Jɔshwa 7 - Krio Fɔs Oli Baybul

Ekan Kɔmit Sin

¹ PAPA GƆD bin tɛl di Izrɛlayt dɛn se dɛn fɔ bɔn Jɛriko ɛn dɛn nɔ fɔ tek natin we i dɔn se dɛn fɔ bɔn. Ekan we kɔmɔt na Juda, na kami in bɔypikin. Kami na Zabdi in yon bɔypikin. Zabdi na Zɛra in bɔy in yon pikin. Ekan tek sɔm pan di tin dɛn, ɛn dat bin mek PAPA GƆD vɛks bad bad wan pan Izrɛl.

² Jɔshwa sɛn sɔm man dɛn kɔmɔ Jɛriko fɔ go wach wan siti we nem Ay. Ay bin de na di wɛst pat to Bɛthɛl, ɛn i nɔ bin de fa frɔm Bɛthavɛn siti. I tɛl di man dɛn se dɛn fɔ go fayndawt ɛnitin dɛn ebul bɔt Ay siti. So di man dɛn du wetin Jɔshwa tɛl dɛn.

³ We di man dɛn go bak to Jɔshwa, dɛn tɛl an se mek i nɔ bɔda se in de tek di wanol ami go de; lɛ tu ɔ tri tawzin sojaman dɛn nɔmɔ go atak dɛn, bikɔs di pipul dɛn nɔ plɛnti.

⁴ So na bɔt sɔm tri tawzin sojaman dɛn nɔmɔ go ɔp de go fɛt dɛn, bɔt na rɔn dɛn rɔn kɔmɔt de;

⁵ di man dɛn na Ay rɔnata di Izrɛlayt dɛn frɔm di siti get te dɛn go dɔŋ di il, te rich sɔm kwari eria. Na bɔt tati siks Izrɛlayt sojaman dɛn dɛn kil. Dat mek dɛn at pwɛl ɛn dɛn bin fred.

⁶ Jɔshwa ɛn di bigman dɛn na Izrɛl go bifo di Kɔvinant bɔks, chɛr dɛn klos, put dɔti na dɛn ed fɔ sho se tin dɔn apin we mek dɛn sɔri, ib dɛnsɛf na grɔn, butu dɛn ed ɛn lidɔm de te ivintɛm.

⁷ Jɔshwa pre to PAPA GƆD we na dɛn GƆD ɛn aks an wetindu i mek dɛn krɔs Riva Jɔdan go oba, if na fɔ lɛ di Amorayt dɛn go kil dɛn. I se i bin fɔ bɛtɛ if dɛn bin jɔs lɛf oba de.

⁸ I tɛl PAPA GƆD se in nɔ no wetin fɔ se we Izrɛl sojaman dɛn dɔn bigin fred dɛn ɛnimi ɛn de rɔn.

⁹ I tɛl PAPA GƆD se if di Kenanayt ɛn ɔl di ɔda pipul dɛn we de na di land yɛri bɔt dat, dɛn go jɔs sɔrawnd dɛn ɛn kil dɛn ɔl. So I aks se, wetin PAPA GƆD go du fɔ in yon rɛspɛkt.

¹⁰ Nain PAPA GƆD tɛl Jɔshwa se mek i grap. Nid nɔ de fɔ mek in lidɔm ɛn butu in fes na grɔn.

¹¹ PAPA GƆD se Izrɛl dɔn kɔmit sin bikɔs dɛn dɔn jomp in wɔd. I se di agrimɛnt we dɛn bin gɛt, na fɔ nyakanyaka ɔltin na Jɛriko, bɔt dɛn dɔn tif sɔm pan di tin dɛn put pan dɛn yon ɛn dɛn de lay.

¹² I se dat mek Izrɛl sɛf dɔn tɔn tin we fɔ nyakanyaka we mek dɛn gɛt fɔ de rɔn pan dɛn ɛnimi dɛm. PAPA GƆD se in nɔ go de ɛp dɛn igen pas dɛn nyakanyaka di tin dɛn we dɛn tek na Jɛriko we de insay dɛn kamp.

¹³ PAPA GƆD tɛl Jɔshwa se mek i go tɛl di pipul dɛn se mek di pipul dɛn mek dɛnsɛf klin bifo in PAPA GƆD, bikɔs in PAPA GƆD we na dɛn PAPA GƆD se, di tin dɛn we i bin dɔn se fɔ nyakanyaka de na dɛn kamp, ɛn pas dɛn pul dɛn ɛn nyakanyaka dɛn, dɛn go de lɔs fɛt ɔltɛm.

¹⁴ PAPA GƆD se fɔ tɛl dɛn se di nɛks mɔnin, ɔl di difrɛn fambul dɛn fɔ tinap bifo PAPA GƆD in Kɔvinant bɔks, wan bay wan. Di fambul we PAPA GƆD go pik go tinap frɔm dɛn difrɛn grampa dɛn kam dɔŋ. Di wan we PAPA GƆD go pik go tinap os bay os ɛn di os we PAPA GƆD go pik go tinap wan bay wan.

¹⁵ Di pɔsin we dɛn go kech wit di tin dɛn we PAPA GƆD bin dɔn se dɛn fɔ nyakanyaka, dɛn go bɔn in, in wɛf ɛn pikin dɛn ɛn ɔl dɛn prɔpati na faya bikɔs i dɔn pwɛl di agrimɛnt we dɛn mek wit PAPA GƆD ɛn dɔn mek Izrɛl dɔn shem na di wɔl.

¹⁶ So Jɔshwa wek ali di nɛks mɔnin ɛn mek ɔl di fambul dɛn na Izrɛl tinap bifo di Ak ɔf di Kɔvinant wan bay wan, ɛn na di Juda fambul PAPA GƆD bin pik;

¹⁷ dɔn i mek dɛn tinap tinap frɔn dɛn difrɛn grampa dɛn kam dɔŋ. Na Zɛra ɛn in pikin dɛn, granpikin ɛn gret granpikin dɛn PAPA GƆD pik. Jɔshwa mek dɛn tinap bay famili ɛn na Zabdi in famili PAPA GƆD bin pik.

¹⁸ So Jɔshwa mek dɛn tinap bifo di ak wan bay wan ɛn na Ekan we na Zɛra in pikin we nem Zabdi, in yon pikin we nem Kami, PAPA GƆD bin pik.

¹⁹ Nain Jɔshwa tɛl Ekan se mek i nɔ lay to PAPA GƆD we na di PAPA GƆD na Izrɛl, lɛ i tɛl am wetin i du ɛn lɛ i nɔ ayd an.

²⁰ Nain Ekan se na tru se in dɔn kɔmit sin to PAPA GƆD we na di PAPA GƆD na Izrɛl ɛn i tɛl an wetin i du.

²¹ I se na we in si wan fayn lapa, fayv pawns wet silva ɛn gold ba we na wan ɛn kwata pawn wet,, pan di tin dɛn we dɛn kapchɔ, nain in at go de, so in tek dɛn. I se in dig grɔn bɛr dɛn insay in tɛnt ɛn na di silva in put bɔtɔm.

²² So Jɔshwa sɛn sɔm man dɛn fɔ go luk na Ekan in tɛnt, ɛn dɛn fɛn di tin dɛn de. Jɔs lɛkɛ aw i se, na di silva bin de ɔnda.

²³ Di man dɛn tek di tin dɛn go put bifo di Kɔvinant bɔks usay Jɔshwa bin tinap, ɛn ɔl di pipul dɛn si dɛn.

²⁴ Nain Jɔshwa ɛn ɔl di pipul dɛn kɛr Ekan ɛn di tin dɛn we i tif, in bɔy ɛn gial pikin dɛn, in kaw dɛn, dɔŋki dɛn ɛn in ship dɛn, in tɛnt ɛn ɔltin we i gɛt, go na Trɔbul Vali.

²⁵ We dɛn kɛr dɛn go de, nain Jɔshwa se, bikɔs i dɔn gi dɛn waala, PAPA GƆD insɛf go gi an waala. Nain di pipul dɛn ston Ekan ɛn in pikin dɛn te dɛn day; dɔn dɛn bɔn dɛn wit ɔl dɛn prɔpati dɛn.

²⁶ Nain dɛn pak ston dɛn ay ay wan kɔba dɛn. Te to di tɛm we dɛn bin de rayt dis buk, dɛn bin stil de kɔl di ples, Trɔbul Vali ɛn di ston dɛn bin stil pak de. Afta dɛn dɔn kil Ekan, PAPA GƆD in at bin dɔn kol fɔ Izrɛl.