Lɛvitikɔs 11 - Krio Fɔs Oli Baybul

Wetin Fɔ It Ɛn Wetin nɔ Fɔ It

¹ PAPA GƆD tɛl Mozis ɛn Erɔn,

² fɔ tɛl di Izrɛlayt dɛn se na dɛn wan ya pan di animal dɛn we de na wɔl dɛn fɔ it.

³ I fayn fɔ it animal we tan lɛk se in fut plit midul, ɛn we kin de cham ɔltɛm.

⁴ Bɔt nɔto ɛniwan we de cham ɔltɛm ɔ we in fut plit midul fɔ it. Nɔ fɔ it dɛn wan ya: kamɛl, dat na bikɔs pan ɔl we i de cham ɔltɛm, i nɔ gɛt fut we plit midul. I nɔ klin na PAPA GƆD yay.

⁵ Nɔ fɔ it rɔk badja, dat na wan animal we de nia Ist ɛn Nɔth Afrika ɛn we kin de it gras. Dis na bikɔs pan ɔl we i de cham ɔltɛm, i nɔ gɛt fut we plit midul. I nɔ klin na PAPA GƆD yay.

⁶ Nɔ fɔ it wan ɔda kayn animal we dɛn kɔl ɛa bikɔs pan ɔl we i de cham ɔltɛm, insɛf nɔ gɛt fut we plit midul. Insɛf nɔ klin na PAPA GƆD yay.

⁷ Nɔ fɔ it bush ɔg bikɔs pan ɔl we in fut dɛn plit midul, i nɔ de cham ɔltɛm. I nɔ klin na PAPA GƆD yay.

⁸ Nɔ fɔ it dɛn animal ya dɛn bif ɛn nɔ fɔ ivin tɔch di wan we dɔn day; dɛn nɔ klin na PAPA GƆD yay.

⁹ I se na dɛn wan ya we de na wata fɔ it. Ɔltin we gɛt fin ɛn skel. Di wan dɛn we de na si ɔ na riva, yu kin it dɛn.

¹⁰ Nɔ fɔ it ɛnitin we de na wata bɔt we nɔ gɛt fin ɛn skel wɛda i de wit ɔda wan dɛn ɔ i gɛt layf. Fɔ et ɔl.

¹¹ Fɔ et dɛn ɔl; nɔ fɔ it dɛn bif ɛn nɔ fɔ tɔch dɛn day wan.

¹² Fɔ et ɔltin we de na wata we nɔ gɛt fin ɛn skel na abɔmineshɔn to yu.

¹³ Una nɔ fɔ it dɛn bɔd dɛn ya. Dɛn na abɔmineshɔn to PAPA GƆD: ak, yuba, kɔkɔ,

¹⁴ big bɔd we de flay lɛkɛ kayt we dɛn kin kɔl kayt, ɛn

¹⁵ dɛn difrɛn gridi bɔd dɛn we dɛn kɔl revɛn,

¹⁶ da bɔd we dɛn kin kɔl ɔstrich, difrɛn kayn ak, dɛn bɔd dɛn we kin de togɛda de flay oba wata fɔ kech fish we dɛn go it,

¹⁷ kɔkɔ, da blak bɔd we gɛt lɔŋ nɛk we kin de flay oba wata, wan ɔda kayn bɔd we tap nia wata, i gɛt lɔŋ nɛk, lɔŋ fut ɛn in bik sɛf lɔŋ,

¹⁸ wata fɔl, kaw enjɛl, wan kayn yuba

¹⁹ ɛn bat

²⁰ Ɔl insɛkt we gɛt fɛda ɛn de waka wit fo fut na abɔmineshɔn.

²¹ Pan di insɛkt dɛn we gɛt fɛda ɛn de waka wit fo fut, una kin it dɛn wan dɛn we gɛt lɛg ɔp dɛn fut we dɛn kin tek jomp.

²² Fɔ it ɛni kayn lokɔs, ɛni kayn krikit ɔ grasɔpa.

²³ Bɔt fɔ et ɔl di ɔda kayn insɛkt dɛn we gɛt fɛda ɛn de waka wit fo fut.

²⁴ I se if dɛn du dɛn tin ya, dɛn nɔ go klin na PAPA GƆD yay: ɛnibɔdi we tɔch di animal ɔ insɛkt in day wan nɔ go klin na PAPA GƆD yay te ivintɛm,

²⁵ ɛn if ɛnibɔdi tot ɛni pat pan dɛn day wan, i fɔ was in klos ɛn i nɔ go klin na PAPA GƆD yay te ivintɛm.

²⁶ Ɔl animal we in fut plit midul bɔt gɛt sus ɔ nɔ de cham ɔltɛm nɔ klin na PAPA GƆD yay; ɛnibɔdi we tɔch dɛn insɛf nɔ go klin na PAPA GƆD yay.

²⁷ Pan di animal dɛn we de waka wit fo fut, di wan dɛn we de put dɛn fo fut flat na grɔn nɔ klin na PAPA GƆD yay ɛn if pɔsin tɔch dɛn day wan, insɛf nɔ go klin na PAPA GƆD yay te ivintɛm,

²⁸ ɛn if pɔsin tot dɛn day wan, i fɔ was in klos, dɔn i nɔ go klin na PAPA GƆD yay te ivintɛm; dɛn nɔ klin na PAPA GƆD yay.

²⁹ Dɛn smɔl smɔl animal dɛn ya we de na wɔl nɔ klin na PAPA GƆD yay: wivul, arata, ɔl kayn kondo,

³⁰ os pikin, krɔkɔdayl we nɔ de na wata, ɛn di kɔmiɛl.

³¹ Dɛn nɔ klin na PAPA GƆD yay ɛn ɛnibɔdi we tɔch dɛn we dɛn dɔn day nɔ go klin na PAPA GƆD yay te ivintɛm.

³² Fɔ put ɛnitin wɛda na tin we dɛn mek wit bod ɔ pisis ɔ lɛda ɔ bag ɔ ɛnitin we dɛn de put tin insay fɔ yus, we di day wan fɔdɔm pan, na wata ɛn i nɔ go klin na PAPA GƆD yay te ivintɛm; dɔn i go klin na PAPA GƆD yay.

³³ Ɛn if ɛniwan fɔdɔm insay sɔntin we dɛn tek kle mek, ɔl wetin de insay de nɔ go klin na PAPA GƆD yay, na fɔ brok am.

³⁴ If i tɔch ɛnitin we na tin fɔ it we de na di wata we bin de insay di pɔt i nɔ go klin na PAPA GƆD yay; ɛni drink sɛf we fɔ drink bɔt we kɔmɔt na dɛn tin we dɛn mek wit bod, pisis, lɛda ɔ bag sɛf nɔ klin na PAPA GƆD yay.

³⁵ Ɛn ɔltin we ɛni pan dɛn day pat tɔch nɔ go klin na PAPA GƆD yay; i lɛk wetin dɛn tek mek am, na fɔ brok am pis pis; dɛn nɔ klin na PAPA GƆD yay ɛn dɛn nɔ go klin to ɛnibɔdi.

³⁶ Pan ɔl we di wɛl we dɛn dig fɔ kip wata go klin na PAPA GƆD yay, if day bɔdi fɔdɔm insay ɛn pɔsin tɔch di day bɔdi, i nɔ go klin na PAPA GƆD yay.

³⁷ Ɛn if di day wan fɔdɔm pan sid we na fɔ plant, ɛn dɛn plant am, i klin na PAPA GƆD yay.

³⁸ Bɔt if dɛn dɔn sok di sid na wata bifo di day bɔdi tɔch am, i nɔ klin na PAPA GƆD yay.

³⁹ If animal we pɔsin kin it ɔdinari wan day ɛnibɔdi we tɔch di day wan nɔ go klin na PAPA GƆD yay te ivintɛm,

⁴⁰ ɛn if pɔsin it pan di day wan, i fɔ was in klos ɛn i nɔ go klin na PAPA GƆD yay te ivintɛm; dɔn bak, di wan we tot di day bɔdi insɛf fɔ was in klos ɛn i nɔ go klin na PAPA GƆD yay te ivintɛm.

⁴¹ Fɔ et dɛn ɔda tin dɛn ya; nɔ fɔ it dɛn.

⁴² Ɛnitin we nain bɛlɛ i de tek waka, ɛnitin we de waka flat na grɔn wit fo fut, ɛnitin we gɛt bɔku fut ɛn ɔl dɛn tin dɛn kin waka na grɔn, nɔ fɔ it dɛn bikɔs dɛn na abɔmineshɔn.

⁴³ I se dɛn nɔ fɔ it dɛn kayn tin de we go mek i et dɛn; dɛn nɔ fɔ mek dɛn tin de ambɔg dɛn bikɔs dɛn nɔ go klin na PAPA GƆD yay.

⁴⁴ I se in na PAPA GƆD we na dɛn Gɔd. I se so dɛn fɔ de klin wan fɔ am ɛn tan lɛk am bikɔs in na oli Gɔd. I se dɛn nɔ fɔ tek dɛn tin dɛn we de krip na wɔl fɔ ambɔg dɛnsɛf.

⁴⁵ I se, in na PAPA GƆD we na di PAPA GƆD we pul dɛn kɔmɔt pan slev layf na Ijipt fɔ mek i bi dɛn PAPA GƆD so dɛn fɔ bi difrɛn frɔm ɔda pipul dɛn lɛk am.

⁴⁶ Na di lɔ dɛn dis bɔt dɛn animal, bɔd ɛn ɔltin we gɛt layf we de na wata ɛn ɔl dɛn smɔl smɔl tin we de pas pas na wɔl,

⁴⁷ so dat pɔsin go no uswan klin na PAPA GƆD yay ɛn uswan nɔ klin na PAPA GƆD yay, uswan fayn fɔ it ɛn uswan nɔ fayn fɔ it.