Mak 13 - Krio Fɔs Oli Baybul

Jizɔs Se Gɔd In Os na Jerusɛlɛm Go Pwɛl

¹ We Jizɔs bin de kɔmɔt na Gɔd in Os, wan pan in lanin bɔy dɛn se, “Ticha, luk dɛn fayn ston ɛn ɔl dɛn fayn fayn bildin ya!” I bin de tɛl Jizɔs bɔt Gɔd in Os.

² Jizɔs se, “Una si dɛn big bildin ya? Tɛm de kam we dɛn ɔl go fɔdɔm, ɛn wan ston nɔ go lɛf pantap in kɔmpin.”

Di Sɔfa we Pipul Go Sɔfa

³ We Jizɔs sidɔm na Mawnt Ɔliv, we de fesin Gɔd in Os, nain Pita, Jems, Jɔn ɛn Andru kam mit am ɛn aks am se,

⁴ “Tɛl wi ustɛm dɛn tin we yu bin tɛl wi bɔt go bi? Us sayn go sho wi se i nɔ go te igen we ɔl dɛn tin ya go bi?”

⁵ Jizɔs ansa se, “Una tek tɛm mek nɔbɔdi nɔ mek una ful.

⁶ Plɛnti pipul go tek mi nem kam, dɛn go se dɛn na di Mɛsaya, dɛn go mek plɛnti pipul ful.

⁷ Ɛn una nɔ fɔ wɔri wɛn una yɛri bɔt wa we de klos una ɔ wɛn una yɛri bɔt wa we de fawe. Dɛn tin de mɔs bi, bɔt di wɔl nɔ go ɛnd yet!

⁸ Wan kɔntri go fɛt ɔda kɔntri, ɛn wan neshɔn go fɛt ɔda neshɔn. Di grɔn go trimbul plɛnti say, natin nɔ go de fɔ it. Ɔl dɛn bad tin de na di fɔs waala dɛn we go fɔdɔm. Wɔs wan dɛn go de biɛn.

⁹ “Una bikyaful, pipul go ol una ɛn kɛr una go bifo dɛn pipul we de jɔj na kot. Pipul go bit una na dɛn Ju mitin os; dɛn go kɛr una go bifo dɛn pipul we de rul, bikɔs una biliv pan mi; da tɛm de una fɔ tɔk di tru tin we una no bɔt mi.

¹⁰ Bifo di wɔl dɔn, pipul ɔlɔbɔt na wɔl fɔ dɔn yɛri di Gud Nyuz fɔs.

¹¹ Ɛnitɛm we dɛn ol una ɛn kɛr una go kot, una nɔ fɔ wɔri bɔt wetin una go tɔk, una nɔ fɔ tink bɔt dat bifo di tɛm rich, bɔt wɛn di tɛm rich, ɛnitin we Gɔd in Spirit put na una mɔt, nain una go tɔk. Da tɛm de nɔto unasɛf go tɔk, na Gɔd in Spirit go tɔk fɔ una.

¹² Brɔda go an brɔda oba gi pipul fɔ mek dɛn kil am, semwe, papa go an in pikin gi pipul fɔ mek dɛn kil am. Pikin go fɛt in papa ɛn mama, ɛn i go mek pipul kil dɛn.

¹³ Pipul nɔ go lɛk una bikɔs una biliv pan mi, bɔt ɛnibɔdi we bia sote i day, go sev.

Di Bad Bad Tin

¹⁴ “Una go si di bad bad tin tinap na di ples we i nɔ fɔ de.” (Una we de rid: una ɔndastand wetin dis min.) “Da tɛm de di pipul dɛn na Judia fɔ rɔnawe go na dɛn il,

¹⁵ pɔsin we de pantap in os, nɔ fɔ kam dɔŋ ɛn go insay di os igen fɔ tek ɛnitin.

¹⁶ Pɔsin we de wok na fam nɔ fɔ tɔn bak go tek in klos.

¹⁷ Da tɛm de, i go bad fɔ bɛlɛ uman ɛn uman we de gi pikin bɔbi!

¹⁸ Una pre mek dɛn tin ya nɔ bi ren sizin!

¹⁹ Da tɛm de pipul go sɔfa pas aw dɛn dɔn sɔfa frɔm di tɛm we Gɔd mek di wɔl sote naw; ɛn afta dat, tin lɛkɛ dat nɔ go bi igen.

²⁰ Bɔt di Masta dɔn mek da tɛm de shɔt, if nɔ so, nɔbɔdi nɔ bin go lɛf na di wɔl. Bɔt fɔseka dɛn pipul we i dɔn pik, di Masta dɔn mek da tɛm de shɔt.

²¹ “If ɛnibɔdi tɛl una se, ‘Luk di Mɛsaya na ya!’ Ɔ ‘Luk am yanda!’, Una nɔ biliv am.

²² Bikɔs sɔm pipul go kam we go lay se dɛn na di Mɛsaya ɛn sɔm go kam we go lay se dɛn na prɔfɛt, ɛn dɛn go du plɛnti wɔndaful wok ɛn sho plɛnti sayn, so dat da we de, dɛn kin mek dɛn pipul ful we Gɔd dɔn pik fɔ sev, if dɛn ebul du dat.

²³ Una fɔ waydawek; a dɔn tɛl una ɔltin bifo dɛn bi.

Mɔtalman Pikin de Kam

²⁴ “Afta pipul dɔn sɔfa ɔl dɛn tin ya, di san go dak, di mun nɔ go shayn igen.

²⁵ Di sta dɛn go fɔdɔm kɔmɔt na di klawd, ɛn di pawa dɛn we de na di klawd go muf kɔmɔt na di ples we dɛn bin de.

²⁶ Da tɛm de, ɔlman na wɔl go si Mɔtalman Pikin de kɔmɔt na klawd kam dɔŋ wit pawa ɛn brayt brayt layt go de shayn rawnd am.

²⁷ I go sɛn di enjɛl dɛn ɔlɔbɔt na wɔl frɔm wan ɛnd to di ɔda fɔ gɛda dɛn pipul we i dɔn pik fɔ bi in yon, briŋ dɛn kam to am.

Di Tin we Wi Lan bɔt di Fig Tik

²⁸ “Una luk fig tik ɛn lan. Wɛn di an dɛn de pul nyu lif, una fɔ no se ren sizin de kam.

²⁹ Semwe so, wɛn una si dɛn tin we a tɛl una, de bi, una go no se di tɛm we Mɔtalman Pikin fɔ kam dɔn de klos.

³⁰ A de tɛl una se, ɔl dɛn tin ya mɔs bi, bifo dɛn pipul we de naw, day.

³¹ Natin nɔ go de ɔp klawd igen ɛn di wɔl sɛf nɔ go de igen, bɔt mi wɔd dɛn go de sote go wit ɔl dɛn pawa.

Nɔbɔdi Nɔ No di De ɔ di Awa

³² “Nɔbɔdi nɔ no di de ɔ di awa we dɛn tin ya go bi; Gɔd in enjɛl dɛnsɛf ɛn Gɔd in Pikin insɛf nɔ no di de ɔ di awa; na di Papa in wangren no di tɛm.

³³ Una fɔ waydawek, una fɔ de wach, bikɔs una nɔ no ustɛm dɛn tin ya go bi.

³⁴ I go jɛs tan lɛkɛ we pɔsin de go patrol, i lɛf in os to in savant dɛn. I gi ɔlman in yon wok, dɔn i tɛl di wachman fɔ de wach.

³⁵ So una fɔ waydawek, ɛn una fɔ de wach, bikɔs una nɔ no di tɛm we una masta go kam; una nɔ no if i go kam midul nɛt, ivintɛm, ali mɔnin, ɔ wɛn mɔnin dɔn go fa lili bit.

³⁶ Una fɔ waydawek, mek i nɔ kam tɛm we una nɔ mekɔp ɛn mit una de slip.

³⁷ Di tin we a de tɔk so, nɔto fɔ una nɔmɔ, na fɔ ɔlman. Una fɔ waydawek!”