Mak 11 - Krio Fɔs Oli Baybul

Jizɔs Go Insay Jerusɛlɛm

¹ Wɛn dɛn bin dɔn de klos Jerusɛlɛm, ɛn dɛn dɔn rich Bɛtfej ɛn Bɛtani we de klos Mawnt Ɔliv, Jizɔs tɛl tu pan in lanin bɔy dɛn fɔ go na di vilej we de bifo dɛn.

² I se, “Una go na di vilej we de bifo una. As una de rich de so, una go mit dɛn tay wan dɔnki pikin we pɔsin nɔ rayd wande. Una lus am ɛn briŋ am kam to mi.

³ If ɛnibɔdi aks una wetindu una de lus am, una fɔ se, ‘Di Masta want am, bɔt i go mek wi briŋ am kam bak as i dɔn wit am so.’”

⁴ Di tu lanin bɔy dɛn go na di ples we Jizɔs sɛn dɛn ɛn dɛn mit di dɔnki pikin tay na trit klos wan os domɔt. Dɛn bigin lus am, as dɛn de lus am,

⁵ di pipul dɛn we bin tinap de aks di lanin bɔy dɛn wetin mek dɛn de lus am.

⁶ Di lanin bɔy dɛn tɔk wetin Jizɔs bin tɛl dɛn fɔ tɔk, so di pipul dɛn gri fɔ mek dɛn kɛr di dɔnki pikin go.

⁷ Di lanin bɔy dɛn kɛr di dɔnki pikin go to Jizɔs; wɛn dɛn rich, dɛn prɛd dɛn klos pantap di dɔnki pikin in bak, Jizɔs sidɔm pantap am.

⁸ Plɛnti ɔda pipul prɛd dɛnsɛf yon klos na grɔn ɛn sɔm ɔda wan dɛn brok di an dɛn pan sɔm tik ɛn ib dɛn na di rod we Jizɔs de pas.

⁹ Di pipul dɛn we bin de bifo ɛn di wan dɛn we bin de biɛn bin de ala se, “Prez Gɔd! Gɔd blɛs di wan we i dɔn sɛn fɔ kam tinap fɔ am!

¹⁰ Lɛ Gɔd blɛs di gɔvmɛnt we wi grampapa papa Devid bin gɛt ɛn we go kam bak. Una lɛ wi prez Gɔd!”

¹¹ Wɛn Jizɔs rich na Jerusɛlɛm, i go na Gɔd in Os ɛn luk ɔltin we lib de. Bɔt we nɛt bin dɔn de kam, in ɛn in lanin bɔy dɛn go na Bɛtani.

Jizɔs Swɛ Wan Fig Tik

¹² Di ɔda de wɛn dɛn kɔmɔt Bɛtani, Jizɔs bin aŋri.

¹³ I si wan fig tik we bin gɛt plɛnti lif, so Jizɔs go luk di tik fɔ si if i de bia. Wɛn i rich klos di tik, i si se na soso lif nɔmɔ kɔba am, bikɔs nɔto bin di tɛm dat fɔ mek i bia.

¹⁴ Jizɔs swɛ di tik, i se, “Yu nɔ go bia natin igen.” Di lanin bɔy dɛn yɛri wetin Jizɔs tɔk.

Jizɔs Go Insay Gɔd In Os

¹⁵ Wɛn Jizɔs rich Jerusɛlɛm, i go na Gɔd in Os ɛn drɛb dɛn pipul we bin de bay ɛn sɛl insay de. I tɔn oba dɛn tebul we pipul bin de chenj kɔpɔ pan, ɛn dɛn bɛnch we pipul kin sidɔm pan fɔ sɛl pijin.

¹⁶ I nɔ gri fɔ mek ɛnibɔdi kɛr ɛnitin fɔ sɛl go insay Gɔd in Os.

¹⁷ I se, “Dɛn rayt na Gɔd in Buk se, Gɔd se, ‘Pipul fɔ kɔl mi Os di ples we fɔ pre’. Bɔt una dɔn tɔn am to ples we tifman de ayd!”

¹⁸ Wɛn di bigman dɛn we de mek sakrifays fɔ pipul sin ɛn di Ju Lɔ ticha dɛn yɛri wetin Jizɔs tɔk, dɛn bigin fɛn we fɔ kil am. Dɛn bin de fred am, bikɔs ɔl di pipul dɛn bin de wɔnda wɛn dɛn yɛri wetin i de tich ɛn dɛn bin gladi.

¹⁹ Jizɔs ɛn in lanin bɔy dɛn kɔmɔt na di tɔŋ da sem ivintɛm de.

Wetin fɔ Lan bɔt di Fig Tik

²⁰ Na mɔnin wɛn dɛn de tɔn bak, dɛn si se di fig tik dɔn day frɔm bɔtɔm te go ɔp.

²¹ Pita mɛmba wetin bin bi, so i tɔn to Jizɔs ɛn se, “Ticha, luk, da fig tik we yu bin swɛ dɔn day!”

²² Jizɔs se, “Una fɔ biliv Gɔd gud.

²³ A de tɛl una se, if ɛnibɔdi tɛl dis mawnten fɔ kɔmɔt na ya ɛn go na di si, ɛn di pɔsin nɔ dawt se wetin i tɔk go bi, bɔt i biliv se wetin i tɔk go bi, na so i go bi.

²⁴ Na dat mek a de tɛl una se, ɛnitin we una aks Gɔd fɔ, una fɔ biliv se una go gɛt am ɛn una go gɛt am.

²⁵ Ɛnitɛm we una de pre to Gɔd, una fɔ padin ɛnibɔdi we du una bad, so dat una Papa Gɔd we de na ɛvin go padin una fɔ di bad tin dɛn we una du. [

²⁶ If una nɔ padin una kɔmpin, una Papa Gɔd we de na ɛvin nɔ go padin una fɔ di bad tin dɛn we una du.]”

Udat Tɛl Yu fɔ Du dɛn Tin ya?

²⁷ Wɛn dɛn go bak na Jerusɛlɛm, Jizɔs bin de waka insay Gɔd in Os, nain di bigman dɛn we de mek sakrifays fɔ pipul sin, di Ju Lɔ ticha dɛn, ɛn di ɔda Ju bigman dɛn go mit am.

²⁸ Dɛn aks am se, “Us rayt yu gɛt fɔ du dɛn tin ya? Udat gi yu di rayt fɔ du dɛn?”

²⁹ Jizɔs ansa se, “Mek a aks una wan kwɛshɔn, if una gi mi di rayt ansa, a go tɛl una udat gi mi di rayt fɔ du dɛn tin ya.

³⁰ Na Gɔd ɔ na mɔtalman sɛn Jɔn fɔ kam baptayz pipul?”

³¹ Dɛn bigin tɔk to dɛn kɔmpin se, “If wi ansa se na Gɔd sɛn Jɔn fɔ kam baptayz pipul, i go aks wi se, ‘Wetin du una nɔ bin biliv am?’

³² Bɔt wi fɔ se ‘Na mɔtalman.’” Dɛn fred fɔ tɔk dat bikɔs ɔl di pipul dɛn bin biliv se Jɔn na tru prɔfɛt.

³³ So dɛn se, “Wi nɔ no!” Jizɔs se, “Misɛf nɔ go tɛl una udat gi mi di rayt fɔ du dɛn tin ya.”