Lyuk 3 - Krio Fɔs Oli Baybul

Jɔn In Mɛsej

¹ Di ia we mek fiftin we di kiŋ na Rom we nem Kiŋ Taybiryɔs bin dɔn de na pawa, Pɔnchɔs Paylet na bin gɔvna na Judia ɛn Ɛrɔd bin de rul na Galili. Ɛrɔd in brɔda we nem Filip bin de rul na Ituraea ɛn Trakonitis. Laysenyas bin de rul na Abileni.

² Anas ɛn Kaye fas dɛn na bin di bigman dɛn we de mek sakrifays fɔ pipul sin. Da sem tɛm de, Gɔd gi Jɔn we na Zakaraya in pikin in mɛsej fɔ tɛl pipul. Wɛn dat bi, Jɔn bin tap na di dɛzat.

³ Jɔn bigin waka go ɔlsay na dɛn ples we de klos Riva Jɔdan de tɛl pipul se, if dɛn lɛf fɔ du bad ɛn mek i baptayz dɛn, Gɔd go padin dɛn fɔ di bad we dɛn de du.

⁴ Jɔn du jɛs lɛkɛ wetin di prɔfɛt we nem Ayzaya bin rayt nain buk, we i se: “Sɔmbɔdi de tɔk lawd na di dɛzat se, ‘Una klia di rod we di Masta go pas ɛn mek di rod tret fɔ am fɔ waka.

⁵ Ɔl dɛn vali go ful kam ɔp te dɛn lɛvul, ɔl dɛn ay il ɛn smɔl il go tɔn flat grɔn. Dɛn bɛn rod go tret, dɛn stonston rod go lɛbul.

⁶ Ɔlman na wɔl go si aw Gɔd de sev in pipul dɛn.’”

⁷ Plɛnti pipul kam to Jɔn fɔ mek i baptayz dɛn. Jɔn tɔk pan dɛn, i se, “Una dɛn snek ya, we de pɔyzin di wɔl, udat tɛl una fɔ rɔn kɔmɔt pan di trɔbul ɛn waala we Gɔd want briŋ fɔ pɔnish una?

⁸ Una fɔ lɛf fɔ du dɛn tin we nɔ rayt na Gɔd yay ɛn du dɛn tin we go sho se una dɔn lɛf fɔ du dɛn. Una lɛf fɔ se, ‘Wi na Ebraam in grampikin pikin dɛm.’ Dat nɔ go sev una. A de tɛl una se Gɔd ebul fɔ tek pan dɛn ston ya ɛn tɔn dɛn to Ebraam in grampikin pikin dɛm.

⁹ Di aks we fɔ tek kɔt di tik dɛn rut dɔn rɛdi naw; ɔl dɛn tik we nɔ de bia gud tin fɔ it, dɛn go kɔt dɛn ɛn trowe dɛn na faya.”

¹⁰ Di pipul dɛn se, “Wetin wi fɔ du naw?”

¹¹ Jɔn ansa dɛn se, “Ɛnibɔdi we gɛt tu klos, fɔ gi pɔsin we nɔ gɛt, wan. Semwe so, pɔsin we gɛt tin fɔ it, fɔ sheb am wit in kɔmpin we nɔ gɛt.”

¹² Sɔm pan dɛn pipul we de gɛda taks dɛnsɛf kam fɔ mek Jɔn baptayz dɛn. Dɛn aks Jɔn se, “Wetin wi fɔ du, sa, fɔ sho se wi dɔn lɛf fɔ du bad?”

¹³ Jɔn ansa dɛn se, “Una nɔ fɔ tek pas wetin di Roman gɔvmɛnt tɛl una fɔ tek.”

¹⁴ Dɛn soja man dɛnsɛf se, “We wi, wetin wi fɔ du, sa?” Jɔn ansa se, “Una nɔ fɔ fɛt pipul tek dɛn kɔpɔ, una nɔ fɔ lay pan pipul fɔ mek una gɛt mɔni. Una fɔ satisfay wit di mɔni we dɛn pipul we una de wok fɔ de pe una.”

¹⁵ Ɔlman bin de wet fɔ mek di Mɛsaya kam ɛn dɛn bin de wɔnda if Jɔn na di Mɛsaya.

¹⁶ Jɔn se, “A de baptayz wit wata nɔmɔ, bɔt pɔsin we gɛt pawa pas mi de kam. A nɔ fit sɛf fɔ lus in sus. I go baptayz una wit Gɔd in Spirit ɛn wit faya.

¹⁷ I ol tin lɛkɛ lɔŋ fɔk nain an fɔ tek pul di chaf chaf kɔmɔt pan di wit. I go gɛda in wit put am na sto, bɔt i go bɔn di chaf chaf na faya we nɔ de tap fɔ bɔn.”

¹⁸ Jɔn lan dɛn plɛnti ɔda tin ɛn tɛl dɛn bɔt Jizɔs.

¹⁹ Jɔn bin tɔk pan Ɛrɔd we bin de rul Galili bikɔs i bin mared Ɛrodias, we na bin in brɔda wɛf, ɛn fɔ ɔl di plɛnti bad tin dɛn we i bin de du.

²⁰ Pantap ɔl dɛn ɔda bad tin we Ɛrɔd bin de du, i mek dɛn ol Jɔn ɛn put am na jel!

Jɔn Baptayz Jizɔs

²¹ Wɛn Jɔn bin dɔn baptayz ɔl di pipul dɛn dɔn, nain i baptayz Jizɔs insɛf. Wɛn Jizɔs bin de pre, ɛvin opin

²² ɛn Gɔd in Spirit tek dɔv shep kam dɔŋ pan am ɛn dɛn yɛri vɔys we kɔmɔt na ɛvin de tɔk se, “Yu na mi yon Pikin we a lɛk ɛn a gladi fɔ yu!”

Jizɔs In Fambul Dɛn

²³ Jizɔs bin dɔn ol lɛkɛ tati ia so we i bigin fɔ du di wok we Gɔd sɛn am fɔ du na dis wɔl. Pipul bin tink se Josɛf na bin Jizɔs in papa. Josɛf in papa bin nem Ilay, Ilay in papa bin nem Matat,

²⁴ Matat in papa bin nem Livay, Livay in papa bin nem Mɛlkay, Mɛlkay in papa bin nem Jana, Janain papa bin nem Josɛf,

²⁵ Josɛf in papa bin nem Matayas, Matayas in papa bin nem Emɔs, Emɔs in papa bin nem Neɔm, Neɔm in papa bin nem Ɛslay, Ɛslay in papa bin nem Nagay,

²⁶ Nagay in papa bin nem Meat, Meat in papa bin nem Matayas, Matayas in papa bin nem Sɛmɛin, Sɛmɛin in papa bin nem Josɛf, Josɛf in papa bin nem Joda,

²⁷ Joda in papa bin nem Joe nan, Joe nan in papa bin nem Resa, Resa in papa bin nem Zɛrubabɛl, Zɛrubabɛl in papa bin nem Shiɛltiɛl, Shiɛltiɛl in papa bin nem Niray,

²⁸ Niray in papa bin nem Mɛlkay, Mɛlkay in papa bin nem Adi, Adi in papa bin nem Kosam, Kosam in papa bin nem Ɛlmo dam, Ɛlmo dam in papa bin nem Ir,

²⁹ Ir in papa bin nem Jɔshwa, Jɔshwa in papa bin nem Ɛlieza, Ɛlieza in papa bin nem Jorim, Jorim in papa bin nem Matat, Matat in papa bin nem Livay,

³⁰ Livay in papa bin nem Simiɔn, Simiɔn in papa bin nem Juda, Juda in papa bin nem Josɛf, Josɛf in papa bin nem Jonam, Jonam in papa bin nem Ɛla ya kim,

³¹ Ɛla ya kim in papa bin nem Milɛa, Milɛa in papa bin nem Mina, Minain papa bin nem Matata, Matata in papa bin nem Netan, Netan in papa bin nem Devid,

³² Devid in papa bin nem bin Jɛsi, Jɛsi in papa bin nem Obɛd, Obɛd in papa bin nem Boaz, Boaz in papa bin nem Salmɔn, Salmɔn in papa bin nem Nashɔn,

³³ Nashɔn in papa bin nem Ami na dab, Ami na dab in papa bin nem Admin, Admin in papa bin nem Ani, Ani in papa bin nem Ɛzrɔn, Ɛzrɔn in papa bin nem Pɛrɛz, Pɛrɛz in papa bin nem Juda,

³⁴ Juda in papa bin nem Jekɔb, Jekɔb in papa bin nem Ayzak, Ayzak in papa bin nem Ebraam, Ebraam in papa bin nem Tɛra, Tɛra in papa bin nem Naɔ,

³⁵ Naɔ in papa bin nem Serug, Serug in papa bin nem Ru, Ru in papa bin nem Peleg, Peleg in papa bin nem Ibɔ, Ibɔ in papa bin nem Shila,

³⁶ Shila in papa bin nem Kainan, Kainan in papa bin nem Afaksad, Afaksad in papa bin nem Shɛm, Shɛm in papa bin nem Noa, Noa in papa bin nem Lamɛk,

³⁷ Lamɛk in papa bin nem Mɛtyusila, Mɛtyusila in papa bin nem Inɔk, Inɔk in papa bin nem Jerɛd, Jerɛd in papa bin nem Maalalil, Maalalil in papa bin nem Kainan,

³⁸ Kainan in papa bin nem Inɔsh, Inɔsh in papa bin nem Sɛth, Sɛth in papa bin nem Adam, Adam in papa na Gɔd.