Jɔshwa 8 - Krio Fɔs Oli Baybul

Aw Di Izrɛlayt Dɛn Kapchɔ Ɛn Nyakanyaka Ay

¹ PAPA GƆD tɛl Jɔshwa se mek i nɔ fred ɛn mek in at nɔ pwɛl; I se mek i tek ɔl in sojaman dɛn go na Ay bikɔs in go mek dɛn kapchɔ di kiŋ, in pipul dɛn ɛn in wanol kɔntri.

² I se dɛn fɔ trit dɛn lɛk aw dɛn bin trit di kiŋ ɛn in pipul dɛn na Jɛriko, bɔt dɛn kin tek di pipul dɛn na Ay dɛn tiŋs dɛn, ɛn dɛn kaw dɛn fɔ dɛnsɛf. PAPA GƆD advays dɛn fɔ le ambush biɛn di siti.

³ So Jɔshwa kɛr ɔl di sojaman dɛn go na Ay. I pik tati tawzin traŋa sojaman dɛn we go le ambush na nɛt.

⁴ I tɛl dɛn traŋa wan se, dɛn fɔ le ambush biɛn di siti ɛn dɛn fɔ de nia di siti, ɛn dɛn nɔ fɔ mek kalukalu.

⁵ Jɔshwa se in ɛn di ɔda pipul dɛn go mach lɛkɛ dɛn de go na di siti, so di Fɛtman dɛn na Ay go kɔmɔt rɔnata dɛn, ɛn dɛnsɛf go rɔn.

⁶ I se we di Fɛtman dɛn na Ay rɔnata dɛn, dɛn go drif dɛn kɔmɔ nia dɛn siti, bikɔs dɛn go fil se na fred di Izrɛlayt dɛn de fred dɛn lɛk di las tɛm.

⁷ Jɔshwa se, datɛnde, di tati tawzin traŋa sojaman dɛn fɔ kɔmɔt na dɛn ambush ɛn kapchɔ di siti. I se lɛ dɛn nɔ fred bikɔs PAPA GƆD we na dɛn PAPA GƆD go mek dɛn kapchɔ di siti.

⁸ I se we dɛn kapchɔ di siti, dɛn fɔ layt am bikɔs na so PAPA GƆD se. I wɔn dɛn lɛ dɛn nɔ mistek du ɔda tin.

⁹ Nain Jɔshwa mek dɛn go le di ambush bitwin Bɛthɛl ɛn Ay, dat na di wɛst say na Ay, ɛn in bin de wit di ɔda pipul dɛn ol nɛt.

¹⁰ Ali di nɛks mɔnin, Jɔshwa gɛda ɔl di sojaman dɛn we bin lɛf wit am ɛn in ɛn di bigman dɛn na Izrɛl de bifo dɛn frɔm dɛn kamp na Gilgal, te rich Ay.

¹¹ Ɔl di sojaman dɛn we go nia di siti wit am, bin go kamp na di nɔth pat, we na vali bin de bitwin dɛn ɛn Ay.

¹² Jɔshwa mek fayv tawzin sojaman ayd na di wɛst pat fɔ go na di siti, dat na bitwin Bɛthɛl ɛn Ay.

¹³ Izrɛl dɛn sojaman dɛn bin dɔn arenj dɛnsɛf fɔ di fɛt; di men sojaman dɛn bin de na di nɔth ɛn bi bakman dɛn bin de na di wɛst. Bɔt Jɔshwa bin go de na di vali te mɔnin.

¹⁴ We di kiŋ na Ay si di Izrɛlayt dɛn, i tek in sojaman dɛn kwik kwik fɔ go fɛt dɛn ɔpozit di vali; i nɔ bin no se di Izrɛlayt dɛn bin dɔn le ambush biɛn in siti.

¹⁵ Nain Jɔshwa ɛn di Izrɛlayt sojaman dɛn mek lɛkɛ se dɛn fred di Ay Fɛtman dɛn, ɛn rɔn de go lɛkɛ we yu wan go na di Jɔdan Vali.

¹⁶ So di bigman dɛn na Ay kɔl ɔl di man dɛn na di siti fɔ rɔnata dɛn, ɛn aw dɛn de rɔnata dɛn, na so dɛn de drif di man dɛn na Ay kɔmɔt nia dɛn siti

¹⁷ Wan man nɔ bin lɛf na Ay fɔ fɛt in kes ɛnitin apin, ɛn di get bin lɛf opin. Dɛn ɔl bin de rɔnata di Izrɛlayt dɛn. So i bin jɔs izi fɔ di Izrɛlayt sojaman dɛn we bin ayd na di wɛst pat.

¹⁸ Nain PAPA GƆD tɛl Jɔshwa se mek i pɔynt in spia we de nain an to Ay bikɔs in go mek dɛn kapchɔ di siti. So Jɔshwa pɔynt di spia we de nain an to di siti.

¹⁹ We Jɔshwa pɔynt in spia to Ay, di sojaman dɛn we bin le ambush, rɔn go insay di siti, kapchɔ am ɛn dɛn nɔ wɛstɛn fɔ layt kwik.

²⁰ We di man dɛn na Ay tɔn ɛn si smok de kɔmɔ na dɛn siti, dɛn nɔ bin ebul rɔn go bifo, dɛn nɔ bin ebul tɔn bak bikɔs dɛn dɔn no stret se, dɛn ɛnimi dɛn dɔn kapchɔ dɛn siti.

²¹ We di Izrɛlayt sojaman dɛn si se dɛn kɔmpin dɛn we bin le ambush dɔn kapchɔ di siti, dɛn lɛf fɔ rɔn; dɛn tɔn rawnd ɛn fɔdɔm pan di Ay sojaman dɛn ɛn kil kil dɛn.

²² Di Izrɛlayt sojaman dɛn we bin dɔn layt di siti, kam fɔ kam fɛt di Ay sojaman dɛn. Dat mek di Ay Fɛtman dɛn jɔs de midul we mek di Izrɛlayt dɛn kil dɛn te wan sɛf nɔ lɛf.

²³ Bɔt di Izrɛlayt dɛn nɔ kil di Ay kiŋ; dɛn kɛr an go to Jɔshwa.

²⁴ We di Izrɛlayt dɛn dɔn kil di Ay sojaman dɛn we bin de rɔnata dɛn dɔn na di ɛmti land we pɔsin nɔ go ebul tap, dɔn ɔl tɔn bak go na Ay go kil ɔl udat bin de de.

²⁵ Di de we dɛn bin kil ɔlman na da siti de, na bɔt sɔm twɛlv tawzin man uman ɛn pikin dɛn, dɛn bin kil.

²⁶ Jɔshwa bin pɔynt in spia pan di siti te di Izrɛlayt dɛn kil ɔl di pipul dɛn we bin lɛf na Ay.

²⁷ PAPA GƆD bin tɛl Jɔshwa se di Izrɛlayt dɛn kin tek di kaw, got ɛn ship dɛn we dɛn mit na di siti, so di Izrɛlayt dɛn bin tek dɛn.

²⁸ Jɔshwa ɛn di Izrɛlayt sojaman dɛn bɔn Ay ɛn na so i de bɔn wan lɛk we yu pak dɔti, te di tɛm we dɛn bin de rayt dis buk.

²⁹ Dɛn ɛŋ di Ay kiŋ na tik ɛn lɛf in bɔdi de te ivintɛm we dɛn pul an de go trowe an na di frɔnt say fɔ go insay di siti, usay dɛn kɔba di bɔdi wit bɔku bɔku ston we de de te di tɛm we dɛn bin de rayt dis buk.

Jɔshwa Rid Di Lɔ Dɛn Na Mawnt Ebal

³⁰ Afta sɔn tɛm, Jɔshwa mek dɛn bil wan ɔlta fɔ PAPA GƆD we na Izrɛl dɛn PAPA GƆD na Mawnt Ebal.

³¹ Jɔs lɛk aw Mozis we na bin PAPA GƆD in wokman bin dɔn tɛl di Izrɛlayt dɛn fɔ du, dɛn bil an wit ston we dɛn nɔ kɔt wande. Na di ɔlta dɛn mek sakrifays we dɛn kin bɔn di tin dɛn, ɛn pis sakrifays to PAPA GƆD.

³² Na da sem ples de ɔl di pipul dɛn tinap de luk we Jɔshwa bin rayt di lɔ dɛn we Mozis bin gi dɛn.

³³ Ɔl di Izrɛlayt dɛn, di trenja dɛn ɛn di wan dɛn we bɔn de, wit bigman fɔ di famili dɛn ɛn di bigman dɛn fɔ di neshɔn, bin tinap na di tu say fes to fes wit di man dɛn we de mek sakrifays fɔ pipul sin ɛn PAPA GƆD in Ak ɔf di Kɔvinant de midul. Sɔm pan dɛn bin tinap gi dɛn bak to Mawnt Gɛrizim we di ɔda wan dɛn yon bak bin tɔn to Mawnt Ebal. Dat na wetin Mozis we na bin PAPA GƆD in wokman bin dɔn tɛl dɛn fɔ blɛs di Izrɛlayt dɛn.

³⁴ We dɛn ɔl dɔn tinap, Jɔshwa rid ɔl di lɔ dɛn; di blɛsin ɛn di swɛ dɛn lawd lawd wan, jɔs lɛk aw i bin rayt na di lɔ buk.

³⁵ Wan layn nɔ de we Mozis bin rayt na di lɔ we Jɔshwa nɔ rid lɛ ɔl di man dɛn, di uman dɛn ɛn di pikin ɛn fɔrena dɛn ɔl yɛri.