Mak 12 - Krio Fɔs Oli Baybul

Di Parebul bɔt Pipul we Rɛnt Wan Gadin

¹ Jizɔs pul wan parebul; i se, “Wan man bin plant grepvayn nain gadin, dɔn i mek ston wɔl rawnd di gadin. I dig ol fɔ mek di wayn ɛn bil wan ples ɔp di wɔl we pɔsin go sidɔm fɔ wach di gadin. I rɛnt di gadin gi sɔm pipul, dɔn i go patrol na ɔda kɔntri.

² Wɛn di greps bigin bia, di man we gɛt di gadin sɛn in bɔy fɔ go aks di pipul dɛn we rɛnt di gadin fɔ gi am sɔm pan di greps.

³ Bɔt di pipul dɛn we rɛnt di gadin kech di bɔy, bit am ɛn drɛb am kɔmɔt na di gadin, dɛn nɔ gi am natin.

⁴ Di man we gɛt di gadin sɛn in ɔda bɔy, bɔt di pipul dɛn we rɛnt di gadin wund in ed ɛn disgres am.

⁵ Di man sɛn ɔda bɔy, dɛn kil da wande; dɔn dɛn kil ɛn wund plɛnti ɔda bɔy dɛn we di man sɛn.

⁶ Di las pɔsin we di man sɛn nain bɔy pikin we i lɛk. I mɛmba se we di pipul dɛn si in pikin, dɛn go rɛspɛkt am.

⁷ Wɛn di pipul dɛn we rɛnt di gadin si di man in pikin, dɛn se, ‘Na dis pikin dis prɔpati ya go lɛf to, lɛ wi kil am, so dat di prɔpati go kam na wi an.’

⁸ Dɛn ol am ɛn kil am, ɛn drɛg am kɔmɔt na di gadin.”

⁹ Jizɔs aks in lanin bɔy dɛn se, “Wetin una tink se di man we gɛt di gadin go du dɛn pipul ya? I go kil dɛn ɔl ɛn rɛnt di gadin gi ɔda pipul.

¹⁰ Una nɔ rid yet wetin rayt na Gɔd in Buk? Dɛn rayt se, ‘Di ston we dɛn pipul we de bil nɔ luk se bɛtɛ, nain dɔn bi di wan we impɔtant pas ɔl di ɔda wan dɛn.

¹¹ Na di Masta mek dat bi; ɛn di tin we di Masta du, so wɔndaful!’”

¹² Di bigman dɛn we de mek sakrifays fɔ pipul sin ɛn di Ju Lɔ ticha dɛn tray fɔ ol Jizɔs, bikɔs dɛn bin no se na pan dɛn Jizɔs pul di parebul. Bɔt dɛn fred di krawd, so dɛn lɛf Jizɔs go.

Fɔ Pe Taks ɔ Nɔ fɔ Pe Taks

¹³ Dɛn sɛn sɔm Faresi dɛn ɛn sɔm pan Ɛrɔd in pati pipul dɛn to Jizɔs fɔ mek Jizɔs tɔk sɔntin we dɛn go tek kech am.

¹⁴ Dɛn go mit Jizɔs ɛn se, “Ticha, wi no se yu de tɔk tru ɛn yu nɔ tek ɛnibɔdi pas in kɔmpin, yu nɔ de luk if pɔsin jɛntri ɔ if i po. Yu de lan wi wetin Gɔd want mɔtalman fɔ du, fɔ tru, bɔt lɛ wi aks yu wan kwɛshɔn. I rayt fɔ mek wi pe taks to di kiŋ na Rom? Wi fɔ pe taks ɔ wi nɔ fɔ pe taks?”

¹⁵ Jizɔs no wantɛm se dɛn na ipokrit pipul, ɛn dɛn bin de sɛt trap fɔ kech am, so i se, “Wetin du una de tray fɔ tek wetin a tɔk kech mi? Una briŋ wan Roman kɔpɔ kam mek wi luk am.”

¹⁶ Wɛn dɛn briŋ di Roman kɔpɔ kam, Jizɔs aks dɛn se, “Udat in pikchɔ ɛn nem de pan di kɔpɔ?” Dɛn se, “Na di kiŋ na Rom in yon.”

¹⁷ Jizɔs se, “Una gi di kiŋ na Rom wetin blant am ɛn una gi Gɔd wetin blant Gɔd.” Di pipul dɛn we kam fɔ tray Jizɔs wɔnda wɛn dɛn yɛri wetin Jizɔs tɔk.

Pipul we dɔn Day Go Rayz frɔm dɛn Grev

¹⁸ Sɔm pan di Sadyusi dɛn kam mit Jizɔs; di Sadyusi dɛn bin biliv se pɔsin we dɔn day nɔ go rayz frɔm di grev.

¹⁹ Dɛn aks Jizɔs se, “Ticha, Mozis bin rayt se, ‘If pɔsin in brɔda day lɛf wɛf we nɔ bɔn pikin, di brɔda we lɛf fɔ mared di uman, mek dɛn go bɔn pikin fɔ di brɔda we dɔn day.’

²⁰ Sɛvin brɔda dɛn bin de, di fɔs brɔda mared, dɛn i day, in wɛf nɔ bɔn pikin bifo di man day lɛf am.

²¹ Di sɛkɛn brɔda mared di uman we in brɔda bin mared bifo i day, insɛf day ɛn di uman nɔ bɔn fɔ am. Na di sem tin bi to di tɔd brɔda.

²² Ɔl di sɛvin brɔda dɛn mared di wan uman, bɔt di uman nɔ bɔn fɔ dɛn. Na di uman las day.

²³ Di de we Gɔd go mek dɛn pipul we dɔn day rayz frɔm dɛn grev, uswan pan dɛn sɛvin brɔda ya go gɛt di uman fɔ in wɛf, we dɛn ɔl sɛvin bin dɔn mared am?”

²⁴ Jizɔs se, “Una mistek bad, bikɔs una nɔ no wetin rayt na Gɔd in Buk, ɛn una nɔ no bɔt Gɔd in pawa.

²⁵ Di tɛm we Gɔd go mek dɛn pipul we dɔn day rayz frɔm dɛn grev, mared nɔ go de igen, di pipul dɛn go tan lɛkɛ di enjɛl dɛn na ɛvin.

²⁶ We una de aks if dɛn pipul we dɔn day go rayz frɔm dɛn grev, una nɔ rid yet wetin Gɔd bin mek Mozis rayt nain Buk, da say we tɔk bɔt di smɔl tik we bin de bɔn we Gɔd bin tɛl Mozis se, ‘Mi na Gɔd fɔ Ebraam, Ayzak, ɛn Jekɔb?’

²⁷ Una dɔn mistek bad, bikɔs if Gɔd na Gɔd fɔ pɔsin dat min se da pɔsin de nɔto pɔsin we day, bɔt na pɔsin we gɛt layf.”

Di Lɔ we Pas Ɔl di Ɔda Lɔ dɛn

²⁸ Wan Ju Lɔ ticha kam mit dɛn de agyu, i no se Jizɔs ansa dɛn wɛl, so i aks Jizɔs se, “Uswan pan di lɔ dɛn pas ɔl di ɔda wan dɛn?”

²⁹ Jizɔs ansa am se, “Na di lɔ we se, ‘Una we na Izrɛl pipul, lisin! Di Masta na wi Gɔd, ɔda wan nɔ de.

³⁰ Una fɔ lɛk di Masta we na una Gɔd wit ɔl una at, ɔl una layf, ɔl una maynd, ɛn ɔl una pawa.’

³¹ Di ɔda lɔ we impɔtant nain dis, ‘Una fɔ lɛk una kɔmpin mɔtalman lɛkɛ aw una lɛk unasɛf.’ Ɔda lɔ nɔ de we pas dɛn tu ya.”

³² Di Ju Lɔ ticha tɔk igen, i se, “Ticha, yu dɔn tɔk tru we yu se, na wangren Gɔd de, ɔda wan nɔ de.

³³ Ɛn we yu se, wi fɔ lɛk Gɔd wit ɔl wi at, ɔl wi maynd, ɛn ɔl wi pawa, ɛn wi fɔ lɛk wi kɔmpin mɔtalman lɛkɛ aw wi lɛk wisɛf. Dat bɛtɛ pas ɔl di sakrifays dɛn we wi de mek ɛn ɔl di bif dɛn we wi de bɔn we wi de sakrifays to Gɔd.”

³⁴ Jizɔs no se di Ju Lɔ ticha ansa am wit sɛns, so i tɛl am se, “Di tɛm we yu go lɛ Gɔd rul yu dɔn kam klos.” Afta dat, ɔlman fred fɔ aks Jizɔs kwɛshɔn.

Udat Na di Mɛsaya?

³⁵ Wɛn Jizɔs bin de na Gɔd in Os de lan di pipul dɛn, i aks dɛn se, “Aw dɛn Ju Lɔ ticha ya go se di Mɛsaya na Devid in grampikin pikin?

³⁶ Gɔd in Spirit mek Devid insɛf tɔk se, ‘Gɔd tɛl mi Masta se: Sidɔm na mi raytan, sote a mek yu mas dɛn pipul we nɔ lɛk yu.’

³⁷ “Devid insɛf kɔl di Mɛsaya, ‘Masta,’ so aw di Mɛsaya go bi wan pan in grampikin pikin dɛm?” Plɛnti pipul bin gladi fɔ yɛri wetin Jizɔs de tɔk.

Jizɔs Wɔn dɛn fɔ Tek Tɛm wit dɛn Ju Lɔ Ticha

³⁸ Wɛn Jizɔs bin de lan di pipul dɛn mɔ, i se, “Una tek tɛm wit dɛn Ju Lɔ ticha, dɛn lɛk fɔ wɛr lɔŋ gawn ɛn waka ɔlɔbɔt ɛn dɛn lɛk fɔ mek pipul tɛl dɛn adu na dɛn ples we plɛnti pipul gɛda.

³⁹ Dɛn na pipul we lɛk fɔ sidɔm na dɛn bɛnch we de bifo na di Ju mitin os, ɛn wɛn pipul kɔl dɛn na pati, dɛn kin lɛk fɔ go sidɔm na di ples we dɛn bigman de sidɔm.

⁴⁰ Dɛn lɛk fɔ kapu dɛn uman dɛn prɔpati we dɛn man dɔn day, ɛn dɛn kin tinap de pre lɔŋ lɔŋ lɛkɛ se dɛn na gud pipul. Gɔd go pɔnish dɛn pas aw i go pɔnish ɔda pipul!”

Wan Uman we In Man dɔn Day Gi Gɔd Ɔl In Kɔpɔ

⁴¹ Jizɔs bin sidɔm fesin di bɔks we dɛn de put kɔpɔ na Gɔd in Os de luk we di pipul dɛn de kam put dɛn kɔpɔ insay di bɔks. Plɛnti jɛntri pipul put plɛnti kɔpɔ insay di bɔks.

⁴² Dɛn wan po uman we in man bin dɔn day go put tu kɔpɔ nɔmɔ we na lɛkɛ wan sɛnt nɔmɔ, insay di bɔks.

⁴³ Nain Jizɔs kɔl in lanin bɔy dɛn ɛn se, “A de tɛl una se, dis po uman we in man dɔn day put mɔ kɔpɔ pas ɔlman we kam put kɔpɔ na di bɔks.

⁴⁴ Ɔlman we kam put kɔpɔ jɛs put kenkeni pan di plɛnti plɛnti kɔpɔ we dɛn gɛt, bɔt dis uman put ɔl wetin i bin gɛt fɔ tek manej in layf.”