Lyuk 5 - Krio Fɔs Oli Baybul

Dɛn Lɛf Ɔltin ɛn Fala Jizɔs

¹ Wande, Jizɔs bin tinap nia di lek we dɛn kɔl Gɛnɛzarɛt. Di pipul dɛn bin de shub kam klos am fɔ yɛri Gɔd in wɔd we i bin de tɔk.

² Jizɔs si tu bot klos di bich, bɔt di fisha man dɛn nɔ bin de insay, dɛn bin de was dɛn fishin nɛt na di bich.

³ Jizɔs go na Saymɔn Pita in bot ɛn tɛl am mek i mek di bot kɔmɔt klos di sho lili bit. Jizɔs sidɔm insay di bot ɛn bigin lan di pipul dɛn.

⁴ Wɛn i dɔn lan dɛn dɔn, i tɛl Saymɔn Pita se, mek dɛn go wit di bot na di dip say na di wata ɛn sɛn dɛn nɛt dɔŋ de mek dɛn go kech fish.

⁵ Saymɔn Pita se, “Masta, wi dɔn wok traŋa ol nɛt ɛn wi nɔ kech natin, bɔt as na so yu se, a go sɛn di nɛt.”

⁶ Dɛn sɛn di nɛt ɛn kech fish sote dɛn nɛt bin want chɛr,

⁷ so dɛn kɔl dɛn kɔmpin dɛn we bin de na di ɔda bot fɔ kam ɛp dɛn. Wɛn dɛn kam, dɛnsɛf ful dɛn bot. Ɔl tu di bot dɛn ful sote dɛn want sink.

⁸ Wɛn Saymɔn Pita si wetin bi, i butu bifo Jizɔs ɛn ol in fut. I se, “Masta, kɔmɔt klos mi bikɔs mi na man we de pan sin!”

⁹ Wɛn Saymɔn Pita ɛn in kɔmpin dɛn si aw di fish we dɛn kech plɛnti, dɛn wɔnda.

¹⁰ Jems ɛn Jɔn we na Zɛbidi in pikin dɛn we bin de wok wit Saymɔn, dɛnsɛf wɔnda. Jizɔs se, “Saymɔn, nɔ fred! Frɔm tide sote go, yu go briŋ pipul kam to mi lɛkɛ aw yu bin de kech fish.”

¹¹ We dɛn dɔn drɔ dɛn bot kam na di bich, dɛn lɛf ɔltin we dɛn bin gɛt biɛn, ɛn fala Jizɔs.

Jizɔs Mɛn Wan Man we Gɛt Bad Sik na In Skin

¹² Wande, Jizɔs bin go na wan tɔŋ; i mit wan man we bin gɛt bad sik nain skin. Wɛn di man si Jizɔs, i fɔdɔm na grɔn ɛn beg am se, “Masta, if yu gri fɔ mɛn mi, yu ebul mɛn mi ɛn mek a klin.”

¹³ Jizɔs tret in an ɛn tɔch di man. I se, “A want mɛn yu. Wɛl naw!” Di bad sik kɔmɔt pan di man in skin wantɛm.

¹⁴ Jizɔs se, “Nɔ tɛl ɛnibɔdi se a dɔn mɛn yu! Go wantɛm to di man we de mek sakrifays fɔ pipul sin mek i luk yu ɛn mek di sakrifays we Mozis bin tɛl pipul fɔ mek. Dat go mek ɔlman no se yu dɔn wɛl.”

¹⁵ Ɔlman yɛri ɔl wetin Jizɔs de du. Plɛnti pipul kam fɔ yɛri Jizɔs ɛn fɔ mek i mɛn dɛn.

¹⁶ Bɔt plɛnti tɛm Jizɔs kin lɛf di pipul dɛn go fawe fɔ pre.

Jizɔs Mɛn Wan Man we Paralayz

¹⁷ Wande we Jizɔs bin de lan di pipul dɛn, sɔm dɛn Faresi ɛn sɔm dɛn Ju Lɔ ticha bin sidɔm de; dɛn bin kɔmɔt ɔlɔbɔt na Galili, Judia, ɛn Jerusɛlɛm. Gɔd in pawa bin de pan Jizɔs fɔ mɛn sik pipul.

¹⁸ Sɔm pipul tot wan man we paralayz na mata. Dɛn kɛr am go na di os we Jizɔs bin de fɔ le am na grɔn bifo Jizɔs.

¹⁹ Dɛn bin want go insay di os wit di man, bɔt pipul bin plɛnti na di os, so di pipul dɛn nɔ bin ebul kɛr di sik man go insay. Dɛn klem pantap di os wit di sik man. Dɛn pul wan pat pan di ruf, dɔn dɛn sɛn di man go dɔŋ to Jizɔs midul di pipul dɛn.

²⁰ Wɛn Jizɔs si se di pipul dɛn we briŋ di sik man biliv se in go mɛn di man, Jizɔs tɛl di sik man se, “Padi, Gɔd dɔn padin yu sin dɛn.”

²¹ Di Ju Lɔ ticha dɛn ɛn di Faresi dɛn bigin grɔmbul se, “Udat na dis man we de pwɛl Gɔd in nem we i de mek insɛf lɛkɛ Gɔd? Nɔbɔdi nɔ de we ebul padin pɔsin in sin; na Gɔd wangren ebul du dat!”

²² Jizɔs bin no wetin dɛn de tink, so i se, “Wetin mek una de tink se wetin a du nɔ rayt?

²³ Pan dɛn tu tin ya, uswan traŋa fɔ tɔk pas ɔl, ‘Gɔd dɔn padin yu sin dɛn,’ ɔ ‘Grap, tek yu mata, waka go na yu os?’

²⁴ A go sho una se Mɔtalman Pikin gɛt pawa na dis wɔl fɔ padin pɔsin sin.” So Jizɔs tɔk to di man we paralayz. I se, “Grap, tek yu mata ɛn go na yu os.”

²⁵ Aw ɔlman de luk, di man grap wantɛm, kapu in mata ɛn bigin waka go nain os, de prez Gɔd.

²⁶ Ɔlman wɔnda, dɛn fred, so dɛnsɛf bigin fɔ prez Gɔd. Dɛn se, “Wi dɔn si wɔnda tide!”

Jizɔs Kɔl Livay Fɔ Fala Am

²⁷ We Jizɔs dɔn mɛn di man, i go na do. Na de i si wan man we de gɛda taks; i bin nem Livay. I bin sidɔm nain ɔfis. Jizɔs tɛl am mek i kam fala am.

²⁸ Livay grap, i lɛf ɔltin ɛn fala Jizɔs.

²⁹ Livay mek dɛn kuk big it nain os fɔ Jizɔs. Plɛnti pipul we bin de gɛda taks ɛn sɔm ɔda pipul dɛn bin de na di os ɛn dɛn ɔl bin sidɔm de it.

³⁰ Sɔm Faresi ɛn sɔm pan dɛn yon Ju Lɔ ticha dɛn bigin grɔmbul pan Jizɔs in lanin bɔy dɛn. Dɛn se, “Wetin mek una de it ɛn drink wit dɛn pipul we de gɛda taks ɛn dɛn ɔda pipul we nɔ fit fɔ miks wit Ju pipul?”

³¹ Jizɔs ansa dɛn se, “Nɔto dɛn pipul we wɛl gɛt fɔ go to dɔkta, na dɛn pipul we sik.

³² A nɔ kam fɔ tɛl dɛn pipul we de du wetin di Lɔ we Gɔd gi Mozis se fɔ chenj dɛn layf, a kam fɔ tɛl dɛn wan we de pan sin fɔ mek dɛn chenj dɛn layf.”

Jizɔs Lan Pipul Aw fɔ Kip Fast

³³ Sɔm pipul go tɔk to Jizɔs. Dɛn se, “Jɔn in lanin bɔy dɛn de kip fast ɛn pre ɔltɛm, ɛn na so di Faresi dɛn lanin bɔy dɛn de du, bɔt yu yon dɛn jɛs de it ɛn drink.”

³⁴ Jizɔs aks dɛn se, “Wɛn una kɔl pipul kam na mared pati, una go tɛl dɛn mek dɛn nɔ it di tɛm we di ɔkɔ de wit dɛn?

³⁵ Di tɛm de kam we pipul go kɛr di ɔkɔ go ɛn i nɔ go de wit dɛn igen; na da tɛm de dɛn go fast.”

³⁶ Jizɔs pul wan parebul. I se: “Nɔbɔdi nɔ de tek pisis we i chɛr kɔmɔt pan nyu klos fɔ pach ol klos; if i du so, i go mek olpan di nyu klos we go pwɛl am, ɛn pantap dat, di ol klos go luk bad pas aw i bin tan, bikɔs di pisis we i chɛr kɔmɔt pan di nyu klos nɔ go bi di sem lɛkɛ di ol wan.

³⁷ Nɔbɔdi nɔ go tek ol tin we dɛn tek bif kanda mek lɛkɛ bɔtul, put nyu wayn insay, if i du dat, di nyu wayn go bɔs di bif kanda ɛn di wayn go wes.

³⁸ Dɛn fɔ put nyu wayn insay nyu bɔtul.

³⁹ Wɛn pɔsin dɔn drink ol wayn, i nɔ go want drink nyu wayn. I go se, ‘Di ol wan bɛtɛ!’”