Lyuk 4 - Krio Fɔs Oli Baybul

Setan Tray Jizɔs

¹ Wɛn Jizɔs kɔmɔt insay Riva Jɔdan, Gɔd in Spirit bin de insay am, di Spirit kɛr am go na di dɛzat we de na Judia ɛn i de wit am fɔti de, ɔl di tɛm we

² Setan bin de tray fɔ mek Jizɔs du bad. Jizɔs bin aŋri bad we i dɔn de fɔti de, i nɔ it natin.

³ Setan tɛl am se, “If yu na Gɔd in Pikin, mek dis ston ya tɔn bred.”

⁴ Jizɔs ansa am se, “Dɛn rayt na Gɔd in Buk se nɔto tin fɔ it nɔmɔ de mek pɔsin liv.”

⁵ Setan kɛr Jizɔs go ɔp wan ay il ɛn sho am ɔl dɛn kɔntri na di wɔl, i nɔ te lɔŋ sɛf.

⁶ I se, “A go gi yu di rayt fɔ rul oba ɔl dɛn kɔntri ya ɛn mek yu ɛnjɔy ɔl dɛn gud tin we lib de we de mek pipul gladi. Dɛn tin ya dɔn kam na mi an naw ɛn a go pas am gi ɛnibɔdi we a lɛk.

⁷ A go gi yu ɔl dɛn tin ya if yu go se mi na yu masta.”

⁸ Jizɔs se, “Dɛn rayt na Gɔd in Buk se, ‘Pɔsin fɔ nil dɔŋ bifo Gɔd we nain Masta nɔmɔ ɛn pre to am, ɛn nain wangren i fɔ wok fɔ.’”

⁹ Setan kɛr Jizɔs go Jerusɛlɛm ɛn mek i tinap pantap di tawa we de na Gɔd in Os. I tɛl Jizɔs se, “If yu na Gɔd in Pikin, ib yusɛf dɔŋ.

¹⁰ Dɛn rayt na Gɔd in Buk se, ‘Gɔd go mek in enjɛl dɛn gyad yu fɔ mek natin nɔ du yu,’

¹¹ ɛn igen, ‘Yu go fɔdɔm insay dɛn an fɔ mek yu fut sɛf nɔ wund pan ston.’”

¹² Jizɔs ansa am se, “Dɛn rayt na Gɔd in Buk se, ‘Pɔsin nɔ fɔ tray fɔ mek Gɔd we nain Masta du wetin in want.’”

¹³ Wɛn Setan dɔn tray fɔ mek Jizɔs du bad ɔl kayn we, ɛn i nɔ ebul, i lɛf Jizɔs lili bit fɔs.

Jizɔs Bigin In Wok

¹⁴ Jizɔs tɔn bak go Galili wit di pawa we Gɔd in Spirit gi am. Ɔlman bigin tɔk bɔt am ɔlsay na dɛn tɔŋ ɛn dɛn vilej we de klos Galili.

¹⁵ Jizɔs bin de lan di pipul dɛn na di Ju mitin os ɛn dɛn ɔl prez am.

Jizɔs Go na Nazarɛt

¹⁶ Jizɔs go Nazarɛt. Na di tɔŋ dat we i de frɔm we i lili te i big. Wɛn di de fɔ pre ɛn blo, kam, i go na di Ju mitin os lɛkɛ aw i bin dɔn yus fɔ du. I tinap fɔ rid Gɔd in Buk to di pipul dɛn.

¹⁷ Dɛn gi am Ayzaya we na bin prɔfɛt in buk fɔ rid. Jizɔs opin di buk na di ples we Ayzaya rayt se:

¹⁸ “Gɔd in Spirit de wit mi, bikɔs Gɔd dɔn pik mi fɔ mek a tɛl dɛn po pipul di Gud Nyuz. I sɛn mi fɔ mek a tɛl dɛn slev se dɛn go fri ɛn dɛn blɛnyay pipul se dɛn go si. I sɛn mi fɔ fri dɛn wan we de lɛkɛ slev,

¹⁹ ɛn fɔ mek a tɛl ɔlman se di tɛm dɔn kam we Gɔd go sev in pipul dɛn.”

²⁰ Jizɔs lɔk di buk ɛn gi di man we de luk di ples; dɛn i sidɔm. Ɔlman we bin de na di Ju mitin os bin de luk Jizɔs gud, dɛn bin de lisin to am.

²¹ I se, “Dis pat pan Gɔd in Buk we a rid, dɔn bi, fɔ tru, tide, jɛs lɛkɛ aw una dɔn yɛri.”

²² Dɛn ɔl tɔk gud bɔt Jizɔs ɛn di fayn fayn wɔd dɛn we i tɔk mek dɛn wɔnda. Dɛn se, “Nɔto Josɛf in pikin dis?”

²³ Jizɔs se, “A shɔ se una go pul parebul pan mi se, ‘Dɔkta, mɛn yusɛf!’ Una go want tɛl mi se mek a du ɔl dɛn wɔndaful wok we una yɛri se a du na Kepanyɔm, na mi yon tɔŋ.”

²⁴ Jizɔs se, “A de tɛl una se prɔfɛt nɔ gɛt rɛspɛkt na di tɔŋ we i bɔn.”

²⁵ “Una lisin mi; di tɛm we Ilayja bin de na Izrɛl, ren nɔ kam fɔ tri ia ɛn siks mɔnt ɛn bad aŋri bin de na di kɔntri, ɛn plɛnti uman we dɛn man bin dɔn day bin de na Izrɛl.

²⁶ Gɔd nɔ sɛn Ilayja to ɛni wan pan dɛn uman ya, pas to Zarɛfat we bin de na Saydɔn.

²⁷ Da tɛm we Ilaysha bin de na Izrɛl, plɛnti pipul we bin gɛt bad sik na dɛn skin bin de na Izrɛl, bɔt nɔto dɛn ɔl i mɛn, na Neman nɔmɔ we kɔmɔt Siria, i mɛn.”

²⁸ Wɛn di pipul dɛn we bin de na di Ju mitin os yɛri dat, dɛn ɔl vɛks.

²⁹ Dɛn grap ɛn drɛb Jizɔs kɔmɔt na di tɔŋ. Dɛn drɔ am go ɔp ɔp di il we dɛn tɔŋ bin de pan ɛn dɛn bin want push am mek i fɔdɔm go dɔŋ di il.

³⁰ Bɔt Jizɔs pas midul dɛn ɛn go.

Wan Man we Gɛt Dɛbul Insay Am

³¹ Jizɔs go Kepanyɔm we de na Galili. I bin de lan di pipul dɛn di de fɔ pre ɛn blo.

³² Ɔl di pipul dɛn wɔnda bikɔs Jizɔs bin de lan dɛn lɛkɛ pɔsin we gɛt di rayt fɔ lan pipul dɛn tin ya.

³³ Wan man bin tap na di Ju mitin os we bin gɛt dɛbul insay am. I ala big wan se,

³⁴ “Jizɔs, we kɔmɔt Nazarɛt, us biznɛs yu gɛt wit wi? Yu kam ya fɔ kil wi? A no udat na yu, a no se yu kɔmɔt to Gɔd ɛn yu dɔn gi Gɔd yu layf fɔ tru.”

³⁵ Jizɔs tɔk pan di dɛbul. I se, “Lɛf fɔ tɔk ɛn kɔmɔt insay dis man!” Di dɛbul ib di man na grɔn bifo di pipul dɛn ɛn kɔmɔt insay am, bɔt i nɔ du di man natin.

³⁶ Dɛn ɔl wɔnda ɛn bigin tɔk se, “Uskayn wɔd dɛn wan ya? Dis man de tɔk lɛkɛ pɔsin we gɛt di rayt ɛn pawa fɔ tɛl di dɛbul dɛn wetin dɛn fɔ du ɛn dɛn de kɔmɔt wantɛm!”

³⁷ Pipul bigin tɔk ɔlɔbɔt na dɛn tɔŋ ɛn dɛn vilej we de klos da eria de bɔt di wɔndaful wok we Jizɔs du.

Jizɔs Mɛn Plɛnti Pipul

³⁸ Jizɔs kɔmɔt na di Ju mitin os, i go na Saymɔn in os. Saymɔn in mɔdɛnlɔ bin gɛt ay fiva. Dɛn beg Jizɔs fɔ mɛn di sik uman.

³⁹ Jizɔs go tinap klos di bed ɛn tɛl di fiva mek i kɔmɔt pan di uman. Di fiva kɔmɔt pan am ɛn di uman grap wantɛm ɛn go fɛn sɔntin fɔ dɛn fɔ it.

⁴⁰ Da sem de de, ivintɛm, dɛn bin briŋ pipul we bin gɛt ɔl kayn sik kam to Jizɔs. I le in an pan ɔl di sik pipul dɛn ed, wan bay wan, ɛn dɛn ɔl wɛl.

⁴¹ Dɛbul dɛn bin kɔmɔt pan plɛnti pipul ɛn ala se, “Fɔ tru, yu na Gɔd in Pikin.” Jizɔs tɔk pan di dɛbul dɛn fɔ mek dɛn sɛt mɔt ɛn i nɔ gri mek dɛn tɔk natin, bikɔs dɛn bin no se in na di Mɛsaya.

Jizɔs Tɛl Pipul di Gud Nyuz

⁴² Wɛn do klin, Jizɔs kɔmɔt na di tɔŋ go na wan ples we pipul nɔ de. Di pipul dɛn we i bin de wit bigin luk fɔ am ɔlɔbɔt. Wɛn dɛn si am, dɛn tɛl am mek i nɔ lɛf dɛn go igen.

⁴³ Bɔt Jizɔs tɛl dɛn se in fɔ go na dɛn ɔda tɔŋ fɔ tɛl dɛn ɔda pipul di Gud Nyuz bɔt Gɔd in rul bikɔs na dat Gɔd sɛn am fɔ kam du na wɔl.

⁴⁴ Jizɔs bin de go na ɔl dɛn Ju mitin os, na Judia, de tɛl pipul di Gud Nyuz.