Lɛvitikɔs 1 - Krio Fɔs Oli Baybul

Fɔ Bɔn Di Sakrifays Wanol Wan

¹ PAPA GƆD kɔl Mozis ɛn tɔk to am we i de na di Tɛnt usay dɛn kin mit PAPA GƆD. I se,

² mek i tɛl di Izrɛlayt dɛn se, wɛn ɛni man de briŋ in ɔfrin to PAPA GƆD. I kin briŋ kaw, ship ɔ got.

³ If di animal we i de ɔfa, na pan di wan dɛn we i de mɛn, ɛn na bɔn i de bɔn am, i fɔ bi man wan we nɔ gɛt bɔt; na di Tɛnt we dɛn kin mit PAPA GƆD, in domɔt, dɛn fɔ ɔfa am so dat PAPA GƆD go gri fɔ tek am;

⁴ i fɔ put in an na di ɔfrin we i de bɔn in ed, ɛn dɛn i go tek am fɔ beg padin fɔ in sin.

⁵ Na da tɛm de i go kil di man kaw bifo PAPA GƆD; dɔn Erɔn in bɔypikin we na man dɛn we de mek sakrifays fɔ pipul sin go gi di blɔd ɛn ib pan an rawnd di ɔlta we de na di domɔt na di Tɛnt usay dɛn kin mit PAPA GƆD.

⁶ Dɔn di man we de mek di sakrifays go kɔt kɔt di animal smɔl smɔl;

⁷ ɛn Erɔn we na di man we de mek sakrifays fɔ pipul sin, in bɔypikin dɛn go put wud na di faya aw dɛn fɔ de,

⁸ ɛn Erɔn in bɔypikin dɛn go put faya na di ɔlta ɛn le di wud dɛn pantap; dɔn dɛn go put di ed, ɛn di fat we dɛn dɔn kɔt kɔt pantap di wud na di faya lɛk aw dɛn fɔ de;

⁹ bɔt dɛn go was in gɔt ɛn lɛg dɛn wit wata. Dɔn di man we de mek sakrifays fɔ pipul sin go bɔn am wanol wan; na bɔn sakrifays, na sakrifays we dɛn mek na faya ɛn i go pul fayn sɛnt we go mek PAPA GƆD gladi.

¹⁰ If di prɛzɛnt we i de gi na frɔm di got ɛn ship we i de mɛn, i fɔ bi man ɛn i nɔ fɔ gɛt bɔt;

¹¹ ɛn na di nɔth sayd pan di ɔlta i go kil am bifo PAPA GƆD ɛn Erɔn in bɔypikin dɛn we na man dɛn we de mek sakrifays fɔ pipul sin, go ib di blɔd rawnd di ɔlta.

¹² Dɔn di man we de mek di sakrifays go kɔt kɔt am wit in ed ɛn in fat, ɛn di man we de mek sakrifays fɔ pipul sin in naw go le le dɛn pantap di wud we de na di faya na di ɔlta;

¹³ bɔt fɔ was di gɔt ɛn di lɛg wit wata. Dɔn di man we de mek sakrifays fɔ pipul sin go bɔn di wanol wan na di ɔlta; na bɔn sakrifays, na sakrifays we dɛn mek na faya ɛn i go pul fayn sɛnt we go mek PAPA GƆD gladi.

¹⁴ If na bɔd dɛn na di ɔfrin to PAPA GƆD, na bush pijin wit ɔdinari pijin fɔ gi.

¹⁵ Di man we de mek sakrifays fɔ pipul sin fɔ twis in ed bifo i bɔn am na di ɔlta ɛn i fɔ dren in blɔd na di ɔlta sayd;

¹⁶ dɔn i go pul di bɔd in gɔt wit in fɛda dɛn ɛn put dɛn kɔna di ɔlta bay di ist sayd usay dɛn kin put ashis;

¹⁷ i go ol di bɔd ɛn jɔg in fɛda dɛn kɔmɔt bɔt nɔto ɔl i go pul. Di man we de mek sakrifays fɔ pipul sin go bɔn am na di ɔlta, pantap di wud we de na di faya; na bɔn sakrifays we dɛn mek na faya. I go pul fayn sɛnt we go mek PAPA GƆD gladi.