Lyuk 9 - Krio Fɔs Oli Baybul

I Sɛn In Twɛlv Lanin Bɔy dɛn

¹ Jizɔs kɔl in twɛlv lanin bɔy dɛn ɛn gi dɛn pawa fɔ drɛb dɛbul ɛn fɔ mɛn ɔl kayn sik.

² I sɛn dɛn go ɔlsay fɔ tɔk bɔt Gɔd in rul ɛn fɔ mɛn sik pipul.

³ Jizɔs tɛl dɛn se, “We una de go so, una nɔ kɛr natin. Una nɔ kɛr wɔkin stik, bag, it, mɔni, ɛn ɔda klos.

⁴ Ɛni os we dɛn gi una fɔ tap, na de una fɔ de sote una kɔmɔt na da tɔŋ de.

⁵ If una go na ɛni tɔŋ we di pipul dɛn nɔ gri lisin to una, una kɔmɔt na da tɔŋ de, ɛn shek di dɔti we de ɔnda una fut fɔ mek dɛn no se dɛn dɔn du bad.”

⁶ Di lanin bɔy dɛn lɛf Jizɔs go ɔlɔbɔt na dɛn vilej de tɛl pipul di Gud Nyuz ɛn mɛn sik pipul.

Ɛrɔd Kɔnfyus

⁷ Wɛn Ɛrɔd we bin de rul na Galili yɛri ɔl wetin de bi, i kɔnfyus bikɔs pipul bin de tɔk se Jɔn we bin de baptayz we bin dɔn day, dɔn kam bak!

⁸ Sɔm pipul se na Ilayja kam bak, ɔda wan dɛn se sɔntɛm na wan pan dɛn lɔntɛm prɔfɛt kam bak.

⁹ Ɛrɔd se, “Amin a bin dɔn kil Jɔn, udat na dis pɔsin we a de yɛri bɔt so igen?” I tray fɔ si Jizɔs.

Jizɔs Fid Pas Fayv Tawzin Pipul

¹⁰ Wɛn Jizɔs in lanin bɔy dɛn kam bak, dɛn tɛl am ɔl wetin dɛn du. Jizɔs kɛr dɛn go na wan tɔŋ we nem Bɛtsayda fɔ mek dɛn go de to dɛnsɛf.

¹¹ Wɛn di pipul dɛn yɛri se Jizɔs ɛn in lanin bɔy dɛn de na Bɛtsayda, dɛn go mit dɛn de. Jizɔs gladi fɔ si dɛn. I tɛl dɛn bɔt Gɔd in rul ɛn i mɛn dɛn pipul we sik.

¹² Wɛn di ples dɔn de dak, Jizɔs in lanin bɔy dɛn go mit am ɛn tɛl am se, “Masta, mek dɛn pipul ya go na dɛn vilej, ɛn dɛn fam we nɔ fa fɔ fɛn it ɛn ples fɔ slip bikɔs natin nɔ de na ya fɔ it ɛn dis na ples we pipul nɔ tap.”

¹³ Jizɔs se, “Una gi dɛn it.” Dɛn ansa Jizɔs se, “Wi nɔ gɛt pas fayv bred ɛn tu fish. Aw wi go manej bay it fɔ ɔl dɛn pipul ya?”

¹⁴ Na fayv tawzin man dɛn bin lib de. Jizɔs tɛl in lanin bɔy dɛn se, “Una mek di pipul dɛn sidɔm fifti fifti.”

¹⁵ Di lanin bɔy dɛn mek di pipul dɛn sidɔm lɛkɛ aw Jizɔs tɛl dɛn.

¹⁶ Jizɔs tek di fayv bred ɛn di tu fish, i luk ɔp na ɛvin ɛn tɛl Gɔd tɛnki fɔ di bred ɛn di fish, dɔn i kɔt kɔt di bred ɛn di fish ɛn gi in lanin bɔy dɛn fɔ sheb dɛn gi di pipul dɛn.

¹⁷ Dɛn ɔl it te dɛn bɛlful, dɔn di lanin bɔy dɛn gɛda twɛlv blay pan dɛn af af we lɛf.

Pita Tɔk Udat Na Jizɔs

¹⁸ Wande wɛn Jizɔs in wan bin de pre, in lanin bɔy dɛn bin de wit am. Jizɔs aks dɛn se, “Udat pipul dɛn se a bi?”

¹⁹ Dɛn ansa am se, “Sɔm pipul se yu na Jɔn we bin de baptayz. Ɔda pipul de se yu na Ilayja, sɔm se yu na wan pan dɛn lɔntɛm prɔfɛt we bin dɔn day we dɔn kam bak.”

²⁰ Jizɔs aks dɛn bak se, “Wɛl, udat una se a bi?” Pita ansa se, “Yu na di Mɛsaya we Gɔd sɛn!”

Jizɔs Se In Go Sɔfa ɛn Day

²¹ Jizɔs wɔn dɛn traŋa wan mek dɛn nɔ tɛl ɛnibɔdi udat i bi.

²² I se, “Dɛn Ju bigman, dɛn bigman we de mek sakrifays fɔ pipul sin ɛn dɛn Ju Lɔ ticha go mek Gɔd in Pikin sɔfa plɛnti ɛn dɛn go mek lɛkɛ se dɛn nɔ sabi am sɛf. Dɛn go kil am ɛn bɛr am. Bɔt i go rayz frɔm di grev di de we mek tri.”

²³ Jizɔs tɛl dɛn se, “If ɛnibɔdi want bi mi lanin bɔy, da pɔsin de nɔ fɔ du wetin in want fɔ du nɔmɔ, i fɔ rɛdi fɔ sɔfa ɛn day fɔseka mi ɛvri de ɛn du ɔl wetin a de du.

²⁴ Ɛnibɔdi we de tray fɔ sev in layf, go lɔs am; bɔt ɛnibɔdi we lɔs in layf fɔseka mi, go gɛt di tru layf.

²⁵ Wetin pɔsin go gen, if i gɛt di ol wɔl ɛn day go ɛl ɛn lɔs di tru layf?

²⁶ If ɛnibɔdi de shem fɔ tɔk bɔt mi ɛn wetin a dɔn lan am, Mɔtalman Pikin go shem fɔ da pɔsin de wɛn i kam lɛkɛ Kiŋ ɛn layt we kɔmɔt ɛvin de shayn pan am; di sem layt we de shayn pan in Papa Gɔd, ɛn pan di enjɛl dɛn.

²⁷ A de tɛl una se, sɔm pan di wan dɛn we tinap ya naw nɔ go day sote dɛn no se Gɔd de rul di wɔl, fɔ tru.”

Jizɔs, Mozis, ɛn Ilayja

²⁸ Wɛn wan wik dɔn pas afta Jizɔs tɔk dɛn wɔd ya, Jizɔs kɔl Pita, Jems ɛn Jɔn fɔ fala am go pre na wan ay il.

²⁹ Aw Jizɔs de pre, nain, wantɛm in fes chenj ɛn in klos in kɔla chenj to wayt, we wayt pas shatin sɛf, ɛn i bin de shayn brayt.

³⁰ Aw dɛn de luk, wantɛm dɛn si Jizɔs ɛn tu man de tɔk. Dɛn man ya na bin Mozis ɛn Ilayja.

³¹ Brayt layt bin de rawnd Mozis ɛn Ilayja dɛnsɛf; dɛn bin de tɔk bɔt di day we Jizɔs gɛt fɔ day se na Jerusɛlɛm i go bi.

³² Slip bin dɔn kech Pita ɛn in kɔmpin dɛn, so dɛn slip, wɛn dɛn wek dɛn si di brayt layt rawnd Jizɔs ɛn di tu man dɛn we bin tinap wit am.

³³ Wɛn Mozis ɛn Ilayja want lɛf Jizɔs go, nain Pita se, “Masta, i gud we wi de na ya. Lɛ wi bil tri bafa na ya; wan fɔ yu, wan fɔ Mozis ɛn wan fɔ Ilayja.” Bɔt Pita nɔ bin tink bɔt wetin i de tɔk.

³⁴ Aw Pita de tɔk, nain, wantɛm klawd kam kɔba dɛn so di ples dak; di lanin bɔy dɛn fred.

³⁵ Nain dɛn yɛri vɔys de tɔk na di klawd se, “Dis na mi Pikin we a dɔn pik; una lisin wetin i de tɛl una!”

³⁶ Wɛn di vɔys dɔn tɔk dɔn, dɛn nɔ si di tu man dɛn igen; na Jizɔs in wangren bin lɛf de. Di lanin bɔy dɛn kip ɔl dɛn tin ya we bi na dɛn at. Dɛn nɔ tɛl ɛnibɔdi wetin dɛn si, dɛn wet te sɔm tɛm dɔn pas.

Wan Bɔbɔ we Dɛbul De Tɔmɛnt

³⁷ Di ɔda de, Jizɔs ɛn in lanin bɔy dɛn kɔmɔt ɔp di ay il go na di tɔŋ. Plɛnti pipul go mit am fɔ tɛl am, kabɔ.

³⁸ Wan pan di man dɛn we go mit Jizɔs bigin ala se, “Masta, a beg yu kam luk mi pikin, nain wangren a gɛt!

³⁹ Dɛbul kin kam pan am ɛn i kin ala wantɛm. Di dɛbul kin mek di pikin gɛt fiks so i kin fɔdɔm ɛn frɔsh kin de kɔmɔt nain mɔt, dɔn i kin de fɛt fɛt na grɔn. I kin at fɔ mek di dɛbul lɛf am.

⁴⁰ A bin beg yu lanin bɔy dɛn fɔ drɛb di dɛbul we de ambɔg di bɔbɔ, bɔt dɛn nɔ bin ebul.”

⁴¹ Jizɔs se, “Una dɛn tide pipul ya, una nɔ biliv ɛn una traŋayes! Aw lɔŋ una want fɔ mek a de wit una ɛn bia wit una?” I tɛl di man mek i briŋ in pikin kam.

⁴² As di pikin de kam to Jizɔs, nain di dɛbul wap di pikin dɔŋ na grɔn wit fiks. Jizɔs drɛb di dɛbul kɔmɔt pan am, i an am gi in papa bak.

⁴³ Ɔl di pipul dɛn we bin lib de, wɔnda pan Gɔd in pawa. Ɔl wetin Jizɔs du bin mek di pipul dɛn wɔnda, nain Jizɔs bigin tɔk to in lanin bɔy dɛn. I se,

Jizɔs Tɔk Igen bɔt In Day

⁴⁴ “A want mek una lisin gud wetin a de kam tɛl una. Una nɔ fɔgɛt am! Dɛn go an ova Mɔtalman Pikin gi sɔm pipul.”

⁴⁵ Di lanin bɔy dɛn nɔ bin ɔndastand wetin Jizɔs min bikɔs Gɔd bin ayd di minin frɔm dɛn mek dɛn nɔ no yet wetin go bi. Di lanin bɔy dɛn bin fred fɔ aks Jizɔs wetin di wɔd we i tɛl dɛn min.

Udat Impɔtant Pas Ɔl

⁴⁶ Di lanin bɔy dɛn bigin fɔ agyu bɔt uswan pan dɛn impɔtant pas dɛn ɔl.

⁴⁷ Jizɔs bin no wetin dɛn de tink, so i tek wan pikin put am klos insɛf.

⁴⁸ I tɛl in lanin bɔy dɛn se, “Ɛnibɔdi we tɛl lili pikin lɛkɛ dis wan ya fɔ kam nain os fɔseka mi, na mi da pɔsin de dɔn tɛl fɔ kam nain os; ɛnibɔdi we tɛl mi fɔ kam nain os, dɔn tɛl di Wan we sɛn mi fɔ kam nain os. Di pɔsin we una nɔ tek bɛtɛ yay luk, nain go bi impɔtant pas una ɔl.”

Pɔsin we Nɔ De Mekɔp Bad Fɔ Wi, De Fɔ Wi

⁴⁹ Jɔn go tɔk to Jizɔs. I se, “Masta, wi si wan man de tek yu nem drɛb dɛbul. Wi tɛl di man mek i nɔ du dat bikɔs i nɔ de wit wi.”

⁵⁰ Jizɔs se, “Una nɔ tɛl di man fɔ tap igen bikɔs pɔsin we nɔ de mekɔp bad fɔ wi, de fɔ wi.”

Jizɔs Kɔmɔt Sameria

⁵¹ Wɛn di tɛm we Gɔd bin dɔn plan fɔ tek Jizɔs go ɛvin bin dɔn de rich, Jizɔs mekɔp fɔ go Jerusɛlɛm.

⁵² Jizɔs sɛn mɛsenja dɛn fɔ go bifo insɛf lɛf fɔ go. Di mɛsenja dɛn go na wan vilej na Sameria ɛn du ɔltin we Jizɔs tɛl dɛn fɔ du fɔ mek dɛn fɛn ples fɔ am fɔ slip.

⁵³ Di pipul dɛn na Sameria nɔ gri fɔ mek Jizɔs tap na Sameria bikɔs dɛn bin no se na Jerusɛlɛm Jizɔs de go.

⁵⁴ Wɛn in lanin bɔy dɛn, dat na Jems ɛn Jɔn, si se di pipul dɛn na Sameria nɔ gri fɔ mek Jizɔs tap de, dɛn go mit Jizɔs ɛn aks am se, “Masta, yu want fɔ lɛ wi mek Gɔd sɛn faya kɔmɔt ɛvin kam dɔŋ kam bɔn dɛn pipul ya [lɛkɛ aw Ilayja bin du?]”

⁵⁵ Jizɔs tɔn rawnd ɛn tɔk pan Jems ɛn Jɔn. [I se, “Una nɔ no wetin de na una at. Mɔtalman Pikin nɔ kam fɔ pwɛl pipul dɛn layf, i kam fɔ sev pipul.”]

⁵⁶ Jizɔs ɛn in lanin bɔy dɛn kɔmɔt Sameria go na ɔda tɔŋ.

Fɔ Fala Jizɔs

⁵⁷ As dɛn de go, wan man kam mit Jizɔs ɛn se, “A go fala yu go ɛni say we yu de go, sa!”

⁵⁸ Jizɔs ansa am se, “Padi, dɛn bush kyat gɛt ples fɔ tap ɛn dɛn bɔd gɛt say fɔ tap, bɔt Mɔtalman Pikin nɔ gɛt ples fɔ le in ed sɛf.”

⁵⁹ Jizɔs tɛl wan ɔda man se, “Kam fala mi!” Di man ansa am se, “Masta, mek a go bɛr mi papa fɔs.”

⁶⁰ Jizɔs se, “Lɛf dɛn pipul we nɔ gɛt di layf we Gɔd de gi fɔ bɛr dɛn fambul we dɔn day, yu fɔ go tɛl ɔda pipul bɔt Gɔd in rul.”

⁶¹ Wan ɔda man tɛl Jizɔs se, “Masta, a go fala yu, bɔt duya, wet mek a go tɛl mi pipul dɛn na mi os se a de go.”

⁶² Jizɔs se, “Pɔsin we de dig ol fɔ plant sid ɛn de tɔn luk biɛn am, tan lɛkɛ pɔsin we de wok we lɛf am af we; i nɔ fit fɔ de ɔnda Gɔd in rul.”