Lɛvitikɔs 2 - Krio Fɔs Oli Baybul

Wetin PAPA GƆD Want Fɔ Sid Ɔfrin

¹ We ɛnibɔdi de briŋ sid ɔfrin to PAPA GƆD, i fɔ bi fayn flawa ɛn dɛn fɔ put ɔyl ɛn frankinsɛns pan am,

² dɔn dɛn fɔ kɛr am go to Erɔn in bɔypikin dɛn we na man dɛn we de mek sakrifays fɔ pipul sin. Di wan pan dɛn we de mek dis patikla sakrifays fɔ tek wan an pan di flawa ɛn ɔyl wit ɔl di frankinsɛns ɛn bɔn am as wetin dɛn go sho to PAPA GƆD se nain yon; na ɔfrin we dɛn go bɔn na faya ɛn i go pul fayn sɛnt we go mek PAPA GƆD gladi.

³ Wetin lɛf pan di sid ɔfrin go bi fɔ Erɔn ɛn in bɔypikin dɛn; na di pat dat we dɛn put wan say fɔ PAPA GƆD pan di ɔfrin dɛn we dɛn bɔn na faya.

⁴ Wɛn di sid ɔfrin we dɛn de briŋ na wan we dɛn bek na pɔt, fɔ miks di bred we nɔ gɛt yist wit ɔyl ɔ rɔb ɔyl pan di flat kek lɛk biskit we yu mek.

⁵ If di tin we yu wan gi PAPA GƆD na tin we bek na pɔt, i fɔ bi tin we dɛn yuz fayn flawa we nɔ gɛt yist fɔ mek ɛn fɔ miks am wit ɔyl;

⁶ fɔ kɔt kɔt am ɛn put ɔyl pan am; nain na yu sid ɔfrin.

⁷ Ɛn if di sid ɔfrin na wan we nɔ gɛt yist ɛn dɛn bek am na pɔt, i fɔ bi wan we dɛn mek wit fayn flawa ɛn dɛn put ɔyl pan am.

⁸ Dɔn yu go kɛr ɔl di tin dɛn we dɛn dɔn rɛdi fɔ di ɔfrin go to PAPA GƆD, nain os bɔt fɔ gi di man we de mek sakrifays fɔ pipul sin, we go kɛr am go na di ɔlta.

⁹ Da tɛm de, di man we de mek sakrifays fɔ pipul sin go tek sɔm ɛn bɔn am na di ɔlta as wetin dɛn go sho to PAPA GƆD se nain yon; na ɔfrin we dɛn mek na faya ɛn i go pul fayn sɛnt we go mek PAPA GƆD gladi.

¹⁰ Wetin lɛf pan di sid ɔfrin go bi fɔ Erɔn ɛn in bɔypikin dɛn; na di pat dat we dɛn put wan say fɔ PAPA GƆD pan di ɔfrin dɛn we dɛn bɔn na faya.

¹¹ Nɔ fɔ gi PAPA GƆD ɛni sid ɔfrin we gɛt yist pan am, ɛn nɔ fɔ bɔn ɛni yist ɔ ɔni as sakrifays we fɔ bɔn to PAPA GƆD.

¹² Yu kin gi PAPA GƆD as ɔfrin we yu de gi am di fɔs tin dɛn we yu avɛst, we nɔ gɛt fɔ bɔn na ɔlta bikɔs i nɔ go pul fayn sɛnt we go mek i gladi.

¹³ Una fɔ put sɔl pan ɔl di sid ɔfrin dɛn. Una nɔ fɔ mek di sɔl na una Kɔvinant lɔs pan di pap flawa; sɔl fɔ de pan ɔl di ɔfrin dɛn we una de mek.

¹⁴ If di sid ɔfrin we una de gi PAPA GƆD pan di fɔs tin dɛn we una avɛst, una fɔ gren di sid ɔfrin pan di fɔs tin dɛn we una avɛst ɛn pach am na faya.

¹⁵ Dɔn fɔ put ɔyl pan am ɛn le insɛns pantap am; na sid ɔfrin.

¹⁶ Da tɛm de, di man we de mek sakrifays fɔ pipul sin go bɔn sɔm pan di sid ɔfrin we dɛn dɔn gren, wit di ɔyl ɛn ɔl di insɛns as wetin dɛn go sho to PAPA GƆD se nain yon; na ɔfrin we dɛn mek na faya ɛn i go pul fayn sɛnt we go mek PAPA GƆD gladi.