Lɛvitikɔs 18 - Krio Fɔs Oli Baybul

Wetin Nɔ Fɔ Du We Man De Ledɔm Wit Uman

¹ Dɛn PAPA GƆD tɛl Mozis

² fɔ tɛl di Izrɛlayt dɛn se, in se nain na PAPA GƆD we na dɛn GƆD.

³ I se nɔto wetin di Ijipshian dɛn we na dɛn land dɛn bin tap, nɔto di sem tin dɛn fɔ du ɛn dɛn nɔ fɔ ivin fala fɔ du wetin di Kenanayt, usay dɛn de go, de du. Nɔ fɔ fala dɛn aw dɛn de biev.

⁴ Na wetin PAPA GƆD se dɛn fɔ du, nain fɔ du, bikɔs nain na PAPA GƆD we na dɛn PAPA GƆD.

⁵ Na dat mek dɛn fɔ du wetin i se ɛn we pɔsin du wetin PAPA GƆD se fɔ du, dat go mek i bɛtɛ na wɔl. Nain na PAPA GƆD.

⁶ I se nɔn pan dɛn nɔ fɔ ask uman we i fambul to fɔ lidɔm wit am. I se nain na PAPA GƆD.

⁷ Nɔbɔdi nɔ fɔ si in papa in nekɛdnɛs bikɔs i jɛs tan lɛk na yu mama yu dɔn si, ɛn na yu mama, yu nɔ fɔ si in nekɛdnɛs.

⁸ Nɔbɔdi nɔ fɔ lidɔm wit in papa in wɛf. I jɛs tan lɛk na yu papa in nekɛdnɛs yu dɔn si.

⁹ Nɔbɔdi nɔ fɔ lidɔm wit in sista, wɛda dɛn gɛt di sem mama ɛn papa, ɔ na wan pan dɛn nɔmɔ na di sem, ɔ wɛda dɛn ɔl mɛn na di sem os ɔ nɔt.

¹⁰ Man nɔ fɔ lidɔm wit in grampikin we in bɔy ɔ gyal pikin bɔn, we na uman, bikɔs dɛn na yu yon blɔd..

¹¹ If na pɔsin in papa in wɛf bɔn di gyal pikin sɛf, wans nain papa bɔn am, i nɔ fɔ mek i pul klos fɔ am bikɔs nain sista.

¹² Pɔsin nɔ fɔ mek in papa in sista pul klos fɔ am bikɔs nain papa in klos fambul.

¹³ I nɔ fɔ mek in mama in sista sɛf pul klos fɔ am bikɔs nain mama insɛf yon klos fambul.

¹⁴ Nɔ fɔ mek pɔsin in ɔnkul wɛf pul klos fɔ am bikɔs i go disgres in ɔnkul ɛn i fɔ mɛmba se nain anti.

¹⁵ Pɔsin nɔ fɔ disgres in dɔtɛnlɔ ɛn mek i pul klos fɔ am; nain bɔypikin in wɛf so nɔ fɔ disgres am.

¹⁶ If pɔsin mek in brɔda wɛf pul klos fɔ am, nain brɔda i de disgres.

¹⁷ Nɔ fɔ mek mami ɛn in gyal pikin pul klos fɔ pɔsin, nɔ fɔ ivin mek ɛni pan in grampikin dɛn, wɛda nain bɔypikin, in pikin, ɔ nain gyal pikin, in pikin, pul klos fɔ am. Na bad, bad tin bikɔs dɛn ɔl nain klos fambul.

¹⁸ If pɔsin kin mared tu uman, i fɔ mek sho se dɛn ɔltu nɔto sista we wan nɔ day yet.

¹⁹ I se man nɔ fɔ mek uman pul klos fɔ am tɛm we i de si in piriɔd.

²⁰ Man nɔ fɔ kip in kɔmpin wɛf bikɔs dat nɔ go mek i klin na PAPA GƆD yay.

²¹ PAPA GƆD se nɔn pan dɛn nɔ fɔ sakrifays ɛni pan dɛn pikin na faya to Molɛk bikɔs dat go mek dɛn put shem pan PAPA GƆD in nem. I se nain na PAPA GƆD.

²² Man nɔ fɔ ledɔm wit in kɔmpin man lɛkɛ se na uman, dɛn dɔn du bad bad tin.

²³ Man nɔ fɔ tek animal mek wɛf ɛn mek insɛf nɔ klin na PAPA GƆD yay, ɛn uman sɛf nɔ fɔ tek animal mek man: na bad bad tin da wande.

²⁴ Mozis tɛl dɛn se, PAPA GƆD se dɛn nɔ fɔ du ɛni pan dɛn tin we i dɔn tɔn bɔt so bikɔs na dɛn sem tin dɛn de mek i drɛb di neshɔn dɛn we bin tap de mek dɛn nɔ go mek dɛn nɔ klin na PAPA GƆD yay;

²⁵ ɛn dat sɛf go mek di land insɛf nɔ klin na PAPA GƆD yay, we go mek PAPA GƆD pɔnish di land fɔseka di bad tin dɛn we dɛn du, ɛn i go mek di pipul dɛn kɔmɔt na di land lɛkɛ aw pɔsin de vɔmit it.

²⁶ I se di Izrɛlayt dɛn nɔ fɔ tan lɛk di pipul dɛn we bin tap na di land ɛn du ɔl di bad bad tin dɛn we dɛn de du. I se dɛn fɔ du wetin i se, dat na, dɛn we bɔn de ɔ di wan dɛn we go tap wit dɛn

²⁷ bikɔs na ɔl dɛn bad tin dɛn de di pipul dɛn we bin tap na di land bifo dɛn, bin du, we mek di land nɔ klin na PAPA GƆD yay;

²⁸ na di sem tin go apin to dɛnsɛf if dɛn biev lɛkɛ dɛn pipul de. Di land go mek di pipul dɛn kɔmɔt de lɛkɛ aw pɔsin de vɔmit it, if dɛn mek i nɔ klin na PAPA GƆD yay.

²⁹ I se if ɛniwan pan dɛn du dɛn bad bad tin we nɔ fɔ du, dɛn fɔ drɛb dɛn kɔmɔt Izrɛl.

³⁰ I se dɛn fɔ du wetin in se ɛn nɔ fala fɔ du di bad bad tin dɛn we di pipul bifo dɛn bin de du so dat dɛn nɔ go mek dɛn nɔ klin na PAPA GƆD yay: nain na PAPA GƆD we na dɛn GƆD.