Lɛvitikɔs 16 - Krio Fɔs Oli Baybul

Wetin Fɔ Bi Di De We Dɛn De Beg PAPA GƆD Padin

¹ PAPA GƆD tɔk to Mozis afta tu pan Erɔn in bɔypikin bin day we PAPA GƆD kil dɛn fɔ we dɛn nɔ du wetin i want.

² I se Mozis fɔ tɛl in brɔda we na Erɔn se nɔto ɔltɛm i fɔ jɛs de go biɛn di do klos we ɛŋ insay di ples we oli pas ɔl, we na de di Ak ɔf di Kɔvinant in kɔba de, ɔ nɔ so i go day bikɔs in kin apia insay klawd ɛn sidɔm de.

³ I se pas if Erɔn go de wit wan yɔŋ man kaw fɔ sin ɔfrin ɛn wan man ship fɔ bɔn ɔfrin.

⁴ PAPA GƆD se i fɔ wɛr gawn we i mek wit linin, lɔŋ fut drɔz, put brɔd band we dɛn mek wit linin rawnd in wes ɛn tay linin tɔban nain ed; na di we dis we i fɔ drɛs bɔt i fɔ was in bɔdi bifo i wɛr dɛn.

⁵ Dɛn di ɔda Izrɛlayt dɛn fɔ gi am tu man got fɔ sin ɔfrin ɛn wan man ship fɔ bɔn ɔfrin.

⁶ Dɔn Erɔn go gi PAPA GƆD di man kaw we i de mek fɔ sin ɔfrin fɔ insɛf ɛn beg PAPA GƆD padin fɔ insɛf ɛn in wanol os.

⁷ Da tɛm de naw i kin tek di tu got ɛn put dɛn bifo PAPA GƆD na di tɛnt usay dɛn kin mit am in domɔt;

⁸ ɛn Erɔn go fɛnɔt to PAPA GƆD fɔ disayd udat gɛt uswan pan di got dɛn; uswan na fɔ PAPA GƆD ɛn uswan fɔ bi fɔ Azazɛl.

⁹ We Erɔn go dɔn no uswan fɔ bi fɔ PAPA GƆD, i go gi PAPA GƆD as sin ɔfrin;

¹⁰ bɔt i go gi PAPA GƆD di got we i fɔ lɛf fɔ go layv wan. I go beg padin wit am ɛn sɛn am go to Azazɛl na di say we pɔsin nɔ go ebul tap.

¹¹ I se na Erɔn insɛf fɔ gi di man kaw we na fɔ sin ɔfrin so i go beg padin fɔ insɛf ɛn fɔ in os; i go kil di man kaw fɔ insɛf.

¹² Dɛn i go tek di pan we dɛn kin bɔn insɛns we dɛn dɔn ful wit faya kol we dɛn pul na di ɔlta go bifo PAPA GƆD, wit tu an insɛns we dɛn dɔn gren fayn ɛn we gɛt fayn sɛnt ɛn kɛr dɛn ɔltu go na di ples we oli pas ɔl

¹³ ɛn put di insɛns na di faya bifo PAPA GƆD, so dat di tik smok we di insɛns go pul go kɔba di Ak ɔf di Kɔvinant in kɔba, ɔ nɔ so Erɔn go day if i si di Ak ɔf di Kɔvinant in kɔba;

¹⁴ ɛn i go tek sɔm pan di man kaw in blɔd ɛn sprinkul am wit in fiŋa frɔnt di say we di Ak ɔf di Kɔvinant in kɔba de ɛn sprinkul am sɛvin tɛm pan di Ak ɔf di Kɔvinant insɛf.

¹⁵ Afta dat, i se Erɔn fɔ mek di pipul kil di got we dɛn bin kɛr go fɔ sin ɔfrin, ɛn kɛr di blɔd go to am na di ples we oli pas ɔl, ɛn in go du wetin i bin du wit di man kaw in blɔd, dat na fɔ sprinkul am pan di Ak ɔf di Kɔvinant ɛn pan di kɔba;

¹⁶ na so i go mek di ples we oli pas ɔl klin na PAPA GƆD yay ɛn mek am fit fɔ de beg PAPA GƆD padin de fɔ we di Izrɛlayt dɛn nɔ du wetin rayt we na wetin PAPA GƆD want ɛn na so i go du wit di wanol tɛnt usay dɛn kin mit PAPA GƆD we na rawnd am di Izrɛlayt dɛn de sin.

¹⁷ We Erɔn go insay di ples we oli pas ɔl fɔ go beg padin fɔ insɛf, in wanol os ɛn di ɔda Izrɛlayt dɛn, nɔbɔdi nɔ fɔ de de.

¹⁸ Afta dat, i go go to di ɔlta we na de dɛn de mek sakrifays bifo PAPA GƆD ɛn mek am fit fɔ sakrifays bifo PAPA GƆD. I go tek sɔm pan di man kaw ɛn di got dɛn blɔd ɛn put dɛn pantap di ɔn dɛn rawnd di ɔlta.

¹⁹ I go sprinkul sɔm pan di blɔd wit in fiŋa sɛvin tɛm pan am ɛn na so i go mek am klin na PAPA GƆD yay bak fɔ di Izrɛlayt dɛn.

Di Got We Dɛn De Put Di Sin Dɛn Pan

²⁰ Wɛn Erɔn dɔn mek di ples we oli pas ɔl, di tɛnt usay dɛn kin mit PAPA GƆD ɛn di ɔlta fit fɔ PAPA GƆD fɔ yus, i go gi di layf got;

²¹ we i go le in tu an pantap in ed, kɔnfɛs se di Izrɛlayt dɛn nɔ du wetin PAPA GƆD se dɛn fɔ du, di bad tin dɛn we dɛn dɔn du to dɛn kɔmpin, ɛn di tin dɛn we dɛn dɔn du we Papa nɔ lɛk, oba di got in ed. Dat min se na di got go tot ɔl di pipul dɛn sin. Dɛn go gi wan man we go kɛr am go na di dray ples we pipul nɔ go ebul tap.

²² Di got go tot ɔl di Izrɛlayt dɛn sin go na ples we pipul nɔ de ɛn di man go lɛf am na di ples we pɔsin nɔ go ebul tap.

²³ Dɛn Erɔn go go bak insay di tɛnt usay dɛn kin mit PAPA GƆD, pul ɔl di linin tin dɛn we i bin wɛr we i de go insay di ples we oli pas ɔl ɛn lɛf dɛn de;

²⁴ ɛn i go was in bɔdi na wan spɛshal ples, wɛr in yon klos bak, go na do ɛn mek di bɔn ɔfrin fɔ insɛf ɛn in pipul so dat i go beg padin fɔ dɛn ɔl.

²⁵ I go bɔn ɔl di fat pan di sin ɔfrin dɛn na di ɔlta.

²⁶ Di man we bin kɛr di got go to Azazɛl go was in klos dɛn ɛn was in bɔdi ɛn na afta dat i go go insay di kamp.

²⁷ Dɛn go kɛr di man kaw ɛn di got we na fɔ di sin ɔfrin, we na dɛn blɔd i bin tek beg padin na di ples we oli pas ɔl go na do na di kamp; dɛn go bɔn in kanda ɛn in gɔt dɛn ɛn ɔl wetin nɔ gud fɔ it.

²⁸ Di pɔsin we bɔn dɛn go was in klos dɛn, ɛn was in bɔdi bifo i go go insay di kamp.

Fɔ Mɛmba Di De We Big Pas Ɔl Fɔ Fɔgiv Sin

²⁹ PAPA GƆD se dat fɔ bi lɔ na ɔl in jɛnareshɔn dɛn, dat na di nɔmba tɛn de na di mɔnt we mek sɛvin, dɛn fɔ fast ɛn nɔ du ɛni wok, wɛda na de dɛn bɔn ɔ dɛn na trenja;

³⁰ bikɔs na de we di man we de mek sakrifays fɔ pipul sin go beg padin fɔ dɛn mek dɛn go klin na PAPA GƆD in yay.

³¹ Na di sɛvin de we na di de fɔ blo ɛn dɛn fɔ fast; na lɔ dis ɛn i fɔ bi na ɔl di jɛnareshɔn.

³² Di man we de mek sakrifays fɔ pipul sin we dɛn go dɔn pik fɔ bi di bigman pan dɛn man we de mek sakrifays fɔ pipul sin we go tek in papa in ples, go wɛr di spɛshal linin klos dɛn fɔ beg padin;

³³ na so i go mek di ples we oli pas ɔl klin na PAPA GƆD yay ɛn mek am fit fɔ de beg PAPA GƆD padin de fɔ we di Izrɛlayt dɛn nɔ du wetin rayt we na wetin PAPA GƆD want ɛn na so i go du wit di wanol tɛnt usay dɛn kin mit PAPA GƆD ɛn di ɔlta, i go beg padin fɔ ɔl di man dɛn we de mek sakrifays fɔ pipul sin ɛn fɔ di wanol Izrɛlayt kɔmyuniti.

³⁴ Na di lɔ dɛn dis we go de na ɔl di jɛnareshɔn dɛn te go. Na fɔ de beg PAPA GƆD padin fɔ di Izrɛlayt dɛn sin dɛn wan tɛm fɔ ia. Mozis du wetin PAPA GƆD tɛl am fɔ du.