Lɛvitikɔs 21 - Krio Fɔs Oli Baybul

Aw Dɛn Man We De Mek Sakrifays Fɔ Pipul Sin Fɔ Tan

¹ Dɛn PAPA GƆD tɛl Mozis fɔ tɛl di man dɛn we de mek sakrifays fɔ pipul sin, dat na Erɔn in bɔypikin dɛn, se, dɛn nɔn nɔ fɔ mek dɛn nɔ klin na PAPA GƆD yay fɔseka ɛni dɛn fambul we dɔn day,

² pas nɔmɔ if dɛn ɔl tap na wan os lɛkɛ dɛn mama, papa, pikin, brɔda,

³ ɔ sista we de na os bikɔs i nɔ mared yet. Na fɔ lɛkɛ dɛn wan ya nɔmɔ dɛn go mek dɛnsɛf nɔ klin na PAPA GƆD yay.

⁴ If na bay mared dɛn fambul to di pɔsin, dɛn nɔ fɔ mek dɛnsɛf nɔ klin na PAPA GƆD yay.

⁵ I se dɛn nɔn nɔ fɔ krep wan pat pan dɛn ed fɔ mek bɔled, nɔ fɔ skrep pan di ia we de na dɛn dɛn fes in sayd ɔ shep dɛn biabia lɛk got ɔ mak mak idɛn bɔdi.

⁶ Dɛn fɔ oli fɔ PAPA GƆD ɛn nɔ put shem pan PAPA GƆD in nem; dɛn de mek sakrifays na faya to PAPA GƆD, ɛn nain it so dɛn fɔ oli.

⁷ Dɛn nɔ fɔ mared uman we de biev lɛk rare gyal fɔ go wɔship ɔda gɔd dɛn ɔ uman we nɔto vajin ɛn dɛn nɔ fɔ mared uman we nɔ tap na os wit in fɔs man igen, bikɔs dɛn na man dɛn we de mek sakrifays fɔ pipul sin so dɛn fɔ oli fɔ PAPA GƆD.

⁸ I se di pipul dɛnsɛf fɔ trit dɛn lɛkɛ se dɛn oli bikɔs na dɛn de gi PAPA GƆD it so dɛn fɔ oli as in PAPA GƆD we de mek dɛn oli, insɛf oli.

⁹ If di man we de mek sakrifays fɔ pipul sin in gyal pikin disgres insɛf ɛn biev lɛk rare gyal fɔ go wɔship ɔda gɔd ɛn disgres in papa, na fɔ bɔn am na faya.

¹⁰ Di bigman pan di man dɛn we de mek sakrifays fɔ pipul sin we nain ed dɛn bin anɔynt wit ɔyl, ɛn we nain bin wɛr dɛn klos we na man dɛn we de mek sakrifays fɔ pipul sin kin wɛr, nɔ fɔ lɛf di ia nain ed so ɛn nɔ kom am, i nɔ fɔ chɛr chɛr in klos fɔ sho se i gɛt bɛrin,

¹¹ nɔ fɔ go nia dedebɔdi ɛn mek insɛf nɔ klin na PAPA GƆD yay, i lɛk sɛf nain mama ɔ in papa;

¹² i nɔ fɔ kɔmɔt na di tɛnt usay dɛn kin mit PAPA GƆD fɔseka bɛrin ɛn disgres di tɛnt usay dɛn kin mit PAPA GƆD bikɔs di ɔyl we de pan am sho se in na PAPA GƆD yon; i se nain na PAPA GƆD.

¹³ Na uman we na vajin i fɔ mared.

¹⁴ Nɔ fɔ mared uman we in man dɔn day, ɔ wan we in man dɔn lɛf am, ɔ uman we biev lɛk rare gyal fɔ go wɔship ɔda gɔd bɔt i fɔ mared vajin we kɔmɔt na di sem fambul,

¹⁵ dis na fɔ mek i nɔ mek in pikin dɛn disgres midul pipul; bikɔs nain na PAPA GƆD we de mek am oli.

¹⁶ Ɛn PAPA GƆD tɛl Mozis se,

¹⁷ mek i tɛl Erɔn se nɔn pan in pipul na ɔl in jɛnareshɔn, we go gɛt bɔt pan am, nɔ go gi PAPA GƆD it.

¹⁸ Ɛnibɔdi we gɛt bɔt nɔ go go nia in ɔlta, wɛda na blɛnyay man ɔ na man we nɔ de waka ɔ man we gɛt prɔblɛm wit in fes ɔ man we nɔ de waka bɛtɛ,

¹⁹ ɔ man we in an ɔ in fut gɛt smɔl prɔblɛm,

²⁰ ɔ man we gɛt ɔmbak, ɔ man we shɔt lɛk dwaf, ɔ man we in yay ambɔg, ɔ we gɛt sɔm kayn rash nain bɔdi ɔ we dɔn tɔn okobo;

²¹ nɔbɔdi we na Erɔn in jɛnareshɔn we gɛt bɔt nɔ go go nia di ɔlta se i de mek ɔfrin na faya to PAPA GƆD; as i gɛt bɔt, i nɔ fɔ go nia di ɔlta fɔ gi PAPA GƆD it.

²² I kin it pan it we dɛn de gi PAPA GƆD, dat na ɔl di it we oli,

²³ bɔt i nɔ fɔ go nia di klos we ɛŋ na di domɔt ɔ di ɔlta bikɔs i gɛt bɔt ɛn i go put shem pan di tɛnt usay dɛn kin mit PAPA GƆD wit ɔl wetin de de; bikɔs nain na PAPA GƆD we de mek dɛn oli.

²⁴ So Mozis tɛl Erɔn, in bɔypikin dɛn ɛn ɔl di pipul wetin PAPA GƆD se.