Lɛvitikɔs 9 - Krio Fɔs Oli Baybul

Erɔn ɛn In Bɔy Pikin Dɛn Bigin Du Dɛn Wok

¹ Di de we mek et we dɛn du di ɔdineshɔn, Mozis kɔl Erɔn, in bɔypikin dɛn ɛn di big wan dɛn na Izrɛl;

² ɛn tɛl Erɔn se i fɔ mek sin ɔfrin wit wan yɔŋ man kaw we nɔ gɛt bɔt, ɛn bɔn ɔfrin wit wan man ship we insɛf nɔ fɔ gɛt bɔt to PAPA GƆD.

³ I se Erɔn fɔ tɛl di Izrɛlayt mek dɛn gi wan man got as sin ɔfrin wit wan yɔŋ kaw ɛn wan yɔŋ ship we nɔ gɛt bɔt as bɔn ɔfrin,

⁴ wan man kaw ɛn wan man ship fɔ pis ɔfrin to PAPA GƆD, ɛn sid ɔfrin we miks wit ɔyl, bikɔs da de de PAPA GƆD go sho insɛf to dɛn.

⁵ So dɛn kɛr ɔl wetin Mozis se go bifo di tɛnt usay dɛn kin mit PAPA GƆD ɛn ɔl di Izrɛlayt dɛnsɛf gɛda frɔnt de bifo PAPA GƆD.

⁶ Wɛn dɛn ɔl dɔn gɛda, Mozis tɛl dɛn se na wetin PAPA GƆD se dɛn fɔ du, dɛn dɔn du ɛn dat go mek dɛn si di brayt brayt layt we de sho se PAPA GƆD de wit dɛn.

⁷ Dɛn Mozis tɛl Erɔn mek i go nia di ɔlta so dat i go mek in yon sin ɛn bɔn ɔfrin ɛn go beg padin fɔ insɛf ɛn di Izrɛlayt dɛn; i se i fɔ kɛr di pipul dɛn yon ɔfrin ɛn beg padin fɔ dɛn lɛk aw PAPA GƆD tɛl Mozis.

⁸ So Erɔn go nia di ɔlta ɛn kil di yɔŋ kaw fɔ di sin ɔfrin we i de mek fɔ insɛf.

⁹ Erɔn in bɔypikin dɛn gi am ɛn i dɔk in fiŋa insay ɛn put sɔm blɔd pan di ɔn dɛn na di ɔlta, dɔn i tɔn di wan we lɛf na di bɔtɔm pat na di ɔlta;

¹⁰ bɔt fɔ bɔn di fat ɛn di kidni dɛn ɛn di af af fat we ɛŋ pan di liva pan di animal we dɛn yuz fɔ di sin ɔfrin as PAPA GƆD bin tɛl Mozis.

¹¹ Nɔ fɔ bɔn di bif ɛn di kanda insay di kamp.

¹² I kil di animal fɔ di bɔn ɔfrin; Erɔn in bɔypikin dɛn gi am di blɔd we i ib ib rawnd di ɔlta.

¹³ Dɔn dɛn kɔt kɔt di bɔn ɔfrin ɛn gi am wit di ed we in naw bɔn dɛn pantap di ɔlta.

¹⁴ We i dɔn, i was di gɔt ɛn lɛg dɛn ɛn bɔn ɔl wit di bɔn ɔfrin na di ɔlta.

¹⁵ We i dɔn da wande, Erɔn gi di pipul dɛn yon ɔfrin. I tek di got we na di pipul dɛn yon ɛn kil am ɛn mek di ɔfrin lɛkɛ aw i bin du in yon sin ɔfrin.

¹⁶ I mek di bɔn ɔfrin lɛkɛ aw di lɔ se.

¹⁷ I ful in wan an wit di sid ɔfrin ɛn bɔn am pantap di ɔlta wit di bɔn ɔfrin we dɛn kin mek ɛvri mɔnin.

¹⁸ Fɔ dɔn ɔltin, i kil di man kaw insɛf wit di man ship we na di pis ɔfrin fɔ di pipul; Erɔn in bɔypikin dɛn gi am di blɔd ɛn in ib ib am rawnd di ɔlta,

¹⁹ Erɔn put ɔl di pat dɛn we gɛt fat

²⁰ pantap di chɛst ɛn bɔn di fat dɛn na di ɔlta,

²¹ bɔt Erɔn wev di chɛst ɛn di rayt lɛg as spɛshal prɛzɛnt bifo PAPA GƆD lɛk aw Mozis se.

²² Wɛn Erɔn dɔn mek in yon ɔfrin ɛn di pipul dɛn ɔfrin dɔn, i es in an ɔp ɛn blɛs di pipul dɛn ɛn pre fɔ mek PAPA GƆD kɔba dɛn ɛn gi dɛn wɛlbɔdi ɛn kɔmɔt na di ɔlta.

²³ Mozis ɛn Erɔn go insay di tɛnt usay dɛn kin mit PAPA GƆD; ɛn wɛn dɛn kɔmɔt na do, dɛn ɔltu blɛs di pipul dɛn bak ɛn di brayt brayt layt we de sho se PAPA GƆD de wit dɛn bɔs pan dɛn ɔl.

²⁴ Wantɛm, wantɛm, nain PAPA GƆD sɛn faya we bɔn di bɔn ɔfrin ɛn di fat we bin de na di ɔlta. Wɛn di Izrɛlayt dɛn si dat, dɛn ala ɛn butu dɛn fes na grɔn.