Lyuk 2 - Krio Fɔs Oli Baybul

Jizɔs Bɔn

¹ Dɛn tɛm de, Ɔgɔstɔs we na bin di kiŋ na Rom sɛn tɔk ɔlɔbɔt se ɔlman we de na Roman kɔntri mɔs go mek dɛn rayt dɛn nem dɔŋ na rɛjista.

² Dis na bin di fɔs tɛm we ɔlman fɔ go put dɛn nem dɔŋ na rɛjista. Da tɛm de, na wan man we nem Kwirinyɔs na bin gɔvna na Siria.

³ So ɔlman go na dɛn yon tɔŋ fɔ mek dɛn rayt dɛn nem dɔŋ na rɛjista.

⁴ We Josɛf bin de na Kiŋ Devid in fambul layn, i kɔmɔt Nazarɛt we de na Galili, go na Bɛtliɛm we de na Judia, di ples we Kiŋ Devid bin bɔn.

⁵ Wɛn Josɛf de go, i kɛr Meri we i bin dɔn put stɔp fɔ go wit am fɔ mek insɛf go put in nem dɔŋ na rɛjista. Meri bin gɛt bɛlɛ da tɛm de.

⁶ Wɛn dɛn de na Bɛtliɛm, nain di tɛm rich fɔ mek Meri bɔn.

⁷ Meri bɔn in fɔs pikin we na bin bɔbɔ. I rap di pikin wit plɛnti pisis, ɛn le am pan di gras we dɛn bin kɔt fɔ dɛn ship ɛn dɛn got fɔ it, bikɔs ples nɔ bin de fɔ am insay di os we dɛn bin tap.

Dɛn Shɛpad No Se Jizɔs Dɔn Bɔn

⁸ Na da sem pat de, sɔm shɛpad dɛn bin sidɔm de wach dɛn ship, na bin nɛt.

⁹ Dɛn si enjɛl we Gɔd, we na wi Masta, sɛn, tinap bifo dɛn. Na so ɔl di ples bin de shayn brayt wit Gɔd in layt, so dɛn bigin fred bad bad wan.

¹⁰ Di enjɛl se, “Una nɔ fred! A briŋ gud nyuz fɔ una we go mek pipul gladi bad ɛn ɔl di Izrɛl pipul dɛn go gladi.

¹¹ Tide na da tɔŋ we Devid bin bɔn, dɛn dɔn bɔn Wan Pikin we go sev una. Na di Mɛsaya we na wi Masta.

¹² Di tin we go mek una no am, nain dis: una go mit dɛn rap di bebi wit pisis ɛn dɛn le am pan gras we dɛn kɔt fɔ dɛn ship ɛn got fɔ it.”

¹³ Wantɛm, aw di enjɛl tɔk dɔn so, nain dɛn si plɛnti plɛnti enjɛl de prez Gɔd, dɛn de siŋ se,

¹⁴ “Lɛ ɔlman prez ɛn ɔna Gɔd we de ɔp ɔp na ɛvin, mek ɔl mɔtalman we mek Gɔd gladi, gɛt kol at!”

¹⁵ Wɛn di enjɛl dɛn go bak na ɛvin, nain dɛn shɛpad bigin tɔk to dɛn kɔmpin, dɛn se, “Una lɛ wi go Bɛtliɛm go si dis tin we dɔn bi, we Gɔd dɔn mek wi no bɔt.”

¹⁶ So dɛn waka kwik kwik go Bɛtliɛm. Dɛn mit Meri ɛn Josɛf ɛn dɛn si di lili pikin we ledɔm na di gras we dɛn put fɔ dɛn ship ɛn got.

¹⁷ Wɛn dɛn si di pikin, dɛn tɔk ɔl wetin di enjɛl bin dɔn tɛl dɛn bɔt am.

¹⁸ Ɔlman we yɛri wetin dɛn tɔk, wɔnda.

¹⁹ Bɔt Meri nɔ se natin, i kip ɔl dɛn tin ya nain at ɛn i kin de tink bɔt dɛn ɔltɛm.

²⁰ Wɛn di shɛpad dɛn bin de tɔn bak, dɛn bin de tɛl Gɔd tɛnki, dɛn bin de siŋ ɛn prez am fɔ ɔl wetin dɛn bin jɛs yɛri ɛn si. Ɔltin bin bi jɛs lɛkɛ aw di enjɛl bin dɔn tɛl dɛn.

Dɛn Nem Jizɔs

²¹ Di de we mek et afta Jizɔs bɔn, dɛn sakɔmsayz am, ɛn nem am Jizɔs. Na bin di nem dat we di enjɛl bin gi am bifo in mama gɛt in bɛlɛ.

Dɛn Kɛr Jizɔs Go na Gɔd In Os

²² Wɛn di tɛm rich fɔ mek Josɛf ɛn Meri go na Gɔd in Os fɔ du dɛn tin we go mek dɛn klin na Gɔd in yay lɛkɛ aw di Lɔ we Gɔd gi Mozis se, dɛn kɛr di pikin go na Gɔd in Os na Jerusɛlɛm ɛn aks Gɔd fɔ blɛs am.

²³ Na so Gɔd in lɔ se, “Ɔl fɔs bɔy pikin fɔ du Gɔd wok.”

²⁴ Pantap dat, Josɛf ɛn Meri kɛr tu dɔv ɔ tu pijin pikin go gi di man we de mek sakrifays fɔ pipul sin fɔ mek sakrifays to Gɔd, bikɔs Gɔd in lɔ tɔk igen se fɔ sakrifays tu dɔv ɔ tu pijin pikin.

²⁵ Da tɛm de, wan man bin de na Jerusɛlɛm we bin nem Simiɔn. Dis man ya bin lɛk Gɔd ɛn i bin de waka tret ɛn de du ɔl wetin Gɔd want. I bin de wet fɔ di tɛm we Gɔd go sɔri fɔ di Izrɛl pipul dɛn ɛn pul dɛn kɔmɔt pan waala. Gɔd in Spirit bin de insay am,

²⁶ ɛn i bin dɔn tɛl am se i nɔ go day sote i si di Mɛsaya we Gɔd we na wi Masta go sɛn.

²⁷ Da sem de de, di Spirit tɛl Simiɔn mek i grap ɛn go tret na Gɔd in Os. I nɔ tu te, Meri ɛn Josɛf kɛr Jizɔs go insay Gɔd in Os fɔ du dɛn tin we Gɔd in lɔ se.

²⁸ Simiɔn tot di pikin ɛn bigin prez ɛn tɛl Gɔd tɛnki. I se:

²⁹ “Gɔd, we na wi Masta, yu dɔn du wetin yu bin prɔmis mi, we na yu savant, so a kin day naw wit kol at.

³⁰ A dɔn si di pɔsin insɛf we go sev ɔlman na wɔl.

³¹ Yu dɔn pik am ɛn mek ɔlman si am.

³² Nain na di layt we go mek dɛn wan we nɔ no yu na dis wɔl, no yu; i go mek yu pipul dɛn na Izrɛl gɛt plɛnti ɔna.”

³³ Ɔl wetin Simiɔn tɔk bɔt Jizɔs mek in mama ɛn in papa dɛn wɔnda.

³⁴ Simiɔn blɛs dɛn tri, dɔn i tɔk to Meri, i se, “Gɔd dɔn pik dis pikin ya ɛn sɛn am kam, ɛn di kam we i kam go mek plɛnti Izrɛl pipul lɛf fɔ biliv Gɔd ɛn mek plɛnti biliv am. Gɔd sɛn Jizɔs fɔ sho wi wetin Gɔd want, bɔt plɛnti pipul go tɔk se dɛn nɔ de fɔ am,

³⁵ ɛn ɔda pipul go no wetin dɛn pipul de bin de tink we nɔbɔdi nɔ bin no. Meri, yusɛf at go blid wɛn ɔl dɛn tin ya bi.”

^36-37 Wan uman prɔfɛt bin de we in papa na bin Fanyuɛl, na bin wan pan Asha in grampikin pikin dɛm; Ana na bin ol ol uman we in man bin dɔn day. Frɔm di tɛm we i mared, in ɛn in man de sɛvin ia nɔmɔ bifo in man day. Frɔm di tɛm we in man day, i de te i ol eti-fo. De ɛn nɛt Ana bin de na Gɔd in Os de pre ɛn fast.

³⁸ Insɛf kam na Gɔd in Os di sem tɛm we dɛn briŋ Jizɔs to Gɔd. I tɛl Gɔd tɛnki. I tɔk bɔt di Pikin to ɔl dɛn wan we bin de wet fɔ mek Gɔd fri di pipul dɛn na Jerusɛlɛm.

Dɛn Tɔn Bak Go Nazarɛt

³⁹ Wɛn Meri ɛn Josɛf dɔn du ɔltin we Gɔd in lɔ se, dɛn tɔn bak go na dɛn tɔŋ, dat na Nazarɛt we de na Galili.

⁴⁰ Wɛn di pikin dɔn big ɛn i dɔn ebul tink, i bin gɛt plɛnti sɛns ɛn Gɔd bin blɛs am.

Jizɔs De insay Gɔd In Os

⁴¹ Ɛvri ia Jizɔs in mama ɛn papa kin go na Jerusɛlɛm wɛn di tɛm rich fɔ wan Ju ɔlide we nem Pasova.

⁴² Wɛn Jizɔs bin dɔn ol twɛlv ia, i fala in mama ɛn papa dɛn go Jerusɛlɛm fɔ di Pasova lɛkɛ aw dɛn kin du.

⁴³ Wɛn di ɔlide dɔn, Meri ɛn Josɛf bin de tɔn bak go Nazarɛt, bɔt Jizɔs nɔ bin kɔmɔt Jerusɛlɛm yet. In mama ɛn papa nɔ bin no.

⁴⁴ Dɛn bin min se Jizɔs de wit di ɔda pipul dɛn. Wɛn dɛn dɔn waka ol de, dɛn nɔ si am, dɛn bigin luk fɔ am to dɛn fambul ɛn dɛn pipul we dɛn no.

⁴⁵ Bɔt dɛn nɔ si am; so dɛn tɔn bak go Jerusɛlɛm go luk fɔ am.

⁴⁶ Di de we mek tri nain dɛn rich Jerusɛlɛm. Dɛn mit Jizɔs sidɔm na Gɔd in Os midul dɛn big Ju Lɔ ticha. Jizɔs bin de lisin wetin dɛn de tɔk ɛn insɛf bin de aks dɛn bɔt plɛnti tin.

⁴⁷ Di we we i bin de ansa kwɛshɔn ɛn di sɛns we i bin gɛt bin mek ɔl di pipul dɛn wɔnda.

⁴⁸ Wɛn in mama ɛn in papa si am, dɛn wɔnda. Na de in mama se, “Mi pikin, wetin mek yu du wi so? Mi ɛn yu papa bin de luk fɔ yu ɛn wi bin de wɔri we wi nɔ si yu.”

⁴⁹ Jizɔs se, “Wetin mek una bin de luk fɔ mi? Una nɔ no se a fɔ de na mi Papa in Os?”

⁵⁰ Bɔt dɛn nɔ bin ɔndastand wetin i min.

⁵¹ Jizɔs go Nazarɛt bak wit in mama ɛn papa ɛn i yɛri dɛn wɔd. In mama kip ɔl dɛn tin ya we bi nain at.

⁵² As Jizɔs de big, na so i bin de gɛt mɔ ɛn mɔ sɛns. Gɔd bin lɛk am; ɛn mɔtalman bin lɛk am.