Lyuk 13 - Krio Fɔs Oli Baybul

Una Lɛf Fɔ Du Bad

¹ Da sem tɛm de, sɔm pipul we bin de wit Jizɔs tɛl am bɔt dɛn pipul we kɔmɔt Galili we Paylet kil wɛn dɛn de mek sakrifays to Gɔd.

² Jizɔs ansa dɛn se, “Una mɛmba se dɛn pipul we Paylet kil day so bikɔs dɛn bin sin pas ɔlman na Galili?

³ Nɔto so i bi; a de tɛl una se if una nɔ lɛf fɔ du bad, unasɛf go day lɛkɛ dɛn.

⁴ Ɔ igen una mɛmba se dɛn etin pipul we da tawa na Siloam bin fɔdɔm pan, we day, bin sin pas ɔlman na Jerusɛlɛm we mek dɛn day so?

⁵ Nɔto so i bi; a de tɛl una se if una nɔ lɛf fɔ du bad, unasɛf go day lɛkɛ dɛn.”

Da Tik we Nɔ Bia Natin

⁶ Jizɔs pul wan parebul we se: “Wan man bin plant fig tik nain gadin. Wɛn di man go fɔ pik di fig dɛn natin nɔ bin de na di tik.

⁷ Di man tɛl di man we de luk di tik dɛn se, ‘Dis ia mek tri we a de kam fɔ pik fig, bɔt a nɔ de gɛt natin fɔ pik. Kɔt dis tik! Wetin mek i de mek di grɔn wes?’

⁸ Di man we de luk di tik dɛn se, ‘Masta, lɛf di tik fɔs dis ia. A go dig rawnd am ɛn put maniɔ pan di dɔti.

⁹ If i bia nɛks ia, i go gud fɔ wi, bɔt if i nɔ bia, da tɛm de wi go kɔt am.’”

Jizɔs Mɛn Wan Sik Uman

¹⁰ Wande fɔ pre ɛn blo, Jizɔs bin de lan di pipul dɛn na wan Ju mitin os.

¹¹ Wan uman bin de na di Ju mitin os we bin gɛt dɛbul insay am we mek i sik fɔ etin ia. Di sik bin mek di uman bɛn ɛn i nɔ bin ebul tinap tret igen.

¹² Wɛn Jizɔs si di uman, i kɔl am ɛn tɛl am se, “Uman, frɔm tide yu dɔn wɛl!”

¹³ Jizɔs tɔch di uman ɛn wantɛm wantɛm so di uman in bak tret ɛn i bigin tɛl Gɔd tɛnki ɛn prez am.

¹⁴ Bɔt di bigman na di Ju mitin os bin vɛks bikɔs Jizɔs mɛn di sik uman di de we fɔ pre ɛn blo, so i tɛl di pipul dɛn we bin go fɔ pre se, “Na siks de pɔsin fɔ wok, so una fɔ kam wan pan dɛn de ya fɔ mek Jizɔs mɛn una; bɔt una nɔ fɔ kam di de fɔ pre ɛn blo fɔ mek i mɛn una.”

¹⁵ Jizɔs ansa am se, “Una dɛn ipokrit pipul ya! Una nɔ kin pul una ship ɛn kaw dɛn na do di de fɔ pre ɛn blo ɛn kɛr dɛn go mek dɛn go drink wata?

¹⁶ Dis uman we Setan dɔn tay dis etin ia, we na wan pan Ebraam in grampikin pikin dɛm, a nɔ fɔ mɛn am di de fɔ pre ɛn blo?”

¹⁷ Jɛs Jizɔs tɔk dis wɔd ya, di pipul dɛn we bin go pre gladi fɔ ɔl wetin Jizɔs du, ɛn dɛn wan we nɔ bin lɛk Jizɔs, shem.

Parebul bɔt di Mɔstad Sid

¹⁸ Wɛn dat dɔn, Jizɔs se, “Aw Gɔd in rul tan ɛn wetin a go tek fɔ sho aw i tan?

¹⁹ Gɔd in rul tan lɛkɛ mɔstad sid we pɔsin plant nain gadin, di sid bɔs fayn ɛn gro te i tɔn to tik, dɔn plɛnti bɔd kam mek nɛst pan di an dɛn.”

Parebul bɔt di Yist

²⁰ Jizɔs aks igen se, “Wetin a go tek fɔ sho aw Gɔd in rul tan?

²¹ I tan lɛkɛ we uman tek smɔl yist ɛn miks am wit tri kɔp flawa sote di do fɔ mek bred rayz.”

Da Smɔl Do

²² Wɛn Jizɔs de go Jerusɛlɛm, i bin de lan di pipul dɛn na ɔl dɛn tɔŋ ɛn dɛn vilej we i bin de pas.

²³ Sɔmbɔdi aks Jizɔs se, “Masta, dɛn pipul we Gɔd go sev nɔ go plɛnti?” Jizɔs tɛl di pipul dɛn we bin de wit am se,

²⁴ “Una tray mek una go pas na di do we smɔl fɔ pas ɛn go insay di ples we Gɔd de rul. A de tɛl una se, plɛnti pipul go tray fɔ go insay de, bɔt dɛn nɔ go ebul.

²⁵ Wɛn di pɔsin we gɛt di ples dɔn grap ɛn lɔk di do, una go tinap na do de nak ɛn se, ‘Masta, opin fɔ wi, sa!’ Di masta go ansa una se, ‘A nɔ no usay una kɔmɔt.’

²⁶ Dɛn una go se, ‘Masta, na wi ɔl bin de it wan ples ɛn yu bin de lan pipul na trit na wi tɔŋ.’

²⁷ Di masta go se, ‘A de tɛl una se a nɔ no usay una kɔmɔt, una go, una kɔmɔt to mi; a nɔ no una, una dɛn wikɛd pipul ya!’

²⁸ Una go si Ebraam, Ayzak, Jekɔb ɛn ɔl dɛn prɔfɛt insay di ples we Gɔd de rul, bɔt una go kray bita wan ɛn bɛt una tɔŋ bikɔs dɛn lɔk una na do.

²⁹ Pipul dɛn go kɔmɔt ɔlsay na wɔl ɛn kam sidɔm fɔ it na di ples we Gɔd de rul.

³⁰ Sɔm pipul we de biɛn naw go de bifo ɛn sɔm pipul we de bifo naw go de biɛn.”

Di Lɛk we Jizɔs Lɛk Jerusɛlɛm

³¹ Sɔm Faresi dɛn kam tɔk to Jizɔs, dɛn se, “Duya, sa, kɔmɔt na ya naw bikɔs Ɛrɔd dɔn mekɔp fɔ kil yu.”

³² Jizɔs se, “Una go tɛl da man de we de mek pipul ful se, ‘A de drɛb dɛbul ɛn mɛn sik pipul fɔ shɔt tɛm fɔs, wɛn da tɛm de dɔn pas, a go dɔn mi wok.’

³³ Bɔt a de tɛl una se, a mɔs du mi wok dis shɔt tɛm fɔs ɛn wɛn da tɛm de dɔn pas sɛf, bikɔs prɔfɛt nɔ fɔ day nɔ ɔda say pas Jerusɛlɛm!

³⁴ “Jerusɛlɛm, Jerusɛlɛm; una dɔn kil dɛn prɔfɛt ɛn una dɔn ston dɛn wan we Gɔd sɛn to una! Ɔmɔs tɛm a dɔn want gɛda una pikin dɛn lɛkɛ aw kombra fɔl de gɛda in pikin dɛn ɔnda in fɛda dɛn, bɔt una nɔ gri mek a du dat!

³⁵ Mek a tɛl una, Gɔd dɔn lɛf di ples we una de, gi una. Una nɔ go si mi igen sote unasɛf se, ‘Gɔd blɛs di pɔsin we i dɔn sɛn fɔ kam tinap fɔ am!’”