Jɔshwa 6 - Krio Fɔs Oli Baybul

Di Izrɛlayt Dɛn Kapchɔ Jɛriko

¹ Di pipul na Jɛriko bin lɔk dɛn get lɛ di Izrɛlayt dɛn nɔ ebul go insay; nɔbɔdi nɔ bin de go insay ɔ kɔmɔt na do.

² Nain PAPA GƆD tɛl Jɔshwa se in go mek Izrɛl kapchɔ Jɛriko; dɛn go bit di kiŋ ɛn in big big sojaman dɛn.

³ PAPA GƆD tɛl am igen se dɛn fɔ mach rawnd di siti wantɛm fɔ de fɔ siks de.

⁴ PAPA GƆD se na sɛvin man dɛn we de mek sakrifays fɔ pipul sin fɔ de mach bifo di Ak ɔf di Kɔvinant de blo sɛvin trɔmpɛt we dɛn tek man ship ɔn mek; bɔt we di de we mek sɛvin rich, Jɔshwa ɛn di sojaman dɛn na Izrɛl fɔ mach rawnd di siti sɛvin tɛm ɛn di man dɛn we de mek sakrifays fɔ pipul sin, fɔ de blo dɛn trɔmpɛt.

⁵ PAPA GƆD se we dɛn dɔn mach rawnd di siti sɛvin tɛm, di man dɛn we de mek sakrifays fɔ pipul sin fɔ blo di trɔmpɛt lawd lawd wan fɔ lɔŋ, ɛn as dɛn blo di lɔŋ blo so, ɔl di pipul dɛn fɔ ala lawd lawd wan. Di wɔl na di siti go fɔdɔm flat wan ɛn ɔl di sojaman dɛn go jɔs rɔn go insay.

⁶ So Jɔshwa we na Nɔn in pikin kɔl di man dɛn we de mek sakrifays fɔ pipul sin, we kin tot di Ak ɔf di Kɔvinant ɛn tɛl dɛn se lɛ dɛn tot di Ak ɔf di Kɔvinant ɛn lɛ sɛvin ɔda man dɛn we de mek sakrifays fɔ pipul sin, de blo sɛvin trɔmpɛt we dɛn tek man ship ɔn mek, bifo PAPA GƆD in ak.

⁷ I tɛl di pipul dɛn se lɛ dɛn mach rawnd di siti, ɛn sɔm sojaman wit dɛn wɛpɔn dɛn fɔ de bifo di Ak ɔf di Kɔvinant.

⁸ Di pipul dɛn du ɔl wetin Jɔshwa tɛl dɛn fɔ du; sɛvin man dɛn we de mek sakrifays fɔ pipul sin de bifo di Ak ɔf di Kɔvinant de blo trɔmpɛt we na man ship ɔn dɛn tek mek dɛn ɛn PAPA GƆD in Ak ɔf di Kɔvinant bin de biɛn dɛn.

⁹ Fɛtman dɛn we ol wɛpɔn bin de mach bifo di man dɛn we de mek sakrifays fɔ pipul sin we de blo di trɔmpɛt dɛn ɛn nɔ de tap we dɛn bin de mach, ɛn di sojaman dɛn we fɔ de biɛn, bin de biɛn di ak.

¹⁰ Jɔshwa tɛl di pipul dɛn traŋa wan se, dɛn nɔ fɔ ala ɔ ivin tɔk te di de kam we in go tɛl dɛn fɔ ala.

¹¹ So i mek dɛn kɛr PAPA GƆD in ak go rawnd di siti wan tɛm dɔn dɛn go slip na dɛn kamp na nɛt.

¹² Di nɛks de, Jɔshwa wek ali mɔnin. Di man dɛn we de mek sakrifays fɔ pipul sin tot PAPA GƆD in Ak ɔf di Kɔvinant.

¹³ Di sɛvin man we de mek sakrifays fɔ pipul sin we de blo di trɔmpɛt we dɛn tek man ship ɔn mek, de bifo PAPA GƆD in ak de blo di trɔmpɛt dɛn ɛn nɔ de tap. Di sojaman dɛn we bin ol wɛpɔn bin de bifo dɛn, bɔt di gyadman dɛn we fɔ de biɛn bin de biɛn PAPA GƆD in ak ɛn dɛn bin de blo di trɔmpɛt ɛn nɔ de tap.

¹⁴ Dɛn mach rawnd di siti wan tɛm bak da sɛkɛn de de. We dɛn dɔn, dɛn go bak na dɛn kamp go slip. Na so dɛn du fɔ siks de.

¹⁵ Di de we mek sɛvin, dɛn grap ali mɔnin, as do klin so ɛn mach rawnd di siti, di sem we we dɛn kin mach rawnd di siti, bɔt da de de, na sɛvin tɛm dɛn go rawnd di siti, ɛn na da de de nɔmɔ dɛn dɔn mach rawnd di siti sɛvin tɛm.

¹⁶ As dɛn go rawnd di tɛm we mek sɛvin so, we di man dɛn we de mek sakrifays fɔ pipul sin blo dɛn trɔmpɛt dɛn, nain Jɔshwa tɛl di Izrɛlayt dɛn se lɛ dɛn ala, bikɔs PAPA GƆD dɔn gi dɛn di siti.

¹⁷ I se dɛn go sakrifays ɔltin we de na di siti to PAPA GƆD, pas da rare gial we nem Reab ɛn in fambul dɛn we de na os to an, bikɔs na im bin ayd di man dɛn we i bin sɛn go wach di land.

¹⁸ Jɔshwa wɔn di pipul dɛn lɛ dɛn nɔ tek natin pan di tin dɛn na di siti we dɛn dɔn se dɛn go sakrifays to PAPA GƆD, lɛ trɔbul nɔ go mit dɛn.

¹⁹ I tɛl dɛn se dɛn nɔ fɔ tɔch natin, bɔt ɔl di silva, gold, ɛn di bras ɛn ayɛn tin dɛn we dɛn fɔ yuz na di tɛmpul, oli to PAPA GƆD, so dɛn go put dɛn usay dɛn kin put PAPA GƆD in tiŋs dɛn.

²⁰ So di man dɛn we de mek sakrifays fɔ pipul sin we ol di trɔmpɛt dɛn, blo dɛn. As dɛn blo di trɔmpɛt dɛn so, nain di pipul dɛn ɔl ala lawd lawd wan ɛn di wɔl we de rawnd Jɛriko, fɔdɔm flat wan na grɔn. Di Izrɛlayt dɛn ɔl rɔn go insay di siti ɛn kapchɔ di siti.

²¹ Dɛn nyakanyaka Jɛriko bad bad wan. Dɛn chap ɔlman wit dɛn sɔd; man o, uman o, pikin o, kaw o, ship o, dɔŋki o, dɛn nɔ lɛf nɔbɔdi.

²² Nain Jɔshwa tɛl di tu man we bin go wach di land se lɛ dɛn go tek da rare gial ɛn ɔl in pipul dɛn we de na os to an, jɛs lɛkɛ aw dɛn bin dɔn prɔmis se dɛn go du.

²³ So di yɔŋ man dɛn we bin go wach di land, go ɛn go briŋ Reab ɛn in papa ɛn mama, in brɔda dɛn ɛn ɔl in fambul dɛn. Dɛn kɛr in ɛn in fambul dɛn go nia dɛn kamp.

²⁴ Dɛn bɔn di wanol siti. Natin dɛn nɔ lɛf,, pas di tin dɛn we na gold, silva, bras ɛn ayɛn dɛn tek mek dɛn, ɛn dɛn put dɛn usay PAPA GƆD in tiŋs dɛn kin de.

²⁵ Jɔshwa sev da rare gial we nem Reab ɛn in fambul dɛn, ɛn dɛn de na Izrɛl te di tɛm we dɛn bin de rayt dis buk bikɔs i bin ayd di man dɛn we jɔshwa bin sɛn go wach di land.

²⁶ Jɔshwa bin swɛ se ɛnibɔdi we go tray fɔ bil Jɛriko, PAPA GƆD go pul at pan am. Di pɔsin we go le di fawndeshɔn in fɔs pikin go day. Di pɔsin we go bil di get in las pikin go day.

²⁷ PAPA GƆD bin de ɛp Jɔshwa ɛn ɔlman bin yɛri bɔt am ɔlsay na da eria de.