Lɛvitikɔs 3 - Krio Fɔs Oli Baybul

Ɔfrin Fɔ Gɛt Wanwɔd Wit PAPA GƆD

¹ If di ɔfrin we pɔsin de gi na fɔ di sakrifays fɔ gɛt wanwɔd wit PAPA GƆD, if i de ɔfa kaw ship ɔ got, di man yon ɔ di uman yon, i fɔ gi PAPA GƆD di wan we nɔ gɛt bɔt

² I fɔ le in an pantap di animal we i de gi in ed, ɛn i fɔ kil am na di domɔt na di Tɛnt usay dɛn kin mit PAPA GƆD; dɔn Erɔn in bɔypikin dɛn we na di man dɛn we de mek sakrifays fɔ pipul sin, fɔ ib di blɔd rawnd di ɔlta.

³ Frɔm di ɔfrin we i de mek fɔ gɛt wanwɔd wit PAPA GƆD na faya to PAPA GƆD, di fat we de pan di gɔt wit ɔl di fat,

⁴ ɛn di tu kidni wit dɛn fat, ɛn di smɔl flap pan di liva we i bin dɔn pul kɔmɔt, ɔl fɔ de pan di sakrifays.

⁵ Dɔn di man dɛn we de mek sakrifays fɔ pipul sin, go bɔn dɛn na di ɔlta wit di yuzhwal bɔn sakrifays we de pan di wud na di faya; na ɔfrin we fɔ mek na faya lɛ i go pul fayn sɛnt we go mek PAPA GƆD gladi.

⁶ If di ɔfrin we i de mek na fɔ gɛt wanwɔd wit PAPA GƆD, i fɔ tek pan in ship ɔ got we i de mɛn, man ɔ uman ɛn i nɔ fɔ gɛt bɔt.

⁷ If i tek wan man ship fɔ in ɔfrin, dɛn i fɔ mek di ɔfrin to PAPA GƆD,

⁸ i fɔ le in an pantap di animal in ed ɛn kil am bifo di Tɛnt usay dɛn de mit PAPA GƆD; Erɔn in bɔypikin dɛn go ib di blɔd rawnd di ɔlta.

⁹ Frɔm di ɔfrin we i de mek fɔ gɛt wanwɔd wit PAPA GƆD na faya to PAPA GƆD, i fɔ gi di fat dat na di wanol tel we de nia di bakbon ɛn di fat we de pan di gɔt wit ɔl di fat,

¹⁰ ɛn di tu kidni wit di fat we de bay di tel, ɛn di af af we kin ɛŋ pan di liva we i bin dɛn pul kɔmɔt, ɔl fɔ de pan di sakrifays.

¹¹ Dɔn di man dɛn we de mek sakrifays fɔ pipul sin, go bɔn dɛn na di ɔlta as it we dɛn mek na faya to PAPA GƆD.

¹² If in ɔfrin na got, dɛn i fɔ mek am to PAPA GƆD,

¹³ ɛn le in an pantap di animal in ed ɛn kil am bifo di Tɛnt we dɛn kin mit PAPA GƆD ɛn Erɔn in bɔypikin dɛn go ib di blɔd rawnd di ɔlta.

¹⁴ Dɔn na pan am i go mek in ɔfrin to PAPA GƆD we na di ɔfrin we i de mek na faya. I fɔ bi di fat we kɔba di gɔt, ɛn ɔl di fat we de nia di gɔt,

¹⁵ ɛn di tu kidni ɛn di fat we de nia di tel, ɛn di af af we lɛf pan di liva we i go kɛr go wit di kidni dɛn.

¹⁶ Dɔn di man we de mek sakrifays fɔ pipul sin go bɔn dɛn na di ɔlta as it we dɔn bɔn na faya so dat i go pul fayn sɛnt we go mek PAPA GƆD gladi. Nain gɛt ɔl di fat.

¹⁷ Na tin dis we na lɔ ɛn i fɔ bi na ɔl di jɛnareshɔn, i lɛk usay dɛn de, dɛn nɔ fɔ it blɔd ɛn dɛn nɔ fɔ it fat.