Lamɛnteshɔn 3 - Krio Fɔs Oli Baybul

Pɔnishmɛnt ɛn Abop

¹ Mi na di man we dɔn si trɔbul na PAPA GƆD in an we i vɛks;

² i dɔn push mi go insay dak ples ɛn mek a waka na rod we nɔ gɛt layt;

³ I de bit mi bad bad wan, ol de, i de bit bit mi.

⁴ I dɔn mek ɔl mi bɔdi dɔn dɔn, ɛn dɔn brok brok mi bon dɛn;

⁵ i dɔn put mi wanples ɛn put so so wahala na mi layf;

⁶ i dɔn mek a de na dak ples lɛk dɛn ol ol grev.

⁷ I dɔn bil wɔl rawnd mi so a nɔ go ebul ɛskep; i dɔn chen mi wit ebi ebi chen;

⁸ ɔl we a de kray fɔ lɛ dɛn ɛp mi, i nɔ de tek mi prea;

⁹ I dɔn blɔk mi rod wit ston dɛn we dɛn shep fayn, i mek mi rod bɛn bɛn.

¹⁰ I tan to mi lɛk bia we de wet fɔ kech bif, ɛn lɛk we layɔn kin tek kɔva;

¹¹ i drɛg mi kɔmɔt na di rod ɛn chɛr pis pis; i dɔn lɛf mi wan to misɛf;

¹² i bɛn in bo ɛn tek mi mek in tagɛt fɔ in aro.

¹³ I faya aro dɛn go insay mi at; aro dɛn we i pul nain aro bag;

¹⁴ A dɔn tɔn rederaun, na mi pipul dɛn de tek mek fɔn ol de.

¹⁵ I mek a de sɔfa bad bad wan lɛk udat dɛn fos fɔ swɛla gbangba.

¹⁶ I dɔn mek a bɛt ston ston we dɔn brok mi tit, ɛn put mi na di dɔst na grɔn fɔ sho se mi na natin;

¹⁷ Dɛn dɔn mek a nɔ gɛt wan pis, A dɔn fɔgɛt wetin gladi gladi min;

¹⁸ na dat mek a se, “A nɔ gɛt natin fɔ sho igen, ɛn a nɔ abop pan PAPA GƆD igen,”

¹⁹ Mɛmba di sɔfa we a de sɔfa, we tan lɛk we dɛn fos pɔsin fɔ drink gbangba!

²⁰ A de mɛmba dat ɔltɛm we de mek mi at pwɛl.

²¹ Di tin we a kin mɛmba we mek a kin abop,

²² na PAPA GƆD in lɛknɛs fɔ mɔtalman we nɔ de dɔn, in sɔri-at nɔ de dɔn atɔl;

²³ ɛvri mɔnin na nyu wan i de gɛt fɔ wi; in tret waka we i de waka in kayn nɔ de.

²⁴ Mi sol se, “na PAPA GƆD a gɛt, so nain nɔmɔ a go abop pan.”

²⁵ PAPA GƆD gud to di wan dɛn we biliv am, dat na di pɔsin we de pre to am.

²⁶ I gud lɛ pɔsin peshɛnt wet lɛ PAPA GƆD sev am.

²⁷ I gud lɛ pɔsin ebul bia tin dɛn we kin mit am we i yɔŋ.

²⁸ Mek i sidɔm saful de luk we PAPA GƆD mek dɛn tin dɛn de mit am;

²⁹ mek i put insɛf dɔŋ sɔntɛnde, op go de;

³⁰ mek i tɔn in jɔ gi di wan we de slap mek dɛn du ɛnitin to am.

³¹ PAPA GƆD nɔ go ib wi oba te go,

³² bɔt, ɔl we i de mek wi sɔfa, i go sɔri fɔ wi fɔseka di tumɔs lɛk we i lɛk wi we nɔ de shek;

³³ bikɔs nɔto wit ɔl in at i kin du bad tin ɔ pwɛl mɔtalman.

³⁴ Fɔ du bad to ɔl di prizina dɛn na di wanol wɔl,

³⁵ fɔ tek pɔsin in rayt gi ɔda pɔsin bifo PAPA GƆD we ay pas ɔl in fes,

³⁶ fɔ lɛ dɛn nɔ gri lɛ pɔsin gɛt in rayt, PAPA GƆD nɔ de gri fɔ dat.

³⁷ Udat dɔn tɔk se na so i fɔ bi ɛn i bi, nɔbɔdi pas PAPA GƆD we dɔn se na so i fɔ bi.

³⁸ Nɔto PAPA GƆD in mɔt gud tɔk ɛn bad tɔk de kɔmɔt.

³⁹ Wetindu pɔsin we gɛt layf fɔ kɔmplen, yu mɔtalman, bɔt di pɔnishmɛnt we i de gɛt fɔ in sin?

⁴⁰ Mek wi wach ɛn luk gud, di we we wi de du tin ɛn kam bak to PAPA GƆD!

⁴¹ Lɛ wi es wi an ɔp ɛn pre to PAPA GƆD we de na ɛvin:

⁴² “Wi dɔn du bad ɛn dɔn kɔmɔt biɛn yu, ɛn yu nɔ fɔgiv wi.

⁴³ “Yu dɔn rap yusɛf wit vɛksteshɔn ɛn dɔn rɔnata wi de kil wi yu nɔ luk biɛn;

⁴⁴ yu so mek yusɛf agens wi dat ivin we wi pre, yu nɔ de ebul yɛri wi.

⁴⁵ Yu dɔn mek wi luk lɛk dɔti we dɛn krep trowe, na ɔl di ɔda pipul dɛn yay

⁴⁶ “Ɔl wi ɛnimi dɛn de provok wi wit bad at;

⁴⁷ Fred ɛn trɔbul dɔn mit wi, dɛn de nyakanyaka ɔlsay;

⁴⁸ Bɔku bɔku wata de kɔmɔt na mi yay we a de kray bikɔs dɛn dɔn nyakanyaka mi pipul dɛn gyal pikin.

⁴⁹ Wata nɔ go tap fɔ kɔmɔt na mi yay, i nɔ go tap,

⁵⁰ tete PAPA GƆD we kɔmɔt ɛvin luk dɔŋ ɛn si wetin de apin;

⁵¹ mi yay de mek mi at de pwɛl we a de si wetin dɔn apin to di yɔŋgyal dɛn na mi siti.

⁵² “Dɛn dɔn fɛn mi lɛk bɔd fɔ kil mi, dat na di wan dɛn we tek mi mek ɛnimi fɔ natin;

⁵³ dɛn trowe mi insay dip dip ol we a nɔ day yet ɛn wap wap mi wit ston;

⁵⁴ wata kɔba mi nain a se, ‘mi mami a day.’

⁵⁵ “A pre to yu, E PAPA GƆD, we a bin de na da dip dip ol de;

⁵⁶ yu yɛri we a de beg yu se, ‘Duya nɔ sɛt yu yes pan mi we a de kray lɛ yu ɛp mi!

⁵⁷ ‘Yu bin kam nia mi we a kɔl yu; yu bin se, ‘Nɔ fred!’

⁵⁸ PAPA GƆD, yu dɔn tek mi kes yu dɔn gi mi mi layf bak.

⁵⁹ PAPA GƆD, yu dɔn si ɔl di bad tin dɛn we dɛn de du mi; bi di jɔj.

⁶⁰ “Yu dɔn si ɔl di wamat we dɛn de pul pan mi, ɔl di kayn we we dɛn de fɛn fɔ du mi bad.

⁶¹ “PAPA GƆD, yu dɔn yɛri we dɛn de provok mi, ɔl di kayn we we dɛn de fɛn fɔ du mi bad.

⁶² Ol de, na mi di wan dɛn we wan kil mi de tɔk bɔt ɛn plan fɔ.

⁶³ Dɛn sidɔm o, dɛn grap o, na mi nem dɛn put na tebul.

⁶⁴ “Duya PAPA GƆD, pɔnish dɛn bay di kayn bad tin we dɛn dɔn du.

⁶⁵ Gi dɛm brok at; yu swɛ go de pan dɛm.

⁶⁶ PAPA GƆD, rɔnata dɛn wit wamat ɛn nyakanyaka dɛn na dis wɔl.