Lyuk 7 - Krio Fɔs Oli Baybul

Jizɔs Mɛn Wan Roman Ɔfisa In Bɔy

¹ Wɛn Jizɔs dɔn tɔk to di pipul dɛn dɔn, i go na Kepanyɔm.

² Wan bigman we na bin ɔfisa na di Roman ami bin gɛt lɛkɛ wan ɔndrɛd soja man ɔnda am. In bɔy we i bin lɛk bad bin sik sote i want day.

³ Wɛn di Roman ɔfisa yɛri bɔt Jizɔs, i go mit sɔm Ju bigman dɛn ɛn sɛn dɛn to Jizɔs fɔ lɛ dɛn beg am fɔ kam mɛn in bɔy.

⁴ Wɛn dɛn Ju bigman ya mit Jizɔs, dɛn bigin beg am, dɛn se, “Duya, wi beg, sa, kam mɛn dis ɔfisa in bɔy bikɔs na gud man.

⁵ I lɛk wi Ju pipul dɛn ɛn nainsɛf bil wi Ju mitin os fɔ wi.”

⁶ Jizɔs fala dɛn go te i rich klos di Roman ɔfisa in os. Nain di ɔfisa sɛn in padi dɛn wit mɛsej fɔ Jizɔs; i se, “Masta, nɔ wɔri fɔ kam na mi os igen, bikɔs a nɔ fit fɔ mek yu kam insay mi os;

⁷ a nɔ fit fɔ go klos yu. If yu jɛs tɔk wan wɔd nɔmɔ, mi bɔy go wɛl.

⁸ Misɛf na pɔsin we gɛt bigman dɛn we gɛt pawa oba mi ɛn a gɛt soja man dɛn we de ɔnda mi. A kin tɛl wan se, ‘Go!’ Ɛn i kin go; a kin tɛl ɔda wan se, ‘Kam!’ Ɛn i kin kam; ɛn a kin tɛl mi bɔy se, ‘Du dis wok!’ Ɛn i kin du am.”

⁹ Wɛn Jizɔs yɛri ɔl wetin di ɔfisa tɔk, i wɔnda. Nain i tɔn to di pipul dɛn we bin de fala am ɛn se, “A de tɛl una, a nɔ si pɔsin na Izrɛl wande we biliv Gɔd traŋa wan so lɛkɛ dis man.”

¹⁰ Wɛn di mɛsenja dɛn tɔn bak go na di Roman ɔfisa in os, dɛn mit di bɔy dɔn wɛl.

Jizɔs Wek Dayman

¹¹ I nɔ te afta dat, Jizɔs go na wan tɔŋ we dɛn de kɔl Nen. Jizɔs in lanin bɔy dɛn ɛn plɛnti ɔda pipul bin fala am go na di tɔŋ.

¹² As dɛn rich na di get dɛn mit plɛnti pipul de go bɛr wan man. Di dayman in mama na uman we in man bin dɔn day ɛn na da wangren bɔy pikin de i bin gɛt. Plɛnti pipul na di tɔŋ bin de fala di uman we gɛt di bɛrin.

¹³ Wɛn di Masta si di uman, i sɔri fɔ am, i se, “Nɔ kray ya!”

¹⁴ Wɛn Jizɔs tɔch di kɔfin, di man dɛn we bin tot di kɔfin tinap. Jizɔs tɛl di dedebɔdi se, “Bɔbɔ, grap!”

¹⁵ Di bɔbɔ we bin dɔn day grap sidɔm ɛn bigin tɔk. Jizɔs se, “Mami, luk yu pikin!”

¹⁶ Ɔl di pipul dɛn fred ɛn bigin prez Gɔd. Dɛn se, “Wi dɔn si prɔfɛt we gɛt pawa! Gɔd dɔn kam fɔ sev in pipul dɛn!”

¹⁷ Dis nyuz bɔt Jizɔs prɛd ɔlsay na Judia ɛn dɛn kɔntri we de klos Judia.

Jɔn In Mɛsej

¹⁸ Jɔn in lanin bɔy dɛn go tɛl Jɔn ɔl wetin bi.

¹⁹ Jɔn kɔl tu pan in yon lanin bɔy dɛn ɛn sɛn dɛn go to di Masta fɔ aks am if in na di pɔsin we in bin de tɔk se go kam ɔ if dɛn fɔ luk rod fɔ ɔda pɔsin.

²⁰ Wɛn dɛn man ya kam to Jizɔs, dɛn se, “Jɔn we de baptayz sɛn wi fɔ aks yu if yu na di pɔsin we i bin de tɔk se go kam ɔ if wi fɔ luk rod fɔ ɔda pɔsin, sa?”

²¹ Da sem tɛm de, Jizɔs bin de mɛn plɛnti pipul; i mek dɛn wan we sik wɛl, i drɛb dɛbul kɔmɔt insay sɔm pipul, ɛn i mek plɛnti dɛn blɛnyay pipul si.

²² I tɛl Jɔn in lanin bɔy dɛn se, “Una tɔn bak go tɛl Jɔn ɔl wetin unasɛf dɔn si ɛn wetin una dɔn yɛri; dɛn blɛnyay pipul de si, dɛn pipul we nɔ bin ebul waka, de waka, dɛn wan we gɛt bad sik na dɛn skin dɔn wɛl, dɛn dɛf pipul dɔn yɛri, dɛn dayman dɔn gɛt layf bak, ɛn dɛn po pipul dɔn yɛri di Gud Nyuz.

²³ Dɛn wan we nɔ de dawt mi gɛt blɛsin!”

²⁴ Wɛn di mɛsenja dɛn we Jɔn sɛn tɔn bak, Jizɔs bigin fɔ tɛl di pipul dɛn bɔt Jɔn. I se, “Wɛn una bin go to Jɔn na di dɛzat, wetin una bin want si? Una bin want si gras we de trimbul we briz de blo?

²⁵ If nɔto dat, wetin una bin go fɛn? Na pɔsin we wɛr fayn klos? Nɔ; pipul we wɛr fayn klos we gɛt ɔl wetin dɛn want de na dɛn kiŋ os!

²⁶ Una tɛl mi sɔntin, wetin una bin want si? Na prɔfɛt? Ɛn una si pɔsin we pas prɔfɛt fawe, fɔ tru.

²⁷ Dɛn rayt bɔt Jɔn na Gɔd in Buk se, Gɔd se, ‘A go sɛn mi mɛsenja go bifo yu fɔ klia di rod rɛdi fɔ yu!’

²⁸ A de tɛl una se Jɔn pas ɔl mɔtalman, bɔt di pɔsin we gɛt lili rɛspɛkt pas ɔl dɛn wan we Gɔd de rul, pas Jɔn!”

²⁹ Wɛn ɔl di pipul dɛn ɛn dɛn pipul we de gɛda taks yɛri wetin Jɔn tɔk, dɛn gri se wetin Gɔd want, rayt, ɛn dɛn mek Jɔn baptayz dɛn.

³⁰ Bɔt di Faresi dɛn ɛn di Ju Lɔ ticha dɛn nɔ gri fɔ du wetin Gɔd tɛl dɛn fɔ du ɛn dɛn nɔ gri mek Jɔn baptayz dɛn.

³¹ Jizɔs se, “Wetin a go tek kɔmpia dɛn tide pipul ya? Aw dɛn tan?

³² Dɛn tide pipul ya tan lɛkɛ pikin dɛn we sidɔm na makit os de ple, ɛn ala kɔl dɛn kɔmpin ɛn tɛl dɛn se, ‘Wi dɔn bit drɔm fɔ una, bɔt una nɔ gri dans! Wi dɔn siŋ bɛrin siŋ fɔ una, bɔt una nɔ pul wata na una yay!’

³³ Wɛn Jɔn we de baptayz bin kam, i bin de fast ɛn i nɔ bin de drink wayn, bɔt una se, ‘Jɔn gɛt dɛbul.’

³⁴ Naw we Mɔtalman Pikin kam, i de it ɛn drink ɛn una se, ‘Luk da awaŋɔt ɛn drɔnk man! I mek padi wit dɛn pipul we de gɛda taks ɛn dɛn Ju pipul we nɔ de kip di Ju Lɔ aw dɛn fɔ kip am!’

³⁵ Dɛn wan we de du wetin Gɔd tɛl dɛn fɔ du go sho se na Gɔd gɛt sɛns fɔ tru.”

Jizɔs It Wit Wan Faresi

³⁶ Wan Faresi kɔl Jizɔs fɔ go it nain os. Jizɔs gri ɛn fala di Faresi go nain os.

³⁷ Wan uman bin de na di tɔŋ we bin liv fri layf. Wɛn di uman yɛri se Jizɔs de it na di Faresi in os, i kɛr wan wayt ston bɔtul we bin ful wit fayn fayn dia sɛnt, go na di os.

³⁸ Di uman go butu klos Jizɔs in fut ɛn bigin kray bita wan saful saful. Di wata we kɔmɔt nain yay sok Jizɔs in fut. I tek in ia wep Jizɔs in fut, dɔn i kis Jizɔs in fut fɔ sho se in rɛspɛkt am, dɔn i tek di sɛnt na di bɔtul ɛn rɔb ɔl na Jizɔs in fut.

³⁹ Wɛn di Faresi we kɔl Jizɔs kam nain os fɔ kam it si wetin bi, i wɔnda, i tɔk nain at se, “If dis man na bin prɔfɛt, fɔ tru, i bin fɔ no uskayn uman de ol am so, bikɔs na uman we de pan fri layf.”

⁴⁰ Jizɔs tɔk to di Faresi. I se, “Saymɔn, a gɛt sɔntin fɔ tɛl yu.” Di man ansa Jizɔs se, “Masta, wetin yu want tɛl mi, sa?”

⁴¹ Jizɔs se, “Wan man we bin de lɛn pipul kɔpɔ bin de; tu pipul bin gɛt fɔ pe am. Wan bin gɛt fɔ pe am fayv ɔndrɛd silva kɔpɔ ɛn di ɔda wan bin gɛt fɔ pe am fifti silva kɔpɔ.

⁴² Dɛn ɔl tu nɔ bin ebul fɔ pe am, so i lɛf di mɔni gi dɛn ɔl tu. Pan dɛn tu pipul ya, uswan go lɛk di man we bin lɛn dɛn mɔni pas in kɔmpin?”

⁴³ Saymɔn ansa Jizɔs se, “A tink se na di man we i bin lɛn plɛnti kɔpɔ pas in kɔmpin.” Jizɔs se, “Yu rayt.”

⁴⁴ Jizɔs luk to di uman in pat wɛn i stil de tɔk to Saymɔn. I se, “Yu si wetin dis uman de du fɔ mi, nɔto so? A kam na yu os, yu nɔ gi mi wata sɛf fɔ was mi fut, bɔt dis uman ya dɔn kray pan mi fut te dɛn dɔn sok ɛn nain ia i tek wep dɛn.

⁴⁵ Wɛn a kam na yu os, yu nɔ kis mi sɛf, bɔt frɔm we a kam, dis uman jɛs de kis mi fut.

⁴⁶ Yu nɔ rɔb gris sɛf na mi ed, bɔt dis uman dɔn rɔb fayn sɛnt pan mi fut.

⁴⁷ A de tɛl yu se, di tin we dis uman du we sho se i lɛk mi bad pruv se Gɔd dɔn padin in plɛnti sin dɛn. Pɔsin we nɔ sin plɛnti, we Gɔd dɔn padin, nɔ go lɛk mi bɛtɛ.”

⁴⁸ Jizɔs tɔn to di uman. I se, “Gɔd dɔn padin yu sin dɛn!”

⁴⁹ Dɛn pipul we bin de it wit Jizɔs bigin tɔk se, “Uskayn man dis we de padin pɔsin fɔ in sin?”

⁵⁰ Jizɔs se, “Uman, bikɔs yu biliv pan mi, Gɔd dɔn sev yu. Saful ya, go wit kol at!”