Jɔshwa 5 - Krio Fɔs Oli Baybul

¹ We ɔl di Amorayt kiŋ dɛn we bin de na di wɛst say na Riva Jɔdan ɛn ɔl di Kenanayt kiŋ dɛn we de nia di si yɛri se PAPA GƆD mek Riva Jɔdan dray fɔ di Izrɛlayt dɛn fɔ krɔs, ɛn i mek i dray te dɛn krɔs dɔn, dɛn ɔl at pwɛl ɛn dɛn nɔ bin gɛt op igen bikɔs dɛn de fred di Izrɛlayt dɛn.

PAPA GƆD Tɛl Jɔshwa Fɔ Sakɔmsayz Di Man Dɛn

² PAPA GƆD tɛl Jɔshwa se lɛ i mek ston nɛf dɛn ɛn du di sɛkɛn sɛt sakɔmsishɔn na Izrɛl.

³ So Jɔshwa mek dɛn mek di ston nɛf dɛn ɛn sakɔmsayz ɔl di man dɛn na wan ples we dɛn kin kɔl Gibɛat-aaralɔt.

⁴ Jɔshwa bin sakɔmsayz ɔl di man dɛn bikɔs, ɔl di man dɛn we dɛn bin sakɔmsayz, day na rod insay di fɔti ia we dɛn tek na rod na di ɛmti ples we pipul nɔ go ebul tap we dɛn bin kɔmɔ Ijipt.

⁵ Al di man dɛn we bin kɔmɔ Ijipt bin sakɔmsayz, bɔt di bɔypikin dɛn we dɛn bɔn na rod nɔ bin sakɔmsayz.

⁶ Bɔt insay di fɔti ia we dɛn tek de waka na di ɛmti ples we pipul nɔ go ebul tap, ɔl di man dɛn we bin dɔn machɔ fɔ ebul fɛt, bin dɔn day. Dɛn nɔ bin rɛspɛkt PAPA GƆD ɛn I bin dɔn swɛ se in nɔ go mek dɛn si di land we gud fɔ plant ɛn fɔ mɛn animal, we i bin dɔn prɔmis dɛn fɔstɛm-papa dɛn.

⁷ Bikɔs di wan dɛn we bɔn na rod nɔ bin sakɔmsayz, na dɛn Jɔshwa bin mek dɛn sakɔmsayz.

⁸ We Jɔshwa dɔn mek dɛn sakɔmsayz dɛn dɔn, dɛn nɔ go nɔwe te dɛn wund dɛn wɛl.

⁹ PAPA GƆD tɛl Jɔshwa se wetin apin so da de de, dɔn pul di disgres we mit dɛn na Ijipt, kɔmɔt pan dɛn, so dɛn fɔ kɔl da ples de Gilgal.

¹⁰ Di ivintɛm na di de we mek fɔtin da mɔnt de, di Izrɛlayt dɛn bin sɛlibret di Fist ɔf di Pasova na di ples we nɔ gɛt il na Gilgal.

¹¹ Di nɛks de afta di pasova, na bin di fɔs tɛm we dɛn it it we na da land de i gro. Na di land di sid gro we dɛn pach ɛn bit ɛn mek bred we nɔ gɛt yist, we dɛn it.

¹² Na di nɛks de afta di Izrɛlayt dɛn it pan tin dɛn we gro na di land PAPA GƆD lɛf fɔ sɛn mana fɔ dɛn, ɛn dɛn nɔ it mana igen, pas wetin dɛn plant we de gro na dɛn land we na Kenan, da ia de.

Di Kɔmanda Fɔ PAPA GƆD In Ami Apia To Jɔshwa

¹³ Wande we Jɔshwa ɛn in pipul dɛn bin stil kamp nia Jɛriko, Jɔshwa jɔs si wan man we ol sɔd tinap bifo an, so Jɔshwa go mit am ɛn aks am se if i de fɔ dɛn ɔ i nɔ de fɔ dɛn.

¹⁴ Nain di man ansa an se nɔ o, a kam ya bikɔs mi na di kɔmanda fɔ PAPA GƆD in ami. Nain Jɔshwa butu na grɔn ɛn wɔship am ɛn aks am se, na wetin in go wan lɛ i du.

¹⁵ Nain di kɔmanda fɔ PAPA GƆD in ami tɛl am se mek i pul in sandal bikɔs usay i tinap na oli grɔn. Nain Jɔshwa pul in sandal.