Lamɛnteshɔn 5 - Krio Fɔs Oli Baybul

Prea Fɔ Masi

¹ PAPA GƆD, mɛmba ɔl wetin dɔn bi to wi; luk wi ɛn si we wi dɔn disgres!

² Dɛn dɔn gi ɔl wetin wi gɛt to trenja dɛn, na fɔrina dɛn gɛt wi os dɛn.

³ Wi dɔn bi pikin dɛn we nɔ gɛt mami ɛn dadi, wi nɔ gɛt papa; wi mama dɛn dɔn tɔn uman dɛn we dɛn man dɛn dɔn day.

⁴ Na pe wi de pe fɔ di wata we wi de drink; wi de pe fɔ di wud we wi de yuz.

⁵ Di ebi ebi wok we wi de wok de mɔna wi; wi dɔn taya, chans nɔ de fɔ blo.

⁶ Na bega bega wi de bega bega to Ijipit ɛn Asiria mek wi go it bɛlful.

⁷ Wi papa dɛn we kɔmit di sin dɔn day; na wi de gɛt di pɔnishmɛnt.

⁸ Slev dɛn de rul wi; nɔbɔdi nɔ de fɔ pul wi kɔmɔt na dɛn an.

⁹ Wi de risk wi layf fɔ go fɛn it fɔ it bikɔs dɛn de kil pipul dɛn na di dray ɛn ɛmti ples we pɔsin nɔ go ebul tap.

¹⁰ Di aŋri so de mɔna wi dat wi bɔdi wam lɛk udat de na ovin.

¹¹ Dɛn de rabish uman dɛn na Zayɔn; vajin dɛn na di siti dɛn na Juda.

¹² Dɛn de ɛŋ wi bigman dɛn wit dɛn an; dɛn nɔ gi dɛn wan rɛspɛkt.

¹³ Dɛn de fos yɔŋman dɛn fɔ gren na di mil ɛn dɛn lili bɔbɔ dɛn, ebi ebi wud fɔ tot.

¹⁴ Di ol man dɛn nɔ de sidɔm na di siti get fɔ jɔj kes igen, ɛn di yɔŋman dɛn nɔ de ple dɛn myuzik igen.

¹⁵ Wi nɔ gɛt natin we de mek wi gladi igen; wi dans we wi bin de dans dɔn tɔn bɛrin.

¹⁶ Ɔl wi blɔf dɔn dɔn; wi dɔn gɛt wahala bikɔs wi dɔn kɔmit sin.

¹⁷ Dat dɔn mek wi at pwɛl, wi nɔ de si bikɔs wata ful wi yay,

¹⁸ bikɔs ɔlman dɔn kɔmɔt lɛf Mawnt Zayɔn; na wulf dɛn de pas pas de.

¹⁹ Bɔt yu PAPA GƆD go ren sote go; yu tron go de frɔm jɛnareshɔn to jɛnareshɔn.

²⁰ Wetindu yu dɔn fɔgɛt bɔt wi ɔltogɛda, wetindu yu dɔn fɔsek wi so?

²¹ Briŋ wi kam bak to yu PAPA GƆD, so dat wi go de bak to yu! Mek wi de lɛk aw wi bin de fɔstɛm.

²² Adinɔ yu dɔn push wi kɔmɔt nia yu ɔltogɛda wan. Yu dɔn vɛks pan wi bad bad wan?