Lyuk 22 - Krio Fɔs Oli Baybul

Dɛn Tay Bagin pan Jizɔs

¹ Di tɛm fɔ di Pasova bin dɔn kam klos. Pasova na wan Ju ɔlide we dɛn kin it bred we nɔ gɛt yist.

² Dɛn man dɛn we de mek sakrifays fɔ pipul sin ɛn dɛn Ju Lɔ ticha bin de fɛn we fɔ kil Jizɔs, bɔt dɛn bin de fred di pipul dɛn.

Judas Sɛl Jizɔs

³ Setan go insay Judas we nem Iskariɔt, in at; Iskariɔt na bin wan pan di twɛlv apɔsul dɛn.

⁴ So Judas go ɛŋ ed wit dɛn bigman we de mek sakrifays fɔ pipul sin ɛn dɛn soja man fɔ si aw in kin kech Jizɔs ɛn kɛr am go to dɛn.

⁵ Di bigman dɛn we de mek sakrifays fɔ pipul sin ɛn di soja man dɛn gladi ɛn dɛn prɔmis fɔ gi Judas kɔpɔ.

⁶ Judas gri wit wetin dɛn se, ɛn i bigin fɛn chans fɔ sɛl Jizɔs gi dɛn wɛn di krawd nɔ no.

Jizɔs Dɛn It di Pasova It

⁷ Di tɛm rich pan di Ju ɔlide we dɛn kɔl Pasova we dɛn fɔ kil ship fɔ mɛmba di tɛm we Gɔd bin pul in pipul dɛn kɔmɔt na Ijipt.

⁸ So Jizɔs kɔl Pita ɛn Jɔn, ɛn tɛl dɛn se, “Una go rɛdi di Pasova it fɔ wi, so dat wi kin it am.”

⁹ Dɛn aks Jizɔs se, “Usay yu want wi fɔ mek am, sa?”

¹⁰ Jizɔs tɛl dɛn se, “Wɛn una go insay Jerusɛlɛm, una go mit wan man we tot wan big jɔg wata. Una fala am go insay di os we i de go.

¹¹ Una tɛl di man we gɛt di os se, ‘Wi Ticha se mek wi aks yu dis kwɛshɔn: usay di trenja rum de we mi ɛn mi lanin bɔy dɛn fɔ it di Pasova it?’

¹² Di man go sho una wan big rum na di garɛt wit tebul, chia ɛn ɔltin we una want, na de una fɔ rɛdi wi it.”

¹³ Pita ɛn Jɔn go ɛn mit ɔltin lɛkɛ aw Jizɔs tɛl dɛn ɛn dɛn rɛdi di it fɔ mɛmba di Pasova.

Di It we Wi De It fɔ Mɛmba di Masta

¹⁴ Wɛn di tɛm rich, Jizɔs ɛn in apɔsul dɛn sidɔm fɔ it.

¹⁵ Na de Jizɔs tɛl dɛn se, “A want fɔ it di Pasova it wit una bad bad bifo a bigin sɔfa.

¹⁶ A de tɛl una, a nɔ go it am igen sote di tru Pasova bi, di tɛm we Gɔd go de rul dis wɔl.”

¹⁷ Wɛn dɛn gi Jizɔs drink, i tek di kɔp, i tɛl Gɔd tɛnki, dɛn i se, “Una tek dis kɔp pas am rawnd, mek ɔlman drink.

¹⁸ A de tɛl una se, a nɔ go drink wayn igen sote Gɔd bigin rul dis wɔl.”

¹⁹ Jizɔs tek bred ɛn wɛn i dɔn tɛl Gɔd tɛnki, i kɔt, kɔt am gi in apɔsul dɛn ɛn se, “Dis bred na mi bɔdi [we a dɔn sakrifays fɔseka una. Una fɔ de it am fɔ mɛmba mi.”

²⁰ Semwe so, wɛn dɛn dɔn it di Pasova it dɔn, Jizɔs tek di kɔp ɛn tɛl dɛn se, “Di wayn we de na dis kɔp na di nyu agrimɛnt bitwin Gɔd ɛn mɔtalman we a mek wit mi blɔd wɛn a gri fɔ mek pipul kil mi.]

²¹ “Bɔt di pɔsin we go sɛl mi gi dɛn pipul we want kil mi, de it wit mi naw.

²² Mɔtalman Pikin go day lɛkɛ aw Gɔd dɔn mak, bɔt i go bad fɔ di pɔsin we go mek dɛn kil am!”

²³ Di apɔsul dɛn bigin fɔ aks dɛn kɔmpin se, “Uswan pan wi go du di tin we Jizɔs jɛs tɔk bɔt so?”

Udat Fɔ Bi Edman

²⁴ Di lanin bɔy dɛn mek plaba wɛn dɛn de tray fɔ no uswan pan dɛn fɔ bi edman.

²⁵ Jizɔs tɛl dɛn se, “Dɛn kiŋ na dis wɔl de kɔntrol dɛn yon pipul, dɛn pipul we de na pawa kin se di pipul dɛn fɔ kɔl dɛn ‘Pipul we de ɛp ɔda pipul.’

²⁶ Bɔt nɔto so i fɔ bi wit una, di pɔsin we sinyɔ pas ɔl fɔ bi lɛkɛ di pɔsin we juniɔ pas ɔl ɛn una masta fɔ bi lɛkɛ una savant.

²⁷ If yu gɛt tu pɔsin, wande it, di ɔda pɔsin de sav am, uswan pan dɛn tu impɔtant pas in kɔmpin? Di pɔsin we de it, fɔ tru. Bɔt mi we na una Masta tan lɛkɛ una savant.

²⁸ “Na una de wit mi wɛn tin traŋa fɔ mi, ɛn wɛn a de sɔfa, una nɔ lɛf mi.

²⁹ Lɛkɛ aw mi Papa dɔn gi mi pawa fɔ rul, na so misɛf gi una pawa fɔ rul.

³⁰ Una go it ɛn drink wit mi na di say we a de rul, ɛn we una de rul una go jɔj di twɛlv neshɔn dɛn we de na Izrɛl.

Jizɔs No Se Pita Go Dinay Am

³¹ “Saymɔn, Saymɔn, Setan dɔn gɛt pamishɔn fɔ fana una ɔl lɛkɛ rɛs.

³² Bɔt a dɔn pre fɔ yu Saymɔn mek yu nɔ tap fɔ biliv mi. Wɛn yu dɔn biliv mi traŋa wan, tray mek yu brɔda dɛnsɛf biliv mi traŋa wan.”

³³ Saymɔn ansa Jizɔs se, “Masta, a dɔn rɛdi fɔ go jel wit yu ɛn fɔ day sɛf wit yu.”

³⁴ Jizɔs ansa am se, “A de tɛl yu, Pita, tide fɔl nɔ go kro yet, yu go dɔn tɔk tri tɛm se yu nɔ no mi.”

Una Kɛr Pɔs, Bag, ɛn Sɔd

³⁵ Jizɔs tɛl dɛn se, “Wɛn a bin sɛn una ɛn a se mek una nɔ kɛr pɔs, ɔ bag, ɔ sus, ɛnitɛm bin de we una want ɛnitin, una nɔ gɛt am?” Dɛn ansa am se, “Nɔ, sa.”

³⁶ I tɛl dɛn se, “Wɛn una de go dis tɛm, udat gɛt pɔs, mek i kɛr am go; ɛn if pɔsin gɛt bag, mek insɛf kɛr am go. If pɔsin nɔ gɛt sɔd, mek i sɛl in kot ɛn tek di kɔpɔ bay wan.

³⁷ Di tin we dɛn prɔfɛt bin rayt bɔt mi we se, ‘Pipul dɛn min se insɛf na wikɛd man,’ de kam bi tru. Ɔl wetin dɛn prɔfɛt rayt bɔt mi mɔs bi.”

³⁸ Di lanin bɔy dɛn se, “Masta, luk, wi gɛt tu sɔd na ya, sa.” Jizɔs se, “I du so!”

Jizɔs Go Pre na Mawnt Ɔliv

³⁹ Jizɔs kɔmɔt na di tɔŋ ɛn bigin waka go na Mawnt Ɔliv lɛkɛ aw i kin du ɛn in lanin bɔy dɛn fala am go de.

⁴⁰ Wɛn i rich, Jizɔs tɛl di lanin bɔy dɛn se, “Una pre so dat Setan nɔ go tray una fɔ mek una sin.”

⁴¹ Jizɔs kɔmɔt klos in lanin bɔy dɛn, go lili bit, lɛkɛ if yu tinap nia di lanin bɔy dɛn, yu sɛn ston. Wɛn i rich na di ples, i nil dɔŋ ɛn bigin pre,

⁴² i se, “Papa, if yu gri, duya, nɔ mek a sɔfa dis sɔfa we a fɔ sɔfa, bɔt ɛniwe, nɔ du wetin a want, du wetin yu want.” [

⁴³ Wan enjɛl kɔmɔt na ɛvin kam mit Jizɔs fɔ kɔrej am.

⁴⁴ Jizɔs in at bin ebi, bɔt i pre mɔ wit ɔl in at pas aw i bin pre fɔs; in swɛt kam tan lɛkɛ blɔd, we bin de fɔdɔm plɛnti plɛnti na grɔn.]

⁴⁵ Wɛn i dɔn pre dɔn, i grap na di ples we i bin de pre, i go mit in lanin bɔy dɛn, bɔt i si dɛn de slip bikɔs dɛn at bin ebi bad.

⁴⁶ Nain i aks dɛn se, “Wetin mek una de slip? Una grap ɛn pre so dat Setan nɔ go tray una fɔ mek una sin.”

Dɛn Ol Jizɔs

⁴⁷ Aw Jizɔs de tɔk to in lanin bɔy dɛn, na de plɛnti, plɛnti pipul kam mit am. Wan pan Jizɔs in twɛlv lanin bɔy dɛn we nem Judas nain bin de bifo dɛn. Judas kam klos Jizɔs fɔ kis am.

⁴⁸ Jizɔs aks am se, “Judas, na kis yu go tek sɛl Mɔtalman Pikin?”

⁴⁹ Wɛn Jizɔs in lanin bɔy dɛn si wetin want bi, dɛn aks am se, “Masta, mek wi tek wi sɔd fɛt dɛn?”

⁵⁰ Wan pan dɛn tek in sɔd, kɔt di edman we de mek sakrifays fɔ pipul sin in bɔy in rayt yes kɔmɔt.

⁵¹ Bɔt Jizɔs tɛl am se, “Lɛf! Nɔ du dat igen!” Jizɔs tɔch di say we di yes bin de ɛn mek di yes kam bak.

⁵² Jizɔs aks di bigman dɛn we bin de mek sakrifays fɔ pipul sin, dɛn bigman we bin de gyad Gɔd in Os, ɛn di ɔda Ju bigman dɛn we bin kam fɔ ol am se, “Una kam mit mi na ya wit sɔd ɛn dɛn ɔda tin fɔ tek fɛt fɔ ol mi lɛkɛ se mi na tifman?

⁵³ Ɔl di tɛm we a bin de wit una na Gɔd in Os una nɔ bin ol mi. Bɔt na di tɛm dis we Gɔd gri mek una ol mi ɛn na di tɛm dis we Setan we de rul na dak gɛt pawa.”

Pita Dinay Jizɔs

⁵⁴ Di bigman dɛn we bin de mek sakrifays fɔ pipul sin ɛn di ɔda Ju bigman dɛn mek di pipul dɛn ol Jizɔs ɛn kɛr am go na di edman fɔ ɔl dɛn man we bin de mek sakrifays fɔ pipul sin, in os. Pita fala dɛn go, bɔt i nɔ bin de klos dɛn.

⁵⁵ Wɛn dɛn mek faya na di edman fɔ dɛn man we bin de mek sakrifays fɔ pipul sin in yad, ɔlman go gɛda rawnd di faya; Pita insɛf go nia di faya.

⁵⁶ Wan savant-gyal we bin de wok na di ples si Pita na di faya in layt we bin de shayn pan am, di savant-gyal luk am gud, nain i se, “Dis man ya insɛf bin de wit Jizɔs.”

⁵⁷ Pita dinay, i se, “Ledi, a nɔ sabi da man de sɛf!”

⁵⁸ I nɔ te igen, ɔda pɔsin we si Pita, se, “Yusɛf na wan pan in lanin bɔy dɛn.” Bɔt Pita dinay. I se, “Padi, mi nɔto da man de in lanin bɔy.”

⁵⁹ Afta lɛkɛ wan awa so dɔn pas, nain wan ɔda pɔsin igen se, “A nɔ mis, a shɔ se dis man ya na Jizɔs in lanin bɔy bikɔs na Galili i kɔmɔt.”

⁶⁰ Bɔt Pita ala se, “Padi, na lay yu de lay pan mi, a nɔ sabi wetin yu de tɔk bɔt sɛf.” As Pita de tɔk so, fɔl kro.

⁶¹ Jizɔs tɔn to Pita ɛn luk am. Wantɛm Pita mɛmba wetin Jizɔs bin dɔn tɛl am we i se, “Pita, bifo fɔl kro tide, yu go dɔn tɔk tri tɛm se yu nɔ no mi.”

⁶² Pita kɔmɔt insay di yad go na do; i bɔs kray bita wan.

Dɛn Sojaman Laf Jizɔs

⁶³ Di soja man dɛn we bin ol Jizɔs bin de laf am ɛn bit am.

⁶⁴ Dɛn kɔba in yay, dɛn slap am, dɔn dɛn aks am se, “If yu na prɔfɛt, tɛl wi udat slap yu?”

⁶⁵ Di pipul dɛn fityay Jizɔs ɛn tɛl am plɛnti wɔd fɔ sho se dɛn nɔ rɛspɛkt am.

Dɛn Kɛr Jizɔs Go na di Ju Gran Kot

⁶⁶ Wɛn do klin, dɛn bigman we de mek sakrifays fɔ pipul sin, di ɔda Ju bigman dɛn, ɛn dɛn Ju Lɔ ticha mit fɔ jɔj kes. Di soja man dɛn kɛr Jizɔs go bifo dɛn,

⁶⁷ di pipul dɛn aks am se, “Tɛl wi if yu na di Mɛsaya?” Jizɔs ansa dɛn se, “If a tɛl una, una nɔ go biliv mi,

⁶⁸ ɛn if a aks una kwɛshɔn, una nɔ go ansa mi.

⁶⁹ Bɔt frɔm naw sote go, Mɔtalman Pikin go sidɔm na Gɔd we gɛt pawa, in raytan.”

⁷⁰ Ɔl di pipul dɛn we bin de jɔj aks am se, “Wɛl, yu na Gɔd in Pikin?” Jizɔs ansa dɛn se, “Na so una dɔn tɔk.”

⁷¹ Di pipul dɛn we bin de jɔj na di Ju gran kot bigin fɔ se, “Wetin du wi fɔ lisin to ɔda witnɛs dɛn igen? Wi dɔn yɛri wetin insɛf dɔn tɔk.”