Lamɛnteshɔn 2 - Krio Fɔs Oli Baybul

Jerusɛlɛm In Pɔnishmɛnt

¹ We PAPA GƆD dɔn trɛtin di wanol Zayɔn we i vɛks! I dɔn nyakanyaka ɔl wetin Izrɛl de tek blɔf; di tɛm we i vɛks, i nɔ luk sɛf se na Jerusɛlɛm in tɛmpul de.

² PAPA GƆD nɔ luk biɛn sɛf; i nyakanyaka ɔl di pipul dɛn we bin de na Juda; we i vɛks, i brok brok ɔl di barik dɛn na Juda; i dɔn disgres di kindɔm ɛn di wan dɛn we de rul.

³ I vɛks bad bad wan pul ɔl di pawa we Izrɛl bin gɛt; i dɔn tap fɔ ɛp dɛn ɔl we dɛn ɛnimi dɛn de biɛn dɛn; i de wayl pan dɛn na Juda lɛk we faya de bɔn ɔltin we de rawnd am.

⁴ I dɔn rɛdi in bo fɔ shut wi lɛkɛ wi ɛnimi, i tek raytan rɛdi am lɛkɛ wi ɛnimi; ɛn i dɔn kil ɔl di wan dɛn we wi bin rɛspɛkt na dɛn yon os to dɛn yon pipul; i sho in bad bad vɛksteshɔn lɛk we faya de kech.

⁵ PAPA GƆD dɔn kan tan lɛk ɛnimi, i dɔn nyakanyaka Izrɛl; i dɔn nyakanyaka ɔl in kiŋ os dɛn, pwɛl di barik dɛn; ɛn i dɔn mek munin ɛn wɔndrin dɔn bɔku na Juda.

⁶ I dɔn brok in os lɛk we dɛn de brok fam os, pwɛl pwɛl ɔl di ples dɛn we dɛn de ol di difrɛn fist dɛm; PAPA GƆD dɔn mek dɛn tap di difrɛn difrɛn fist dɛn na Zayɔn ɛn di de we nɔ fɔ wok, ɛn we i vɛks, i dɔn pul ɔl wetin dɛn de tek blɔf pan ɔl dɛn kiŋ ɛn man dɛn we de mek sakrifays fɔ pipul sin.

⁷ PAPA GƆD dɔn pul rɛspɛkt kɔmɔt pan di ɔlta, i dɔn pul at kɔmɔt pan di ples we dɛn de pre; i dɔn put ɔl di wɔl dɛn ɛn kiŋ os dɛn na di ɛnimi dɛn an; dɛn gladi de ala na PAPA GƆD in os lɛk we dɛn kin du di tɛm dɛn we dɛn kin ol dɛn fist.

⁸ Fɔ sho se PAPA GƆD mek ɔp fɔ pwɛl Zayɔn in gyalpikin in wɔl kpatakpata; i mɛzhɔ di wɔl dɛn dɔn i brok dɛn; in an nɔ de trimbul sɛf we i de pwɛl; i mek di insay wɔl ɛn di wɔl na do de mɛmba ɛn kray; dɛn ɔltu lidɔm broko wan.

⁹ Di get dɛn dɔn sink go insay di grɔn; di ba dɛn ɔl dɔn brok brok; di kiŋ ɛn bigman dɛm ɔl de wit di ɔda pipul dɛn; lɔ nɔ de igen ɛn di prɔfɛt dɛn nɔ de gɛt vishɔn to PAPA GƆD igen.

¹⁰ Di bigman dɛn na Jerusɛlɛm sidɔm na grɔn kwayɛt wan; dɛn dɔn put dɔst na dɛn ed ɛn dɔn wɛr saklɔth; di yɔŋgyal dɛn na Jerusɛlɛm dɔn butu dɛn ed na grɔn.

¹¹ Kray dɔn mek mi yay taya; mi bɛlɛ de bwɛl; a gɛt tin we de mɔna mi na mi at bikɔs dɛn dɔn nyakanyaka Jerusɛlɛm, bikɔs pikin ɛn bebi dɛn de fent na di trit dɛn na di siti.

¹² Dɛn de kray aks dɛn mama dɛn se “We di bred? We di wayn?” We dɛn de fent lɛk man dɛn we wund, na di trit dɛn na di siti, we dɛn de day na dɛn mama dɛn an.

¹³ Wetin a go se bɔt yu, wetin a go tek kɔmpia yu yu Jerusɛlɛm in gyal pikin? Wetin a go tek se una fiba, so yu at go kol, yu vajingyal na Zayɔn? Di nyakanyaka we dɛn nyakanyaka yu, big lɛk di si; udat go ebul mek yu lɛk aw yu bin de?

¹⁴ Yu prɔfɛt dɛn dɔn si laylay vishɔn dɛn fɔ yu; dɛn nɔ bin tɔk bɔt di bad we yu bin de du so dat yu go gɛda yusɛf bɔt dɛn dɔn si dɛbul dɛn fɔ yu we na laylay ɛn kin mek yu du di rɔŋ tin.

¹⁵ Ɔlman we de pas kin shɔk we dɛn si yu; dɛn de sɔktit ɛn shek dɛn ed we dɛn si Jerusɛlɛm in gyal pikin; “Na di siti dis we dɛn bin de kɔl di wan we fayn pas ɔl, di gladi gladi na di wɔl?”

¹⁶ Ɔl yu ɛnimi dɛn de provok yu wit bad at; dɛn de sɔktit ɛn de gren dɛn tit, de ala se: “Wi dɔn nyakanyaka am! Yɛs, na di de dis we wi bin de wet fɔ; naw i dɔn bi; wi si am!”

¹⁷ PAPA GƆD dɔn du wetin i plan, i du wetin i bin trɛtin se in go du; as i bin dɔn mekɔp fɔ du lɔlɔntɛm, i dɔn brok i nɔ luk biɛn; i dɔn mek di ɛnimi laf yu, ɛn mek yu ɛnimi dɛn gɛt mɔ ɛn mɔ pawa.

¹⁸ Ala lawd lawd wan to PAPA GƆD yu Jerusɛlɛm in gyal pikin! Lɛ wata kɔmɔt na yu yay lɛk we big ren de kam ol de ɛn ol nɛt! Nɔ blo atɔl, nɔ gi yu yay nɔn blo blo!

¹⁹ Grap, ala we nɛt kam, dɛn twɛlv, tu ɛn fo oklɔk mɔnin so! Ɛmti yu at lɛk wata bifo PAPA GƆD! Es yu an ɔp to am fɔ dɛn pikin dɛn layf we aŋri de kil, na ɛni trit we yu tɔn.

²⁰ Luk PAPA GƆD, luk nɔmɔ lɛ yusɛf si! Na udat yu dɔn dil wit so? Uman dɛn fɔ it dɛn pikin dɛn, pikin dɛn we dɛn mɛn frɔm we dɛn smɔl? Pipul dɛn fɔ kil man ɔf PAPA GƆD dɛn usay dɛn de wɔship PAPA GƆD?

²¹ Yɔŋ ɛn ol pipul dɛn lidɔm na di dɔst na trit; dɛn dɔn kil mi yɔŋgyal ɛn yɔŋman dɛn; na di de we yu vɛks yu kil dɛn, yu kil yu nɔ luk biɛn.

²² Yu mek we, mek mi ɛnimi dɛn sɔrawnd mi lɛk we dɛn invayt pipul dɛn fɔ kam pati; ɛn di de we na di de we PAPA GƆD vɛks nɔbɔdi nɔ bin ebul balans ɔ sɔvayv; mi ɛnimi dɛn nyakanyaka di wan dɛn we a ple wit ɛn mɛn.