Lɛvitikɔs 13 - Krio Fɔs Oli Baybul

Lɔ Dɛn Bɔt Dɛn Siknɛs Na Bɔdi We Pɔsin Kin Gi Ɔda Pɔsin

¹ PAPA GƆD tɛl Mozis ɛn Erɔn se,

² wɛn pɔsin wund nain bɔdi, ɔ gɛt bwɛl nain bɔdi, ɔ ɛni ɔda mak nain bɔdi, we go tɔn bad sik we i kin gi pɔsin, dɛn fɔ briŋ am to Erɔn ɔ wan pan di ɔda man dɛn we de mek sakrifays fɔ pipul sin,

³ we go ɛgzamin am; ɛn if di ia we de gro usay di mak de dɔn wayt ɛn di mak dip te go insay in bɔdi, dat sho se na bad sik i gɛt nain bɔdi we i kin gi ɔda pɔsin; we di man we de mek sakrifays fɔ pipul sin dɔn ɛgzamin am dɔn, i go lɛ ɔlman no se i nɔ klin na PAPA GƆD yay.

⁴ Bɔt if di mak we de na di bɔdi nɔ dip te go insay di bɔdi, ɛn di ia we de rawnd di mak nɔ wayt, di man we de mek sakrifays fɔ pipul sin nɔ fɔ mek di pɔsin miks wit ɔda pipul fɔ sɛvin de;

⁵ bɔt i fɔ ɛgzamin am bak di de we mek sɛvin ɛn if i tink se di mak nɔ prɛd go ɔda say, bɔt de lɛk aw i bin de, i fɔ lɛ i de fɔ ɔda sɛvin de i nɔ miks wit pipul;

⁶ dɔn we da sɛvin de de insɛf dɔn, i go ɛgzamin am bak, ɛn if di mak mek lɛk i lɔs ɛn nɔ prɛd nain bɔdi, dɛn di man we de mek sakrifays fɔ pipul sin go lɛ ɔlman no se di pɔsin klin na PAPA GƆD yay; na smɔl mak nɔmɔ i bin gɛt nain bɔdi we nɔ fɔ fred; dɛn i go was in klos nɔmɔ ɛn i go klin na PAPA GƆD yay.

⁷ Bɔt if di mak we i gɛt nain bɔdi prɛd na di bɔdi afta i bin dɔn go to di man we de mek sakrifays fɔ pipul sin fɔ ɛgzamin am, i fɔ go bak to di man we de mek sakrifays fɔ pipul sin;

⁸ ɛn i go ɛgzamin am bak ɛn if i si se di mak dɔn prɛd nain bɔdi, dɛn i go lɛ ɔlman no se i nɔ klin na PAPA GƆD yay; na bad sik i gɛt nain bɔdi.

⁹ Wɛn pɔsin gɛt bad sik nain bɔdi, dɛn fɔ kɛr am go to di man we de mek sakrifays fɔ pipul sin;

¹⁰ ɛn di man we de mek sakrifays fɔ pipul sin go ɛgzamin am, ɛn if i gɛt wayt mak nain bɔdi we dɔn mek di ia nain bɔdi tɔn wayt, ɛn i dɔn de mek di mak opin lɛk wund we pɔsin de si in bif,

¹¹ na bad sik i gɛt nain bɔdi we nɔ go wɛl so nɔmɔ, ɛn di man we de mek sakrifays fɔ pipul sin go lɛ ɔlman no se di pɔsin nɔ klin na PAPA GƆD yay; di man we de mek sakrifays fɔ pipul sin nɔ fɔ mek i miks wit ɔda pipul bikɔs dat sho se i nɔ klin na PAPA GƆD yay.

¹² Ɛn if di man we de mek sakrifays fɔ pipul sin si se di bad sik nain bɔdi prɛd ɔl oba in bɔdi, frɔm in ed te rich in fut,

¹³ i fɔ ɛgzamin am bak, ɛn if i fɛnɔt se di sik dɔn kɔba di pɔsin in wanol bɔdi, i go lɛ ɔlman no se i klin na PAPA GƆD yay, ɔlsay dɔn wayt nain bɔdi ɛn i klin na PAPA GƆD yay.

¹⁴ Bɔt if di mak opin we pɔsin de si in bif, i nɔ klin na PAPA GƆD yay.

¹⁵ Di man we de mek sakrifays fɔ pipul sin go ɛgzamin di mak we opin lɛk wund fɔ lɛ pɔsin de si in bif ɛn lɛ ɔlman no se di pɔsin nɔ klin na PAPA GƆD yay; di mak we opin lɛk wund fɔ lɛ pɔsin de si in bif sho se pɔsin nɔ klin na PAPA GƆD yay, bikɔs na bad sik i gɛt nain bɔdi.

¹⁶ Bɔt if di mak we opin lɛk wund we mek pɔsin de si in bif wɛl ɛn tɔn wayt, dɛn i fɔ go to di man we de mek sakrifays fɔ pipul sin,

¹⁷ ɛn i go ɛgzamin am, dɔn if di mak we bin opin dɔn tɔn wayt, dɛn i klin na PAPA GƆD yay ɛn di man we de mek sakrifays fɔ pipul sin go lɛ ɔlman no se i klin na PAPA GƆD yay.

¹⁸ I tɔk bak se wɛn pɔsin gɛt bwɛl nain bɔdi we dɔn wɛl,

¹⁹ ɛn di ples usay di bwɛl bin de gɛt mak, dɛn i go sho am to di man we de mek sakrifays fɔ pipul sin;

²⁰ dɔn in go ɛgzamin am, ɛn if di mak go insay in bɔdi ɛn di ia nain bɔdi tɔn wayt, di man we de mek sakrifays fɔ pipul sin go lɛ ɔlman no se i nɔ klin na PAPA GƆD yay; i gɛt bad sik nain bɔdi we dɔn prɛd ɔlsay afta di bwɛl we i bin gɛt.

²¹ Bɔt if we di man we de mek sakrifays fɔ pipul sin ɛgzamin am, i si se di ia nain bɔdi nɔ wayt ɛn di mak nɔ go insay di bɔdi, bɔt mek lɛk i lɔs, dɛn di man we de mek sakrifays fɔ pipul sin nɔ fɔ mek i miks wit pipul fɔ sɛvin de;

²² ɛn if i prɛd ɔlsay nain bɔdi, dɔn di man we de mek sakrifays fɔ pipul sin go lɛ ɔlman no se i nɔ klin na PAPA GƆD yay; na sik we i kin gi ɔda pɔsin.

²³ Bɔt if di mak nɔ prɛd, na di mak we di bwɛl lɛf; dɛn di man we de mek sakrifays fɔ pipul sin go lɛ ɔlman no se i klin na PAPA GƆD yay.

²⁴ I se, if na faya bɔn pɔsin in bɔdi ɛn i mek opin wan lɛk wund ɛn mek wayt ɔ rɛd,

²⁵ di man we de mek sakrifays fɔ pipul sin go ɛgzamin am ɛn if di ia we de rawnd di mak dɔn tɔn wayt ɛn di mak go insay di bɔdi, dɛn na bad sik na di bɔdi we prɛd afta i dɔn bɔn na faya, ɛn di man we de mek sakrifays fɔ pipul sin go lɛ ɔlman no se i nɔ klin na PAPA GƆD yay;

²⁶ Bɔt if we di man we de mek sakrifays fɔ pipul sin ɛgzamin am, i si se di ia nain bɔdi nɔ wayt ɛn di mak nɔ go insay di bɔdi, bɔt mek lɛk i lɔs, dɛn di man we de mek sakrifays fɔ pipul sin nɔ fɔ mek i miks wit pipul fɔ sɛvin de;

²⁷ ɛn di man we de mek sakrifays fɔ pipul sin go ɛgzamin am bak, di de we mek sɛvin, if i de prɛd nain bɔdi, dɛn di man we de mek sakrifays fɔ pipul sin go lɛ ɔlman no se i nɔ klin na PAPA GƆD yay; na bad sik na di bɔdi we i kin gi pɔsin.

²⁸ Bɔt if di mak lɛf na di sem ples ɛn nɔ prɛd na di bɔdi, i mek lɛk i lɔs, na mak we lɛf afta di faya bɔn am, ɛn di man we de mek sakrifays fɔ pipul sin go lɛ ɔlman no se i klin na PAPA GƆD yay.

²⁹ I se, wɛn rash kɔmɔt na man ɔ uman in ed ɔ chin,

³⁰ di man we de mek sakrifays fɔ pipul sin go ɛgzamin di rash; ɛn if i go insay di bɔdi, ɛn di ia we de rawnd am nɔ bɛtɛ bɔt i yala, dɛn di man we de mek sakrifays fɔ pipul sin go lɛ ɔlman no se di pɔsin nɔ klin na PAPA GƆD yay; na lakpalakpa, bad sik nain ed ɛn chin.

³¹ Ɛn if di man we de mek sakrifays fɔ pipul sin ɛgzamin di lakpalakpa, ɛn di lakpalakpa go insay di bɔdi ɛn i nɔ gɛt nɔmal ia de, dɛn di man we de mek sakrifays fɔ pipul sin nɔ go mek di pɔsin miks wit ɔda pipul fɔ sɛvin de,

³² ɛn i fɔ ɛgzamin am bak di de we mek sɛvin ɛn if di lakpalakpa nɔ prɛd go ɔda say, ɛn nɔ gɛt nɔn yala ia de, bɔt de lɛk aw i bin de,

³³ dɛn di pɔsin fɔ krep in ia nain ed ɛn di chin pas nɔmɔ di say we di lakpalakpa de; ɛn di man we de mek sakrifays fɔ pipul sin nɔ go mek i miks wit ɔda pipul fɔ sɛvin mɔ de;

³⁴ dɔn we da sɛvin de de insɛf dɔn, i go ɛgzamin am bak, ɛn if di lakpalakpa nɔ prɛd nain bɔdi ɛn nɔ go insay di bɔdi, dɛn di man we de mek sakrifays fɔ pipul sin go lɛ ɔlman no se di pɔsin klin na PAPA GƆD yay; dɛn i go was in klos nɔmɔ ɛn i go klin na PAPA GƆD yay.

³⁵ Bɔt if di lakpalakpa we i gɛt nain bɔdi prɛd na di bɔdi afta i bin dɔn go to di man we de mek sakrifays fɔ pipul sin fɔ ɛgzamin am,

³⁶ dɛn di man we de mek sakrifays fɔ pipul sin go ɛgzamin am bak ɛn if di lakpalakpa dɔn prɛd nain bɔdi, di man we de mek sakrifays fɔ pipul sin nɔ gɛt fɔ luk fɔ if di ia yala i nɔ klin na PAPA GƆD yay.

³⁷ Bɔt if i si se di lakpalakpa nɔ prɛd, ɛn nɔmal ia dɔn gro na di ples, na wɛl i dɔn wɛl so, ɛn di man we de mek sakrifays fɔ pipul sin go lɛ ɔlman no se i klin na PAPA GƆD yay.

³⁸ I se if man ɔ uman gɛt smɔl smɔl mak dɛn nain bɔdi,

³⁹ di man we de mek sakrifays fɔ pipul sin fɔ ɛgzamin am, ɛn if di smɔl smɔl mak dɛn tan lɛk mak dɛn we de lɔs, dɛn na ɛmti mak, i klin na PAPA GƆD yay.

⁴⁰ I se if man ia rut kɔmɔt midul in ed, i gɛt bɔled bɔt i klin na PAPA GƆD yay.

⁴¹ Ɛn if in frɔnt ia nain ed sɛf nɔ de, na bɔled i gɛt bɔt i klin na PAPA GƆD yay.

⁴² Bɔt if pan di bɔled, wɛda na midul di ed ɔ nain fɔrɛd i gɛt wan mak we mek wayt ɔ rɛd, na bad sik de kɔmɔt midul in ed ɔ in fɔrɛd so.

⁴³ Di man we de mek sakrifays fɔ pipul sin go ɛgzamin am, ɛn if di bɔled tan lɛk we pɔsin gɛt bad sik nain bɔdi,

⁴⁴ i gɛt bad sik, i nɔ klin na PAPA GƆD yay; di man we de mek sakrifays fɔ pipul sin go lɛ ɔlman no se i nɔ klin na PAPA GƆD yay bikɔs i gɛt bad sik nain ed.

⁴⁵ Di man we gɛt di bad sik go wɛr chɛr chɛr klos fɔ sho se i nɔ gladi ɛn lɛf in ia chakachaka wan nain ed ɛn kɔba af in fes de ala se, “Una gi rod! A nɔ klin na PAPA GƆD yay!”

⁴⁶ Na so i go de te i wɛl; nain wan go tap bay insɛf bɔt nɔto insay di kamp.

Wetin Fɔ Du If Yu Klos Miliju?

⁴⁷ Wɛn klos miliju, wɛda na wul ɔ na linin matirial,

⁴⁸ na ɛnisay pan di matirial, ɔ lɛda,

⁴⁹ if di tin we de nain bɔdi sho grin ɔ rɛd nain klos, wɛda na di wul ɔ di linin ɔ na lɛda, na bad sik nain bɔdi ɛn i go sho di man we de mek sakrifays fɔ pipul sin.

⁵⁰ Ɛn di man we de mek sakrifays fɔ pipul sin go ɛgzamin am ɛn mek i nɔ miks wit ɔda pipul fɔ sɛvin de;

⁵¹ dɛn i go ɛgzamin am bak di de we mek sɛvin. If di bad sik dɔn prɛd go pan di klos, wɛda na di wul ɔ na di linin ɔ lɛda, na sik we i kin gi ɔda pɔsin; i nɔ klin na PAPA GƆD yay.

⁵² Ɛn i go bɔn di klos wɛda na wul ɔ linin matirial ɔ na lɛda, bikɔs na sik we i kin gi ɔda pɔsin; na fɔ bɔn am na faya.

⁵³ Bɔt if we di man we de mek sakrifays fɔ pipul sin ɛgzamin am, ɛn di sik nɔ prɛd go pan di wul ɔ linin matirial ɔ lɛda,

⁵⁴ dɛn di man we de mek sakrifays fɔ pipul sin go mek dɛn was am ɛn i nɔ go mek i miks wit pipul fɔ sɛvin de mɔ;

⁵⁵ ɛn di man we de mek sakrifays fɔ pipul sin go ɛgzamin am bak afta dɛn was am. Ɛn if di ples usay di sik de nɔ chenj kɔla bɔt stil grin ɔ rɛd, pan ɔl we i nɔ prɛd mɔ, i nɔ klin na PAPA GƆD yay; na fɔ bɔn am na faya i lɛk sɛf di miliju de insay di klos ɔ na do i de.

⁵⁶ Bɔt if we di man we de mek sakrifays fɔ pipul sin ɛgzamin am, if di sik mak mek lɛk i lɔs, na usay di miliju mek nɔmɔ i go chɛr kɔmɔt wɛda na pan wul ɔ linin matirial ɔ na lɛda;

⁵⁷ dɛn if i mek bak pan di klos, wɛda na di wul ɔ di linin matirial ɔ di lɛda, na prɛd i de prɛd; na fɔ bɔn di klos na faya.

⁵⁸ Ɛniwe, if we pɔsin was di wul ɔ linin matirial, ɛn di lɛda, di miliju lɔs, na fɔ was am bak di sɛkɛn tɛm, ɛn da tɛm de, di pɔsin klin na PAPA GƆD yay.

⁵⁹ Na di lɔ dɛn dis if pɔsin in klos we na wul ɔ linin matirial ɔ na lɛda miliju, ɛn fɔ no if i klin ɔ i nɔ klin na PAPA GƆD yay.