Jɔshwa 9 - Krio Fɔs Oli Baybul

Di Gibɔnayt Dɛn Lay Gi Jɔshwa

¹ Ɔl di kiŋ dɛn we dɛn kɔntri dɛn de na di wɛst pat na Riva Jɔdan yɛri aw Izrɛl bin kɔnka dɛn ɛnimi. Di kiŋ dɛn ɔp di il ɛn di wan dɛn we de dɔŋ say na Palɛstayn, di wan dɛn we de na dɛn siti dɛn we de nia di Mɛditarenian Si ɛn di kiŋ dɛn we de fawe na di nɔth, dat na Libanɔn, sɛf bin yɛri bɔt dat. Di kiŋ dɛn we yɛri bɔt aw Izrɛl kɔnka dɛn ɛnimi dɛn na di Itayt kiŋ, di Amorayt dɛn kiŋ, di Kenanayt dɛn kiŋ, di Pɛrizayt dɛn kiŋ, di Ivayt dɛn kiŋ ɛn di Jɛbyusayt dɛn kiŋ.

² So dɛn ɔl mek wanwɔd fɔ fɛt Izrɛl.

³ Bɔt we di Ivayt pipul dɛn we de na Gibɛɔn yɛri wetin Jɔshwa dɛn du na Jɛriko ɛn Ay,

⁴ dɛn mek ɔp fɔ ple dɛn kɔni; dɛn pak plɛnti it, chɛr chɛr klos ɛn pach pach lɛda bag we dɛn kin put wayn lɛk udat kɔmɔt fa,

⁵ dɔn dɛn wɛr ol klos ɛn pach pach sandal. Ɔl di bred ɛn ɔda tin we dɛn pak fɔ it, bin dɔn dray ɛn meleju.

⁶ Nain dɛn go mit Jɔshwa dɛn usay dɛn kamp na Gilgal ɛn tɛl dɛn se dɛn kɔmɔt fa ɛn dɛn go lɛk lɛ dɛn ɛn Jɔshwa dɛn mek wan wɔd.

⁷ Bɔt Jɔshwa dɛn se dɛn nɔ go jɔs mek wan wɔd wit dɛn bikɔs dɛn nɔ ivin no if na dɛn ɔl de nia.

⁸ Nain dɛn tɛl Jɔshwa dɛn se dɛn go bi slev dɛn to Jɔshwa dɛn. Nain Jɔshwa aks dɛn udat na dɛn ɛn usay dɛn kɔmɔt.

⁹ Dɛn ansa Jɔshwa se dɛn si dɛnsɛf lɛkɛ Jɔshwa dɛn slev dɛn ɛn kɔmɔt na wan fawe kɔntri. Dɛn kam fɔseka PAPA GƆD bikɔs dɛn dɔn yɛri bɔt an ɛn ɔl wetin i dɔn du na Ijipt,

¹⁰ wetin i bin du di tu Amorayt kiŋ; Kiŋ Sayɔn na Ɛshbɔn ɛn Kiŋ Og fɔ Beshan we bin tap na Ashtarɔt na di ist pat na Riva Jɔdan.

¹¹ Dɛn se na dat mek dɛn bigman dɛn ɛn di pipul dɛn na dɛn kɔntri se paopa, dɛn fɔ pak tin dɛn fɔ it na rod fɔ travul ɔl di we jɔs fɔ go tɛl Jɔshwa dɛn se, dɛn si dɛnsɛf lɛkɛ dɛn slev dɛn, so mek dɛn mek wan wɔd wit dɛn.

¹² Dɛn sho Jɔshwa dɛn dɛn bred dɛn we dɔn meleju ɛn tɛl dɛn se, di de we dɛn bin lɛf dɛn kɔntri fɔ travul go to Jɔshwa dɛn, dɛn bred ɛn ɔda it dɛn bin wam, bɔt naw dɛn dɔn kol ɛn dray ɛn ivin dɔn meleju.

¹³ Dɛn tɛl Jɔshwa dɛn igen se dɛn lɛda bag dɛn we dɛn kin put wayn bin nyu we dɛn bin de put wayn de fɔ kam, bɔt bay di tɛm we dɛn de rich to Jɔshwa dɛn, dɛn ɔl dɔn bɔs bɔs. Dɛn se na bikɔs dɛn kɔmɔt fa mek ɔl dɛn klos ɛn sus dɛn broko broko.

¹⁴ Bifo Jɔshwa dɛn aks PAPA GƆD wetin fɔ du, dɛn nɔ du dat; dɛn biliv dɛn ɛn grap go it pan di pipul dɛn tiŋs dɛn we dɛn kɛr go de.

¹⁵ Jɔshwa dɛn mek pis ɛn wan wɔd wit dɛn; di bigman dɛn ɛn ɔl di Izrɛlayt dɛn swɛ se dɛn nɔ go kil dɛn ɛn dɛn pipul dɛn na dɛn kɔntri.

¹⁶ Tri de afta dɛn mek di wan wɔd, nain Jɔshwa dɛn gɛt fɔ no se dɛn pipul de na dɛn neba dɛn ɛn dɛn nɔ de fawe.

¹⁷ So Jɔshwa dɛn go mit di Gibɛɔnayt dɛn da sem de de na dɛn siti dɛn, we na Gibɛɔn Siti, Chɛfira Siti, Biarɔt Siti ɛn Kiriath Jɛarim Siti.

¹⁸ Di bigman dɛn na Izrɛl bin dɔn swɛ se dɛn mek wan wɔd wit di Gibɛɔnayt dɛn, so dɛn nɔ gri lɛ di sojaman dɛn kil dɛn. Dat mek di Izrɛlayt dɛn vɛks ɛn bigin grɔmbul.

¹⁹ So di bigman dɛn na Izrɛl ɛksplen tɛl dɛn se bikɔs dɛn dɔn tek PAPA GƆD in nem swɛ mek wan wɔd wit dɛn, dɛn nɔ fɔ du dɛn natin.

²⁰ Dɛn se dɛn jɔs gɛt fɔ lɛf dɛn ɛn nɔ kil dɛn we dɛn dɔn swɛ wanwɔd wit dɛn if nɔ so, big big waala go fɔdɔm pan dɛn.

²¹ Di lida dɛn na Izrɛl stil se dɛn nɔ fɔ kil dɛn bifo dat dɛn go de kɔt wud ɛn gɛt wata fɔ dɛn.

²² Jɔshwa tɛl sɔm pan in man dɛn fɔ kɛr di Gibɛɔnayt dɛn we bin go lay gi dɛn, to an. We dɛn kɛr dɛn go to an, i aks dɛn wetindu dɛn bin lay gi dɛn se dɛn kɔmɔt fawe we na neba de dɛn de.

²³ Jɔshwa swɛ dɛn fɔ dat; i se frɔm da de de, sɔm pan dɛn go bi slev sote go fɔ jɔs de kɔt wud ɛn gɛt wata fɔ in PAPA GƆD in os.

²⁴ Nain di Gibɛɔnayt dɛn se dɛn lay gi Jɔshwa dɛn bikɔs dɛn bin dɔn yɛri se PAPA GƆD we na dɛn PAPA GƆD bin dɔn tɛl in wokman Mozis traŋa wan se, i fɔ kil ɔl di pipul dɛn na di land we i sho an ɛn gi di land to di Izrɛlayt dɛn. So dɛn bin de fred bad bad wan fɔ dɛn layf.

²⁵ Dɛn se dɛn nɔ gɛt pawa fɔ du natin ɛn ɔl di pawa de na Jɔshwa dɛn an, so lɛ dɛn du wetin dɛn tink se rayt.

²⁶ So Jɔshwa tinap fɔ di Gibɛɔnayt dɛn ɛn nɔ mek dɛn kil dɛn.

²⁷ Bɔt frɔm da de de, Jɔshwa mek dɛn de kɔt wud ɛn gɛt wata fɔ dɛn ɛn fɔ PAPA GƆD in os te di tɛm we dɛn bin de rayt dis buk.