Lɛvitikɔs 7 - Krio Fɔs Oli Baybul

Ɔfrin Fɔ Pe Bak

¹ Na di lɔ dɛn dis we pɔsin fɔ fala we i de mek ɔfrin fɔseka wetin i fɔ sɔfa. I oli pas ɔltin;

² na di sem ples we dɛn bin kil di animal fɔ di bɔn sakrifays na de fɔ kil di wan we pɔsin de mek fɔseka wetin i fɔ sɔfa ɛn fɔ ib di blɔd rawnd di ɔlta.

³ Na fɔ gi ɔl in fat, di fat nain tel, di fat we kɔba di gɔt dɛn,

⁴ di tu kidni wit di fat we de pan dɛn bay di tel ɛn di af af we lɛf na di liva we yu dɔn pul di kidni dɛn;

⁵ di man we de mek sakrifays fɔ pipul sin we de dyuti go bɔn ɔl na di ɔlta as sakrifays we dɛn mek na faya to PAPA GƆD; na ɔfrin we na fɔ udat fɔ sɔfa.

⁶ Ɔl di man dɛn we na man we de mek sakrifays fɔ pipul sin fɔ it pan am; na oli ples fɔ it am; i oli pas ɔl.

⁷ Dis ɔfrin ya tan lɛk di sin ɔfrin, na di sem lɔ dɛn gɛt; di man we de mek sakrifays fɔ pipul sin we de dyuti, we de beg padin wit am fɔ gɛt am.

⁸ Igen, di man we de mek sakrifays fɔ pipul sin we de dyuti fɔ tek di kanda pan di animal we i de gi fɔ pɔsin in bɔn sakrifays.

⁹ Ɛn igen nain fɔ gɛt ɔl di ɔfrin we dɛn bek, wɛda na pɔt ɔ na ovin.

¹⁰ If dɛn miks di sid ɔfrin wit ɔyl ɔ lɛf am dray wan, na ɔl di man dɛn we de mek sakrifays fɔ pipul sin fɔ gɛt am ɛn dɛn fɔ sheb am lɛ i ikwal.

Ɔfrin We Fɔ Mek Fɔ Gɛt Wanwɔd Wit PAPA GƆD

¹¹ PAPA GƆD se we dɛn de mek pis ɔfrin bikɔs dɛn want wanwɔd wit PAPA GƆD, na dɛn tin ya dɛn fɔ du.

¹² If i de du am bikɔs i wan fɔ tɛl PAPA GƆD tɛnki, dɛn i fɔ miks ɔyl wit kek we nɔ gɛt yist, wefa we insɛf nɔ gɛt yist bɔt we dɛn put ɔyl pan, ɛn ɔda kek we dɛn mek wit fayn flawa we dɛn miks gud wan wit ɔyl.

¹³ I fɔ kɛr di ɔfrin we na fɔ tɛl PAPA GƆD tɛnki wit di sakrifays fɔ in pis ɔfrin go wit bred we gɛt yist.

¹⁴ Pan dɛn ɔl, i fɔ pul wan wan we i go gi to PAPA GƆD; na di man we de mek sakrifays fɔ pipul sin, we de dyuti, we sprinkul di blɔd fɔ di pis ɔfrin go gɛt am.

¹⁵ Fɔ it di bif da sem de de we dɛn mek di ɔfrin, nɔ fɔ lɛf am te mɔnin.

¹⁶ Bɔt if i bawn fɔ ɔ jɛs fil fɔ mek di ɔfrin, i fɔ it am di sem de ɛn i kin it di wan we lɛf, di nɛks de mɔnin,

¹⁷ bɔt if i stil lɛf fɔ di tɔd de, i fɔ bɔn am na faya.

¹⁸ If pɔsin it di bif we lɛf pan di pis ɔfrin di tɔd de, PAPA GƆD nɔ go aksɛpt in sakrifays ɛn i bin fɔ bɛtɛ i nɔ wes in tɛm; bifo dat i de mek insɛf lɛk udat nɔ klin na PAPA GƆD yay ɛn i go gɛt fɔ bia wetin go apin.

¹⁹ If di bif we i de sakrifays tɔch tin we nɔ klin na PAPA GƆD yay, nɔ fɔ it am; na fɔ bɔn am na faya. Ɔl udat klin na PAPA GƆD yay kin it pan di bif,

²⁰ bɔt if pɔsin it pan di bif wɛn i nɔ klin na PAPA GƆD yay, PAPA GƆD nɔ go kɔnt am as wan pan in pipul dɛn.

²¹ Ɛn if ɛnibɔdi tɔch tin we nɔ klin na PAPA GƆD yay, i kin bi mɔtalman ɔ animal ɔ ɛni ɔda tin we nɔ klin na PAPA GƆD yay, dɔn i kam it pan di bif we dɛn sakrifays to PAPA GƆD as pis ɔfrin, PAPA GƆD nɔ go kɔnt da pɔsin de as wan pan in pipul.

²² PAPA GƆD tɛl Mozis se,

²³ i fɔ tɛl di Izrɛlayt dɛn se, dɛn nɔ fɔ it fat we kɔmɔt pan man kaw, ship ɔ got.

²⁴ I se nɔ fɔ it animal we day fɔ insɛf in fat, ɔ di fat we kɔmɔt pan animal we dɛn wayl bif kil. Dɛn kin du ɔda tin wit am bɔt nɔ fɔ it am.

²⁵ Ɛnibɔdi we it fat we kɔmɔt pan animal we dɛn sakrifays na faya to PAPA GƆD, PAPA GƆD nɔ go kɔnt am as wan pan in pipul.

²⁶ Dɔn igen, nɔ fɔ it ɛnikayn blɔd wɛda na bɔd yon ɔ na animal yon, i lɛk usay dɛn de.

²⁷ Ɛnibɔdi we it blɔd, PAPA GƆD nɔ go kɔnt insɛf as wan pan in pipul.

²⁸ PAPA GƆD tɛl Mozis se,

²⁹ i fɔ tɛl di Izrɛlayt dɛn se, if ɛnibɔdi de mek pis ɔfrin to PAPA GƆD, i fɔ gi am lɛk se na spɛshal prɛzɛnt i de gi PAPA GƆD;

³⁰ nainsɛf fɔ gi PAPA GƆD as ɔfrin we i de mek na faya; i fɔ kɛr di animal in fat wit di chɛst, ɛn i go wev am as spɛshal prɛzɛnt to PAPA GƆD.

³¹ Di man we de mek sakrifays fɔ pipul sin we de dyuti go bɔn di fat na di ɔlta bɔt di chɛst go bi fɔ Erɔn ɛn in fambul dɛn.

³² Fɔ gi di rayt lɛg to di man we de mek sakrifays fɔ pipul sin as in yon prɛzɛnt pan di pis ɔfrin.

³³ Na di man we de mek sakrifays fɔ pipul sin, we de dyuti, we gi di blɔd frɔm di pis ɔfrin ɛn di fat go gɛt di rayt lɛg as prɛzɛnt.

³⁴ Di chɛst we dɛn wev ɛn di lɛg we dɛn gi, PAPA GƆD tek am na di pipul dɛn an ɛn gi dɛn to di man dɛn we de mek sakrifays fɔ pipul sin. Na dɛn fɔ de gɛt dɛn pat dɛn de sote go.

³⁵ Na di tin dɛn dis we fɔ bi fɔ di man dɛn we de mek sakrifays fɔ pipul sin pan di ɔfrin dɛn we dɛn mek na faya to PAPA GƆD, frɔm di tɛm we dɛn pre pan dɛn na so i fɔ bi;

³⁶ na so PAPA GƆD dɔn se i fɔ bi fɔ di Izrɛlayt dɛn, frɔm di tɛm we dɛn mek dɛn man we de mek sakrifays fɔ pipul sin, nain PAPA GƆD dɔn mek i bi so ɛn na so i fɔ bi ɔltɛm na di jɛnareshɔn.

³⁷ Na di lɔ dɛn dis we fɔ fala we pɔsin de mek bɔn ɔfrin, sid ɔfrin, sin ɔfrin, ɔfrin we na fɔseka wetin i fɔ sɔfa, di ɔfrin we dɛn man dɛn we de mek sakrifays fɔ pipul sin fɔ mek di de we dɛn de pre pan dɛn, ɛn di ɔfrin we pɔsin de mek if i want gɛt wanwɔd wit PAPA GƆD;

³⁸ we PAPA GƆD tɛl Mozis we i bin de na Mawnt Saynay, di de we i se di Izrɛlayt dɛn fɔ de gi PAPA GƆD dɛn ɔfrin.