Mak 1 - Krio Fɔs Oli Baybul

Wetin Jɔn we de Baptayz Tɛl Pipul

¹ Na ya di Gud Nyuz bɔt Jizɔs Krays we na Gɔd in Pikin, bigin.

² Di Gud Nyuz bɔt Jizɔs Krays bigin lɛkɛ aw Gɔd in prɔfɛt we nem Ayzaya bin rayt, we i se: “Gɔd se, ‘A go sɛn mi mɛsenja bifo yu fɔ mek di rod rɛdi fɔ yu!’

³ Sɔmbɔdi de tɔk lawd na di dɛzat se, ‘Una klia di rod we di Masta go pas; mek di rod tret fɔ am fɔ waka!’”

⁴ Jɔn we bin de baptayz pipul kam na di dɛzat, i bin de tɛl pipul se, if dɛn lɛf di sin we dɛn de pan ɛn mek i baptayz dɛn, Gɔd go padin dɛn.

⁵ Plɛnti pipul we de na Judia ɛn Jerusɛlɛm go fɔ yɛri Jɔn. Di pipul dɛn tɛl Gɔd bɔt dɛn sin, bifo ɔlman we bin lib de, dɛn Jɔn baptayz dɛn na Riva Jɔdan.

⁶ Na kamɛl ia dɛn bin tek mek di klos we Jɔn bin de wɛr ɛn na lɛda dɛn bin tek mek in bɛlt. I bin de it lokɔs ɛn ɔni.

⁷ Wɛn i de tɔk to di pipul dɛn, i kin se, “Afta a dɔn dɔn mi wok, wan pɔsin we gɛt pawa pas mi go kam. A nɔ fit sɛf fɔ butu ɛn lus in sus.

⁸ A dɔn baptayz una wit wata, bɔt in go baptayz una wit Gɔd in Spirit.”

Jɔn Baptayz Jizɔs

⁹ Da tɛm de, Jizɔs kɔmɔt Nazarɛt we de na Galili go mit Jɔn, Jɔn baptayz am na Riva Jɔdan.

¹⁰ Wɛn Jɔn dɔn baptayz Jizɔs, Jizɔs bin de kɔmɔt insay di wata, nain i si di klawd opin ɛn i si Gɔd in Spirit de kam dɔŋ te i kam pan am. Di Spirit bin de kam dɔŋ lɛkɛ aw dɔv kin kam dɔŋ.

¹¹ Dɔn dɛn yɛri vɔys we kɔmɔt na ɛvin de tɔk se, “Yu na mi yon Pikin we a lɛk ɛn a gladi fɔ yu!”

¹² Gɔd in Spirit mek Jizɔs go na di dɛzat wantɛm.

¹³ Jizɔs bin de na di dɛzat fɔti de ɛn fɔti nɛt, ɛn Setan bin de tray am fɔ mek i du bad. Jizɔs bin de wit dɛn wayl bif na bush ɛn enjɛl dɛn bin de ɛp am.

Jizɔs Kɔl Fo Fishaman

¹⁴ Wɛn Jɔn dɔn go jel, Jizɔs bigin go ɔlɔbɔt na Galili de tɛl pipul di Gud Nyuz we Gɔd sɛn.

¹⁵ I bin de se, “Di tɛm dɔn rich. Di tɛm we Gɔd go rul wi, dɔn kam klos. Una tap fɔ du dɛn bad tin we una de du ɛn biliv di Gud Nyuz.”

¹⁶ Wɛn Jizɔs bin de waka na di bich klos Lek Galili, i si tu fisha man dɛn, Saymɔn ɛn in brɔda Andru, de sɛn dɛn fishin nɛt na di wata.

¹⁷ Jizɔs kɔl dɛn, i se, “Una kam bi mi lanin bɔy dɛn, ɛn a go sho una aw fɔ briŋ pipul kam to mi lɛkɛ aw una de kech fish.”

¹⁸ Dɛn lɛf dɛn fishin nɛt wantɛm ɛn fala Jizɔs Krays.

¹⁹ We dɛn go bifo say lili bit, nain Jizɔs si Jems ɛn Jɔn, tu brɔda we Zɛbidi na dɛn papa. Dɛn bin de insay bot de rɛdi dɛn fishin nɛt.

²⁰ Jizɔs kɔl dɛn fɔ fala am; nain dɛn lɛf dɛn papa Zɛbidi ɛn in wokman dɛn na di bot, ɛn fala Jizɔs.

Wan Man we Gɛt Dɛbul Insay Am

²¹ Jizɔs ɛn in lanin bɔy dɛn go na wan tɔŋ we nem Kepanyɔm. Wɛn di de fɔ pre ɛn blo rich, Jizɔs go insay di Ju mitin os, ɛn bigin lan di pipul dɛn bɔt Gɔd.

²² Di pipul dɛn wɔnda we Jizɔs de lan dɛn, bikɔs i bin de lan dɛn lɛkɛ pɔsin we gɛt di rayt fɔ lan pipul dɛn tin ya, i nɔ bin de lan dɛn lɛkɛ aw dɛn Ju Lɔ ticha bin de du.

²³ Da sem tɛm de, wan man we bin gɛt dɛbul insay am kam insay di Ju mitin os ɛn bigin ala se,

²⁴ “Jizɔs we kɔmɔt Nazarɛt, us biznɛs yu gɛt wit wi? Yu kam ya fɔ kil wi? A no udat na yu, a no se yu kɔmɔt to Gɔd ɛn yu dɔn gi Gɔd yu layf fɔ tru.”

²⁵ Bɔt Jizɔs se, “Lɛf fɔ tɔk, ɛn kɔmɔt insay di man.”

²⁶ Di dɛbul wap di man dɔŋ, i ala big wan, dɔn i kɔmɔt insay di man.

²⁷ Ɔl di pipul dɛn we bin lib de wɔnda sote dɛn bigin aks dɛn kɔmpin se, “Wetin dis? Na nyu tin i de lan wi! Dis man gɛt pawa fɔ tɛl dɛbul wetin dɛn fɔ du ɛn dɛn de du am!”

²⁸ Pipul bigin tɔk wantɛm ɔlɔbɔt na Galili bɔt di tin dɛn we Jizɔs du.

Jizɔs Mɛn Plɛnti Pipul

²⁹ Jizɔs ɛn in lanin bɔy dɛn kɔmɔt na di Ju mitin os, dɛn go na Saymɔn ɛn Andru dɛn os. Jems ɛn Jɔn fala dɛn go insay di os.

³⁰ Saymɔn in mɔdɛnlɔ bin ledɔm bikɔs i bin gɛt fiva, so dɛn go tɛl Jizɔs wantɛm se Saymɔn in mɔdɛnlɔ nɔ wɛl.

³¹ Jizɔs go ol di uman in an ɛn ɛp am fɔ grap, nain di fiva kɔmɔt pan am. I gi Jizɔs ɛn in lanin bɔy dɛn tin fɔ it.

³² Di sem de, afta di san go dɔŋ, pipul briŋ ɔl kayn sik pipul ɛn dɛn wan we gɛt dɛbul insay dɛn, kam to Jizɔs.

³³ Ɔl di pipul dɛn na di tɔŋ go gɛda na Saymɔn ɛn Andru dɛn domɔt.

³⁴ Jizɔs mɛn ɔl kayn sik ɛn drɛb plɛnti dɛbul kɔmɔt insay pipul. Jizɔs nɔ gri fɔ mek di dɛbul dɛn tɔk, bikɔs dɛn bin no Jizɔs.

Jizɔs Tɛl Pipul Gɔd In Wɔd na Galili

³⁵ Ali mɔnin, bifo do klin gud, Jizɔs grap go pre na wan ples we pipul nɔ de.

³⁶ Saymɔn ɛn in kɔmpin dɛn go fɛn Jizɔs;

³⁷ wɛn dɛn si am, dɛn se, “Ɔlman de luk fɔ yu.”

³⁸ Jizɔs se, “Una lɛ wi go na di ɔda tɔŋ dɛn, so dat a kin tɛl di pipul dɛn de Gɔd in wɔd, bikɔs na dat mek a kam na dis wɔl.”

³⁹ Jizɔs go ɔlɔbɔt na dɛn Ju mitin os we de na Galili de tɛl pipul Gɔd in wɔd ɛn drɛb dɛbul kɔmɔt insay dɛn.

Jizɔs Mɛn Wan Man we Gɛt Bad Sik na In Skin

⁴⁰ Wan man we bin gɛt bad sik nain skin kam nil dɔŋ bifo Jizɔs ɛn beg am se, “If yu gri fɔ mɛn mi, yu ebul mɛn mi ɛn mek a klin.”

⁴¹ Jizɔs sɔri fɔ di man we gɛt di bad sik, i tret in an, tɔch di man ɛn se, “A want mɛn yu, wɛl naw!”

⁴² Di bad sik kɔmɔt pan di man in skin wantɛm, ɛn i wɛl.

^43-44 Jizɔs wɔn di man traŋa wan, i se, “Nɔ tɛl nɔbɔdi natin bɔt wetin dɔn bi, bɔt go to di man we de mek sakrifays fɔ pipul sin fɔ mek i luk yu; dɛn mek di sakrifays we Mozis bin tɛl pipul fɔ mek. Dat go mek ɔlman no se yu dɔn wɛl.” Dɛn Jizɔs mek di man go.

⁴⁵ Bɔt di man go tɛl plɛnti pipul wetin Jizɔs du fɔ am, so di nyuz prɛd ɔlɔbɔt. Dat mek Jizɔs nɔ sho insɛf to pipul dɛn na ɛni tɔŋ igen, bikɔs di pipul dɛn bin tu plɛnti we kam mit am, so i go tap na ples we nɔbɔdi nɔ de. Bɔt pipul bin stil de kɔmɔt ɔlsay go mit am de.