Lamɛnteshɔn 1 - Krio Fɔs Oli Baybul

Di Bad Tin Dɛn We Mit Jerusɛlɛm

¹ Eya, luk we Jerusɛlɛm ɛmti; ples we plɛnti pipul bin de. I dɔn tɔn lɛk uman we in man dɔn day; Ples we di wanol wɔl bin rɛspɛkt! Di siti we dɛn bin es ɔp pas ɔl, dɔn tɔn slev.

² Ebri nɛt, i kin de kray bita bita wan, wata de rɔn dɔŋ in fes. Pan ɔl in lɔva dɛm, nɔn nɔ lɛf fɔ koks am. Ɔl in padi dɛn dɔn ple am wayo, dɛn dɔn tɔn in ɛnimi.

³ Juda dɔn go ɛgzayl bikɔs dɛn trit am bad ɛn gi am traŋa traŋa wok; naw i tap wit fɔrin pipul dɛn, bɔt nɔ gɛt blo blo; ɛnimi dɛn de ɔlsay ɔl we i de sɔfa so.

⁴ Di rod dɛn we go Zayɔn de munin, bikɔs nɔbɔdi nɔ de go dɛn fist dɛn we PAPA GƆD bin se dɛn fɔ gɛt: ɔl in get dɛn ɛmti, di man dɛn we de mek sakrifays fɔ pipul sin jɛs de pini: dɛn dɔn drɛg ɔl in yɔŋgyal dɛn go, ɛn insɛf de sɔfa bad bad wan.

⁵ In ɛnimi dɛn dɔn bi in masta, in ɛnimi dɛn de go bifo, bikɔs PAPA GƆD dɔn mek i de sɔfa fɔ di bɔku sin dɛn we i dɔn kɔmit; dɛn dɔn kapchɔ ɛn kɛr in pikin dɛn go, as prizina dɛn na wa to dɛn ɛnimi.

⁶ Zayɔn in gyal pikin dɔn lɔs ɔl in fayn fayn luk ɛn rɛspɛkt. Di bigman dɛm dɔn tan lɛkɛ dɛn dia we nɔ ebul fɛn gras fɔ it; dɛn rɔnawe wik wik wan pan di pɔsin we de rɔnata dɛm.

⁷ We Jerusɛlɛm de sɔfa so ɛn de sɔk trɔbul, i mɛmba ɔl di dia dia tin dɛn we i bin gɛt lɔlɔntɛm. Di tɛm we in ɛnimi dɛn bin kapchɔ in pipul dɛn, ɛn nɔbɔdi nɔ bin de fɔ ɛp am, in ɛnimi dɛn laf am, de tek in dawnfɔl provok am.

⁸ Jerusɛlɛm bin dɔn kɔmit sin bad bad wan, we mek i bin dɔn dɔti na PAPA GƆD in yay; ɔl di wan dɛn we bin rɛspɛkt am bigin luk am lɛk natin, bikɔs dɛn dɔn si aw i tan; in sɛf sɛf de kray nain at, ɛn de ayd in fes.

⁹ Di dɔti we i dɔti na PAPA GƆD in yay bin de insay in skat; i nɔ bin tink se in go fɔdɔm wande; so i fɔdɔm bad bad wan, ɛn nɔbɔdi nɔ luk am. “E PAPA GƆD, luk we a de sɔfa, dɔn di ɛnimi in de gladi se in dɔn win!”

¹⁰ Di ɛnimi dɔn tif ɔl in dia dia tin dɛn; fɔ tru, i dɔn si ɔda neshɔn dɛn go insay di tɛmpul, pipul dɛn we yu PAPA GƆD dɔn se nɔ fɔ go insay usay yu pipul dɛn de wɔship yu.

¹¹ Ɔl in pipul dɛn de kray na dɛn at we dɛn de fɛn tin fɔ it; dɛn sɛl dɛn gud gud tin dɛn we dɛn bin kip, fɔ tin fɔ it so dat dɛn go gɛt trɛnk bak. “Luk mi PAPA GƆD, luk mi nɔmɔ, nɔbɔdi nɔ de luk mi lɛk bɛtɛ pɔsin igen”

¹² “I nɔ min natin to una, una dɛn pipul dɛn we de pas? Luk mi ɛn si if yu dɔn si pɔsin sɔfa so wande lɛk di kayn sɔfa we dɛn mek a de sɔfa, we PAPA GƆD put pan mi di de we i bin vɛks bad bad wan.

¹³ “PAPA GƆD sɛn faya kam dɔŋ pan mi we a fil insay mi bon dɛn; i kech mi wit trap; i mek a nɔ ebul go bifo; i mek a jɛs de wanples, wit pen ɔl di tɛm.

¹⁴ Dɛn tay ɔl di bad tin dɛn we a dɔn du, wan say lɛk ebi lod; na PAPA GƆD sɛf tay dɛn ɔl togɛda; i put dɛn ɔl na mi nɛk; I mek a wik dɔn i sɛl mi to pipul dɛn we a nɔ go ebul fɛt.

¹⁵ PAPA GƆD nɔ tek ɔl mi ebi ebi sojaman dɛn mek natin, man dɛn we de wit mi; i gɛda man dɛn agens mi fɔ kil mi yɔŋman dɛn; PAPA GƆD dɔn nyakanyaka di vajingyal dɛn na Juda lɛk we dɛn kin mas mas greps usay dɛn de mek wayn.

¹⁶ “Na dɛn tin ya mek a de kray; wata de rɔn mi yay; nɔbɔdi nɔ de we de koks mi atɔl, pɔsin we go gi mi kɔrej bak; mi pikin dɛn nɔ gɛt nɔbɔdi bikɔs mi ɛnimi dɔn nak mi dɔŋ.”

¹⁷ Zayɔn kɔl fɔ lɛ dɛn ɛp am bɔt nɔbɔdi nɔ ɛp am; Na PAPA GƆD dɔn tɔk agens Jekɔb se, in neba dɛn go bi in ɛnimi dɛm; Jerusɛlɛm dɔn tɔn dɔti ɛn smɛl tin to in neba dɛm.

¹⁸ “PAPA GƆD rayt fɔ wetin i du, bikɔs a dɔn tɔn mi bak pan in wɔd; bɔt pipul dɛn na di wanol wɔl, una ɔl lisin, ɛn si di sɔfa we a de sɔfa; mi yɔŋuman ɛn yɔŋman dɛn ɔl de na ɔda land lɛk slev.

¹⁹ “A sɛn to di wan dɛn we mi ɛn dɛn gɛ dat bɔt dɛn mek lɛk dɛn nɔ no mi; mi man dɛn we de mek sakrifays fɔ pipul sin ɛn di bigman dɛn, day na di siti we dɛn de fɛn it fɔ it lɛ dɛn nɔ go day.

²⁰ “Luk mi PAPA GƆD, a de sɔfa bad bad wan, mi bɛlɛ de bwɛl, mi at nɔ rɛst bikɔs a dɔn tɔn mi bak pan PAPA GƆD. Na trit, dɛn de kil pipul wit sɔd; na os, aŋri de kil pipul.

²¹ “Luk we a de pini: nɔbɔdi nɔ de fɔ koks mi. Ɔl mi ɛnimi dɛn dɔn yɛri bɔt mi wahala; dɛn ɔl gladi bikɔs na yu du mi so. Lɛ di de we yu bin dɔn se kam, ɛn lɛ mi ɛnimi dɛn sɔfa lɛk aw a de sɔfa.

²² “Lɛ yu si ɔl di bad tin dɛn we dɛn dɔn du; ɛn dil wit dɛn lɛk we yu dɔn dil wit mi fɔ di bad bad tin dɛn we a du; bikɔs a dɔn sɔfa plɛnti ɛn mi at dɔn pwɛl.”