Lamɛnteshɔn 4 - Krio Fɔs Oli Baybul

Jerusɛlɛm De Broko Wan

¹ Luk aw wi gold dɛn dɔn dɔl, aw piɔ gold dɔn chenj! Di oli ston dɛm ɔl skata na ɔl dɛn trit jɔnkshɔn.

² Zayɔn in yɔŋman dɛn we na dɛn bɔlyay, tan lɛk fayn gold to dɛn, na so dɛn si dɛn lɛk kɔntri pɔt we na dɛn man dɛn we de mek kle tin dɛn, mek dɛn!

³ Jakal we na jakal sɛf de gi pikin bɔbi, dɛn de sɔkul dɛn bebi dɛm, bɔt mi pipul dɛn gyalpikin de trit pipul bad naw, jɛs lɛk da bɔd we dɛn kɔl Ɔstrich we de na di dray ɛn ɛmti ples we pɔsin nɔ go ebul tap.

⁴ Dɛn yɔŋ bebi dɛn tɔŋ kin fasin ɔp di pikin dɛn mɔt bikɔs dɛn tɔsti; di pikin dɛn de beg it fɔ it, bɔt nɔbɔdi nɔ de gi dɛm.

⁵ Di wan dɛn we bin de it dɛn pɔsh pɔsh it de day na trit; di wan dɛn we bin gɛt ɔltin we dɛn de kam ɔp naw de fɛn tin na dɔtibɔks fɔ it.

⁶ Di pɔnishmɛnt we yu gi di pipul dɛn na Jerusɛlɛn fɔ di bad we dɛn du, traŋa pas di pɔnishmɛnt we yu gi Sɔdɔm, ples we nɔ bin tek wan minit fɔ tɔnoba, ɛn mɔtalman an nɔ bin de de.

⁷ Di bigman dɛn na Jerusɛlɛm bin klin na PAPA GƆD yay pas sno, dɛn wayt pas milk; dɛn bɔdi bin rɛd pas kɔral bid dɛn shep bin fayn lɛk safaya.

⁸ Bɔt naw, dɛn fes dɛn blak pas da blak blak we de kɔmɔt pan palamp; we yu si ɛniwan na trit yu nɔ go no se na im; dɛn bɔdi ɔl dɔn dɔn, na soso bon bon lɛf, wan ɔyl nɔ de sho na dɛn bɔdi.

⁹ Di wan dɛn we dɛn bin kil na di wa bɛtɛ pas di wan dɛn we aŋri kil, we aŋri mɔna te dɛn day bikɔs dɛn nɔ gɛt it fɔ it.

¹⁰ Uman dɛn we bin gɛt sɔri-at fɔ pipul kuk dɛn yon pikin dɛn; na dɛn bin tɔn di it we dɛn de it di tɛm we dɛn bin nyakanyaka Jerusɛlɛm.

¹¹ PAPA GƆD pul ɔl in vɛksteshɔn pan Jerusɛlɛm, i pul ɔl in wamat pan am; i mek faya kech Jerusɛlɛm we bɔn am to asis.

¹² Di kiŋ dɛn na dis wɔl nɔ biliv, nɔbɔdi na wɔl nɔ biliv se ɛnimi dɛn go ebul pas di get go insay Jerusɛlɛm.

¹³ Dis na fɔseka di sin we in prɔfɛt dɛn kɔmit ɛn di bad bad tin dɛn we di man dɛn we de mek sakrifays fɔ pipul sin, we kil pipul dɛn we de waka tret wit PAPA GƆD, insay Jerusɛlɛm.

¹⁴ Dɛn de waka ɔp ɛn dɔŋ na trit lɛk blɛnyay man we nɔ no usay i de go, dɛn dɔti na PAPA GƆD yay wit soso blɔd na dɛn ed we mek nɔbɔdi nɔ wan tɔch dɛn klos sɛf.

¹⁵ Pipul dɛn de ala pan dɛn se, “Kɔmɔt na ya, yu we dɔti na PAPA GƆD yay; “Kɔmɔt na ya! Kɔmɔt na ya! Nɔ tɔch mi!” So dɛn tɔn pipul we dɛn nɔ want na ples ɛn jɛs de wirɔn ɔp ɛn dɔŋ; pipul dɛn ɔloba di wɔl de tɔk se, “Dɛn nɔ fit fɔ tap wit pipul dɛn igen”

¹⁶ Na PAPA GƆD in sɛf sɛf skata dɛn, i nɔ bisin bɔt dɛn igen; di man dɛn we de mek sakrifays fɔ pipul sin nɔ bin gɛt wan rɛspɛkt igen, nɔbɔdi nɔ bin de du di bigman dɛn gud igen

¹⁷ Wi taya fɔ de luk ɔltɛm fɔ natin se pipul dɛn go kam ɛp wi; we wi bin de wet de abop pan kɔntri we nɔ ebul ɛp wi.

¹⁸ Man dɛn bin de tek wi tale we mek wi fred fɔ waka na trit go ɛnisay; bɛtɛ tɛm nɔ bin de fɔ wi igen; na tu tri de bin lɛf; bikɔs wi tɛm bin dɔn dɔn.

¹⁹ Di wan dɛn we bin wan kil wi bin fast pas aw yuba de flay na di skay; dɛn rɔnata wi na dɛn il dɛn, dɛn ambush wi na di dray ɛn ɛmti ples we pɔsin nɔ go ebul tap.

²⁰ Di pɔsin we tan to wi lɛk di briz we wi de blo, di wan we PAPA GƆD dɔn pik, sɛf, dɛn kapchɔ am lɛk animal, di wan we wi bin de tɔk se, “Na ɔnda in bana wi go ebul de lɛk ɔda neshɔn dɛn”

²¹ Una gladi o, pipul dɛn na Idɔm, una gladi, di pipul dɛnsɛf na Ɔz una gladi; bɔt di sɔfrin go pas to una wande; una go drɔnk ɛn trip unasɛf nekɛd.

²² Zayɔn in gyal pikin, di pɔnishmɛnt we una fɔ gɛt fɔ di bad tin dɛn we una du, una dɔn gɛt am dɔn, i nɔ go mek una de ɛgzayl igen; bɔt yu Idɔn in gyal pikin, i go pɔnish una fɔ di bad tin dɛn we una de du i nɔ go ayd una sin dɛn.