Lyuk 11 - Krio Fɔs Oli Baybul

Jizɔs Lan dɛn Aw fɔ Pre

¹ Wande Jizɔs bin de pre na wan ples; wɛn i dɔn pre dɔn, wan pan in lanin bɔy dɛn kam mit am ɛn se, “Masta, lan wi aw fɔ pre lɛkɛ aw Jɔn lan in lanin bɔy dɛn.”

² Jizɔs se, “Wɛn una want pre, una fɔ se: ‘Papa Gɔd, na yu wangren na Gɔd, mek ɔlman pre to yu ɛn ɔna yu. Wi de pre mek yu rul wi.

³ Gi wi wetin wi fɔ it ɛvri de.

⁴ Padin wi fɔ di bad tin dɛn wi de du, bikɔs wisɛf de padin dɛn wan we de du wi bad. Mek wi nɔ lɛf fɔ biliv yu ɛnitɛm we Setan tray wi.’”

⁵ Jizɔs se, “If ɛni wan pan una go mit in padi midul nɛt ɛn tɛl am se, ‘Padi, duya, lɛn mi tri bred.

⁶ A gɛt trenja ɛn a nɔ gɛt natin fɔ gi am.’

⁷ Dɔn di padi ansa se, ‘Bo, nɔ ambɔg mi ya, a dɔn lɔk mi do ɛn a dɔn ledɔm. Mi pikin dɛn ɔl de slip. A nɔ ebul grap naw fɔ lɛn yu wetin yu want.’

⁸ A shɔ se if i nɔ grap ɛn gi di pɔsin di bred bikɔs dɛn ɔl tu na padi, i go grap ɛn gi am ɔmɔs i want bikɔs i de beg beg am.”

⁹ Jizɔs se, “Una aks Gɔd fɔ ɛnitin, i go gi una. Una luk gud, una go fɛn wetin una de luk fɔ. Una kɔnk na do, Gɔd go opin am fɔ una.

¹⁰ Ɛnibɔdi we aks, go gɛt wetin i want. Ɛnibɔdi we luk gud, go gɛt wetin i de luk fɔ. Ɛnibɔdi we kɔnk na do, Gɔd go opin am fɔ am.

¹¹ Una dɛn papa, if una pikin aks una fɔ fish, una go tek snek gi am?

¹² If una pikin aks una fɔ eg, una go gi am kɔktel?

¹³ If una we bad so sabi fɔ gi una pikin dɛn gud tin, Gɔd we na una Papa we de na ɛvin go gi una gud tin pas dat; i go gi dɛn wan we aks am in Spirit!”

Jizɔs ɔ Biɛlzibɔb

¹⁴ Jizɔs bin de drɛb di dɛbul we mek wan man mumu kɔmɔt insay di man. As di dɛbul kɔmɔt insay di man so, di man bigin tɔk; dat mek di pipul dɛn ɔl wɔnda.

¹⁵ Sɔm pipul se, “Na Biɛlzibɔb, dat na dɛn dɛbul dɛn edman, nain de gi am di pawa fɔ drɛb dɛbul.”

¹⁶ Sɔm ɔda pipul kam fɔ tray Jizɔs; dɛn tɛl am fɔ mek i du wɔndaful wok we go sho se in na di Mɛsaya, fɔ tru.

¹⁷ We Jizɔs no wetin di pipul dɛn de tink we mek dɛn aks am fɔ du wɔndaful wok, i tɛl dɛn se, “If pipul de na wan kɔntri, dɛn de fɛt dɛnsɛf, da kɔntri de nɔ go las. Semwe so, if fambul dɛn de fɛt dɛnsɛf, da fambul de go skata.

¹⁸ If Setan in wokman dɛn de fɛt dɛnsɛf, aw Setan in rul go go bifo? Una dɔn tɛl mi se na Biɛlzibɔb a de tek drɛb dɛbul.

¹⁹ If na Biɛlzibɔb a de tek drɛb dɛbul, wɛl, wetin una yon pipul dɛn de tek drɛb dɛbul? Na wetin una pipul de du de sho se una nɔ rayt.

²⁰ Bɔt if na Gɔd in pawa a de tek drɛb dɛbul, dat sho se fɔ tru Gɔd in rul dɔn kam to una.

²¹ “If pɔsin we gɛt trɛnk ɛn ɔltin we fɔ tek fɛt de gyad in os, nɔbɔdi nɔ go tif in tin dɛn.

²² Bɔt if pɔsin we gɛt trɛnk pas am go fɛt am ɛn bit am, di wan we bit am go tek ɔltin we di wan we gɛt di os bin abop pan fɔ tek fɛt, ɛn i go tif ɔl in tin dɛn ɛn kɛr dɛn go sheb dɛn wit in kɔmpin tifman dɛn.

²³ “Ɛnibɔdi we nɔ de fɔ mi de fɛt mi, ɛn ɛnibɔdi we nɔ de ɛp mi gɛda pipul fɔ mek dɛn kam to mi, na skata i de skata dɛn.

Di Dɛbul Tɔn Bak

²⁴ “Wɛn dɛbul dɔn kɔmɔt insay pɔsin, i kin de pas pas na dɛn dray ples fɔ fɛn ples fɔ blo. If i nɔ ebul fɛn ples fɔ blo, i go se, ‘A go tɔn bak go tap insay di os we a bin de.’

²⁵ Wɛn di dɛbul kam bak, i nɔ go mit natin insay de, i go mit di ples klin ɛn fayn.

²⁶ I go go bak go briŋ ɔda sɛvin dɛbul we bad pas insɛf. Dɛn ɔl go tap insay de ɛn di man in kɔndishɔn go kam bad naw pas aw i bin tan fɔs.”

Blɛsin

²⁷ Wɛn Jizɔs dɔn tɔk dɔn, wan uman we bin de na di krawd se, “Di uman we bɔn yu ɛn mɛn yu gɛt blɛsin!”

²⁸ Jizɔs se, “Yɛs, dat na tru, bɔt mɔ blɛsin de fɔ di pipul dɛn we yɛri Gɔd in wɔd ɛn du wetin Gɔd tɛl dɛn.”

Dɛn Aks Jizɔs Fɔ Du Wɔndaful Wok

²⁹ Wɛn di pipul dɛn dɔn plɛnti, Jizɔs bigin tɔk to dɛn. I se, “Dɛn tide pipul ya bad! Dɛn de aks mi fɔ du wɔndaful wok, bɔt a nɔ go du am. Dɛn nɔ go si ɛni wɔndaful tin pas di wan we bin dɔn bi to prɔfɛt Jona.

³⁰ Lɛkɛ aw Jona na bin sayn fɔ dɛn pipul na Ninivɛ, na so Mɔtalman Pikin go bi sayn fɔ dɛn tide pipul ya.

³¹ Wɛn Gɔd go jɔj di wɔl, da kwin we de rul na Shiba go grap ɛn tɔk se dɛn tide pipul ya dɔn du bad; i kɔmɔt fa fawe fɔ kam yɛri di sɛns we Sɔlɔmɔn de tɔk wit; ɛn pɔsin we pas Sɔlɔmɔn dɔn kam.

³² Di de we Gɔd go jɔj ɔlman na wɔl, dɛn pipul we bin de na Ninivɛ di tɛm we Jona bin de, go grap ɛn tɛl una se, una dɔn du bad; bikɔs dɛn bin lɛf fɔ du bad wɛn prɔfɛt Jona tɛl dɛn Gɔd in wɔd; ɛn a de tɛl una se, pɔsin de na ya we pas Jona.

Una Yay Na Lamp

³³ “Pɔsin nɔ de layt lamp put am na kɔna ɔ kɔba am wit blay, i de put am na ples we ɔlman na di os go si layt.

³⁴ Yu yay tan lɛkɛ lamp na yu bɔdi. If yu gɛt gud yay, ɔl yu bɔdi go gɛt layt, bɔt if yu yay nɔ gud, ɔl yu bɔdi go de na dak.

³⁵ Na dat mek yu fɔ tek tɛm mek di layt we de pan yu nɔ ɔt.

³⁶ If ɔl yu bɔdi gɛt layt ɛn nɔ pat pan am nɔ dak, di layt we de pan yu go tan lɛkɛ lamp we brayt we de mek pipul si.”

Jizɔs Wɔn Pipul bɔt dɛn Ju Lɔ Ticha ɛn dɛn Faresi

³⁷ Wɛn Jizɔs dɔn tɔk dɔn, wan pan dɛn man we dɛn kɔl Faresi aks Jizɔs fɔ go it to am; Jizɔs fala am go.

³⁸ Di Faresi wɔnda fɔ si se Jizɔs nɔ was in an bifo i bigin it.

³⁹ Jizɔs tɛl am se, “Una dɛn Faresi de was kɔp ɛn plet bak klin, bɔt na soso wikɛd tin de insay una at ɛn una bigyay.

⁴⁰ Una nɔ gɛt sɛns! Nɔto di sem Gɔd we mek una bɔdi mek una at?

⁴¹ Una fɔ ɛp dɛn po pipul wit ɔl una at, dɛn ɔltin go klin fɔ una.

⁴² “Bɔt una dɛn Faresi, i go bad fɔ una! Una de gi wan pat pan tɛn pat pan ɔltin we una gɛt, ivin dɛn tin we una plant, bɔt una nɔ de du wetin rayt to pipul ɛn una nɔ lɛk Gɔd. Na dɛn tin ya una bin fɔ de du wit di ɔda tin dɛn we una de du.

⁴³ “Una dɛn Faresi, i go bad fɔ una! Wɛn una de na di Ju mitin os, una kin lɛk fɔ sidɔm na dɛn bɛnch we de bifo, ɛn una lɛk fɔ mek dɛn tɛl una adu na dɛn ples we pipul de plɛnti.

⁴⁴ I go bad fɔ una dɛn Faresi! Una tan lɛkɛ grev we pipul nɔ de si so dɛn de waka pan am ɛn dɛn nɔ no sɛf se na grev dɛn de mas.”

⁴⁵ Wan pan di Ju Lɔ ticha dɛn ansa Jizɔs se, “Masta, we yu tɔk so, yu dɔn blem wisɛf!”

⁴⁶ Jizɔs se, “I go bad fɔ una dɛn Ju Lɔ ticha, bikɔs una de gi ɔda pipul ebi lod fɔ tot bɔt una nɔ de put wan fiŋa sɛf fɔ ɛp dɛn tot di lod.

⁴⁷ I go bad fɔ una! Na una dɔn bil sɔntin pan dɛn ston grev fɔ mɛmba dɛn prɔfɛt we una grampapa papa dɛn bin kil.

⁴⁸ Ɛn una sho se una gri fɔ wetin una grampapa papa dɛn bin du we dɛn kil di prɔfɛt dɛn, we una dɔn bil sɔntin pan dɛn ston grev fɔ mɛmba dɛn.

⁴⁹ Na dat mek di wan we dɛn kɔl ‘Gɔd in Sɛns’ se, ‘A go sɛn mi prɔfɛt dɛn ɛn mi mɛsenja dɛn to dɛn, bɔt dɛn go kil sɔm ɛn dɛn go mek di ɔda wan dɛn sɔfa.’

⁵⁰ So una dɛn tide pipul ya go sɔfa fɔ ɔl dɛn prɔfɛt ya we dɛn dɔn kil frɔm we Gɔd mek di wɔl sote tide.

⁵¹ Una dɛn tide pipul ya go sɔfa fɔ di pipul dɛn we dɛn kil frɔm Ebɛl sote rich Zakaraya we day midul Gɔd in Os ɛn di ples we dɛn de bɔn sakrifays. Fɔ tru, a de tɛl una dɛn tide pipul ya, se una go pe fɔ di prɔfɛt dɛn blɔd!

⁵² “I go bad fɔ una dɛn Ju Lɔ ticha, bikɔs una dɔn lɔk di ples we pipul fɔ go fɔ lan bɔt Gɔd ɛn kɛr di ki go. Una nɔ de go insay ɛn una nɔ gri fɔ mek ɔda pipul go insay.”

⁵³ Wɛn Jizɔs dɔn tɔk dɛn tin ya, dɛn Ju Lɔ ticha ɛn dɛn Faresi bigin fos am fɔ tɔk mɔ, dɛn bigin aks am ɔl kayn kwɛshɔn;

⁵⁴ we dɛn bin de aks Jizɔs dɛn kwɛshɔn ya na trap dɛn bin de sɛt fɔ mek i tɔk wɔd we go mek dɛn ol am.