ We dɛn de go, dɛn mit wan man we nem Saymɔn we bin kɔmɔt na wan vilej de go na di tɔŋ. Saymɔn na bin Alɛgzanda ɛn Rufɔs dɛn papa. I bin bɔn na Sayrini. Di soja man dɛn fos am fɔ tot di krɔs fɔ Jizɔs.

²² Dɛn kɛr Jizɔs go na wan ples we dɛn kɔl Gɔlgɔta, dat min “Ples we tan lɛkɛ mɔtalman ed.”

²³ Dɛn miks wayn wit wan bita mɛrɛsin we nem ma, ɛn gi Jizɔs fɔ drink, bɔt i nɔ drink am.

²⁴ Dɛn nel Jizɔs pan di krɔs, dɔn dɛn ib days fɔ sheb in klos dɛn.

²⁵ Na bin nayn oklɔk mɔnin dɛn nel Jizɔs pan di krɔs.

²⁶ Dɛn rayt di tin we mek dɛn kil am ɛn nel am oba Jizɔs in ed. Dɛn rayt “Di Ju Pipul Dɛn Kiŋ.”

²⁷ Da sem tɛm de dɛn nel tu tifman pan tu krɔs, wan na Jizɔs in raytan, wan nain lɛfan. [

²⁸ So di tin we dɛn rayt na Gɔd in Buk we se, “Pipul dɛn min se insɛf na wikɛd man,” kam bi tru.]

²⁹ Di pipul dɛn we bin de pas bin de shek dɛn ed ɛn ala pan Jizɔs. Dɛn se, “A min yu bin se yu go brok Gɔd in Os, ɛn yu go tek tri de fɔ bil am bak.

³⁰ Wɛl, sev yusɛf naw, kɔmɔt na di krɔs, kam dɔŋ!”

³¹ Semwe so, dɛn bigman we de mek sakrifays fɔ pipul sin ɛn di Ju Lɔ ticha dɛn bigin jok bɔt Jizɔs to dɛnsɛf. Dɛn se, “I bin de sev ɔda pipul, bɔt i nɔ ebul sev insɛf!

³² Mek di Mɛsaya, we na di Ju pipul dɛn kiŋ kɔmɔt na di krɔs kam dɔŋ, so dat wi go si ɛn biliv pan am!” Di tu ɔda pipul dɛn we bin nel pan dɛn krɔs klos Jizɔs, dɛnsɛf tɔk bad bɔt Jizɔs.

Jizɔs Day

³³ Frɔm twɛlv oklɔk te tri oklɔk santɛm, di wan ol kɔntri dak.

³⁴ Shap tri, Jizɔs ala, i se, “Ilay, Ilay, lama sabak tani?” Dat min, “Mi Gɔd, mi Gɔd, wetindu yu fɔsek mi?”

³⁵ Wɛn sɔm pan di pipul dɛn we bin tinap klos de yɛri wetin Jizɔs se, dɛn se, “I de kɔl Ilayja fɔ kam ɛp am.”

³⁶ Wan pan dɛn rɔn go sok spɔnj wit viniga ɛn tay di spɔnj pan lɔŋ tik, dɔn i es di tik fɔ mek Jizɔs sɔk di spɔnj. Di pɔsin se, “Una lɛ wi si if Ilayja go kam pul am kɔmɔt na di krɔs!”

³⁷ Jizɔs ala big wan, dɛn i day.

³⁸ Di tik tik kɔtin we bin ɛŋ na Gɔd in Os chɛr tu, frɔm ɔp sote kam dɔŋ.

³⁹ Wɛn di ami ɔfisa we bin tinap bifo di krɔs si se Jizɔs dɔn day, i se, “Dis man ya na bin Gɔd in Pikin, fɔ tru!”

⁴⁰ Sɔm uman dɛn bin tinap fawe de luk. Sɔm pan di wan dɛn we bin lib de na Meri we kɔmɔt Magdala, Meri we na smɔl Jems ɛn in brɔda Josis dɛn mama, ɛn Salomi.

⁴¹ Wɛn Jizɔs bin de na Galili na dɛn uman ya bin de fala am go ɔlɔbɔt ɛn na dɛn bin de ɛp am. Plɛnti ɔda uman dɛn we bin fala Jizɔs kam na Jerusɛlɛm bin lib de.

Josɛf Bɛr Jizɔs

^42-43 Di tɛm bin dɔn rich fɔ di Ju pipul dɛn fɔ rɛdi fɔ di de fɔ pre ɛn blo. So ivintɛm, Josɛf we kɔmɔt na wan tɔŋ we nem Arimatia, nɔ fred fɔ go aks Paylet fɔ gi am Jizɔs in bɔdi. Josɛf na bin bigman na di Ju gran kot ɛn di pipul dɛn bin rɛspɛkt am; insɛf bin de luk fɔ di tɛm we Gɔd go kam rul di wɔl.

⁴⁴ Paylet wɔnda if Jizɔs dɔn day kwik wan so, so i kɔl di soja ami ɔfisa ɛn aks am if i dɔn te we Jizɔs day.

⁴⁵ Wɛn di ami ɔfisa tɛl am se Jizɔs dɔn day, Paylet gi Josɛf di bɔdi.

⁴⁶ Josɛf go bay nyu linin klos, i pul Jizɔs in bɔdi pan di krɔs ɛn rap am, dɛn i go bɛr am insay wan ston grev we dɛn bin dig; dɔn i tek big ston kɔba di grev domɔt.

⁴⁷ Meri we kɔmɔt Magdala ɛn Meri we na Josis in mama bin de luk usay dɛn de bɛr Jizɔs.