Lyuk 17 - Krio Fɔs Oli Baybul

Padin Am

¹ Jizɔs tɔk to in lanin bɔy dɛn. I se, “Na tru se tin dɛn mɔs bi we go mek pipul want du bad, bɔt waala go mit di pɔsin we go mek dɛn bi.

² I bin go bɛtɛ fɔ da pɔsin de mek dɛn ɛŋ big ston nain nɛk ɛn trowe am na big wata pas fɔ mek i mek dɛn pipul we jɛs bigin fɔ biliv Gɔd du bad.

³ So una tek tɛm aw una de du. “If yu brɔda du yu bad, yu fɔ tɔk pan am; if i sɔri fɔ di bad we i du, yu fɔ padin am.

⁴ If i du yu bad sɛvin tɛm wande, ɛn i kam mit yu se, ‘A beg, a sɔri fɔ wetin a du,’ ɛnitɛm we i du yu bad, yu fɔ padin am.”

Fɔ Biliv Gɛt Pawa

⁵ Jizɔs in apɔsul dɛn tɛl am se, “Masta, duya, ɛp wi, mek wi go biliv Gɔd gud gud.”

⁶ Jizɔs ansa dɛn se, “If una biliv, ilɛk di biliv we una biliv tan lɛkɛ wan lili sid lɛkɛ mɔstad sid, una kin tɛl ɛni big tik se, ‘Kɔmɔt na ya go tinap na wata’ ɛn i go muf go na di wata.

Di Lebra in Wok

⁷ “Ɛni wan pan una we gɛt lebra we de dig fɔ am nain fam ɔ we de mɛn ship fɔ am, go jɛs go mit di lebra wɛn i kɔmɔt wok ɛn tɛl am se, ‘Kam it wantɛm?’

⁸ I go tɛl di lebra se, ‘Go kuk fɔ mi, wɛr di klos we yu fɔ wɛr fɔ sav, put di it na tebul ɛn wet sote a dɔn it dɔn bifo yusɛf go it.’

⁹ Di masta fɔ tɛl di lebra tɛnki bikɔs i du wetin i tɛl am fɔ du?

¹⁰ Semwe so, wɛn una dɔn du ɔl wetin una masta tɛl una fɔ du, una fɔ se, ‘Wi nɔto bɛtɛ wokman; wi jɛs du wetin wi bin gɛt fɔ du nɔmɔ.’”

Jizɔs Mɛn Tɛn Pipul we Gɛt Bad Sik na dɛn Skin

¹¹ Wɛn Jizɔs bin de go na Jerusɛlɛm, i pas na di sho midul Sameria ɛn Galili.

¹² As i rich na wan vilej, i mit tɛn pipul we gɛt bad sik na dɛn skin. Dɛn tinap fawe,

¹³ dɛn ala se, “Masta! Jizɔs! Duya, sɔri fɔ wi!”

¹⁴ Wɛn Jizɔs si dɛn, i se, “Una go to dɛn man we de mek sakrifays fɔ pipul sin mek dɛn luk una.” Aw dɛn de na rod de go, nain dɛn ɔl wɛl.

¹⁵ Wan pan dɛn, wɛn i si se in dɔn wɛl, i tɔn bak go mit Jizɔs. I bin de ala big wande prez Gɔd ɛn tɛl am tɛnki.

¹⁶ Wɛn i mit Jizɔs, i fɔdɔm na Jizɔs in fut ɛn tɛl am plɛnti tɛnki. Da man de na bin man we kɔmɔt Sameria.

¹⁷ Jizɔs se, “Nɔto tɛn pipul a mɛn, we di ɔda nayn?

¹⁸ Nɔbɔdi nɔ kam bak fɔ kam tɛl Gɔd tɛnki pas dis trenja in wangren nɔmɔ?”

¹⁹ Jizɔs tɛl di man se, “Grap, go na yu os; bikɔs yu biliv, yu dɔn wɛl.”

Wɛn Gɔd Go Rul di Wɔl

²⁰ Di Faresi dɛn aks Jizɔs ustɛm Gɔd go kam fɔ rul di wɔl. Jizɔs ansa dɛn se, “Wɛn Gɔd de kam fɔ rul di wɔl una nɔ go si sayn fɔ sho una se Gɔd de kam fɔ rul di wɔl.

²¹ Ɛn pipul nɔ go se, ‘Na ya Gɔd de rul’ ɔ ‘Na yanda i de rul;’ bikɔs naw, naw Gɔd de rul insay una.”

²² Jizɔs tɛl in lanin bɔy dɛn se, “Di tɛm go kam we una go want si Mɔtalman Pikin bad bad, wande sɛf wɛn i kam bak na wɔl, bɔt una nɔ go si am.

²³ Sɔm pipul go tɛl una se, ‘Luk Mɔtalman Pikin na ya!’ Ɔda pipul go se ‘Luk Mɔtalman Pikin yanda!’ Una nɔ fɔ fala dɛn go de.

²⁴ Di tɛm we Mɔtalman Pikin go kam bak na wɔl, go kam kwik wan lɛkɛ wɛn laytin kin flash na di klawd frɔm wan pat to di ɔda pat.

²⁵ Bɔt bifo ɔl dis bi, Mɔtalman Pikin fɔ sɔfa plɛnti tin ɛn dɛn tide pipul nɔ go want si am.

²⁶ Lɛkɛ aw i bin bi wɛn Noa bin de, na so i go bi wɛn Mɔtalman Pikin go kam bak.

²⁷ Da tɛm de pipul bin de it, drink, ɛn mared. Dɛn bin de pan dis kayn layf sote Noa go insay di bot we i bil fɔ di ren. Big big ren bin fɔdɔm ɛn ɔlman day na di plɛnti plɛnti wata we kɔba di grɔn.

²⁸ Semwe so, di tɛm we Lɔt bin de, pipul bin de it ɛn drink, dɛn bin de bay ɛn sɛl, ɛn dɛn bin de mek fam ɛn bil os.

²⁹ Bɔt di de we Lɔt kɔmɔt na Sɔdɔm, Gɔd mek faya ɛn ston we de bɔn lɛkɛ faya fɔdɔm pan Sɔdɔm lɛkɛ ren ɛn kil ɔl di pipul dɛn we bin lib de.

³⁰ Na so i go bi di de we Mɔtalman Pikin go kam bak na wɔl.

³¹ “Da de de, ɛnibɔdi we de pantap ruf nɔ fɔ kam dɔŋ ɛn go insay in os fɔ gɛda in prɔpati. Semwe so, ɛnibɔdi we de na fam, nɔ fɔ go bak nain os.

³² Una mɛmba wetin bin bi to Lɔt in wɛf.

³³ Ɛnibɔdi we de tray fɔ sev in layf, go lɔs am; bɔt ɛnibɔdi we lɔs in layf fɔseka mi, go gɛt di tru layf.

³⁴ A de tɛl una se, da de we Mɔtalman Pikin go kam bak, tu pipul go de slip na wan bed; enjɛl go kam tek wan go ɛn lɛf di ɔda wan.

³⁵ Tu uman dɛn go de bit rɛs na wan mataodo; enjɛl go kam tek wan pan dɛn tu ɛn lɛf di ɔda wan. [

³⁶ Tu man dɛn go de wok na fam; enjɛl go tek wan go ɛn lɛf di ɔda wan.]”

³⁷ Jizɔs in lanin bɔy dɛn aks am se, “Masta, usay dɛn tin ya go bi?” Jizɔs ansa dɛn se, “Ɛni say we bif we dɔn day de, na de yuba dɛn de go gɛda.”