Jɔshwa 4 - Krio Fɔs Oli Baybul

Dɛn Pak Ston Dɛn Fɔ Mɛmba Wetin Bin Apin

¹ We ɔl di pipul dɛn dɔn krɔs oba Riva Jɔdan dɔn, PAPA GƆD tɛl Jɔshwa fɔ

² pik wan wan man pan ɔl di twɛlv fambul,

³ ɛn tɛl dɛn traŋa wan fɔ pik wan wan ston usay di man dɛn we de mek sakrifays fɔ pipul sin we tot di Ak ɔf di Kɔvinant bin tinap na Riva Jɔdan, ɛn kɛr dɛn go usay dɛn go slip da nɛt de.

⁴ So Jɔshwa kɔl di twɛlv man we dɛn bin dɔn pik wan wan pan di twɛlv fambul,

⁵ ɛn tɛl dɛn traŋa wan se, lɛ dɛn go usay di man dɛn we de mek sakrifays fɔ pipul sin we tot PAPA GƆD we na dɛn PAPA GƆD in Ak ɔf di Kɔvinant, tinap insay Riva Jɔdan, ɛn tek wan wan ston put na dɛn sholda, we min se wan ston go tinap fɔ wan fambul na Izrɛl,

⁶ we go de mek dɛn mɛmba wetin PAPA GƆD bin du fɔ dɛn na Riva Jɔdan, ɛn i go bi di ɛvidɛns fɔ tumara if dɛn pikin dɛn go aks dɛn wetin dɛn ston de min.

⁷ I se dɛn fɔ ansa dɛn se, di wata na Riva Jɔdan bin dray we di man dɛn we de mek sakrifays fɔ pipul sin we de tot PAPA GƆD in Ak ɔf di Kɔvinant bin tinap insay de, so dɛn ston de go mek ɔl di jɛnareshɔn dɛn na Izrɛl de mɛmba wetin bin bi, te go.

⁸ Di twɛlv man du wetin Jɔshwa tɛl dɛn fɔ du; dɛn go tek di twɛlv ston na Riva Jɔdan we min se, wan wan fɔ di twɛlv fambul, jɔs lɛkɛ aw PAPA GƆD bin tɛl Jɔshwa fɔ du, ɛn kɛr dɛn go put dɛn na di ples we dɛn bin kamp.

⁹ Pantap dat, Jɔshwa mek dɛn pak twɛlv ston na di ples we di man dɛn we de mek sakrifays fɔ pipul sin bin tinap insay Riva Jɔdan, ɛn dɛn bin de de te di tɛm we dɛn bin de rayt dis buk.

¹⁰ Di man dɛn we de mek sakrifays fɔ pipul sin we tot di Ak ɔf di Kɔvinant tinap insay Riva Jɔdan te Jɔshwa dɔn tɛl di pipul dɛn wetin Mozis bin dɔn tɛl an se PAPA GƆD se fɔ tɛl dɛn. Di pipul dɛn krɔs kwik kwik.

¹¹ We di pipul dɛn dɔn krɔs dɔn, di man dɛn we de mek sakrifays fɔ pipul sin we de tot di Ak, krɔs wit PAPA GƆD in Ak ɔf di Kɔvinant ɛn kɛr an go wet bifo say.

¹² Di Rubɛnayt dɛn, di Gadayt dɛn ɛn af di Manasɛ fambul tek ɔl dɛn wɛpɔn dɛn ɛn de frɔnt di pipul dɛn, jɔs lɛk aw Mozis bin dɔn se i fɔ bi;

¹³ na bɔt fɔti tawzin sojaman dɛn we bin gɛt dɛn wɛpɔn dɛn rɛdi fɔ fɛt, bin krɔs go Jɛriko, ɛn PAPA GƆD bin de wit dɛn bikɔs di Ak ɔf di Kɔvinant bin de de.

¹⁴ Da de de, PAPA GƆD mek di wanol Izrɛl rɛspɛkt Jɔshwa lɛkɛ aw dɛn bin rɛspɛkt Mozis te i day.

¹⁵ Nain PAPA GƆD tɛl Jɔshwa se

¹⁶ lɛ i tɛl di man dɛn we de mek sakrifays fɔ pipul sin, we tot di Ak ɔf di Kɔvinant, lɛ dɛn kɔmɔt insay Riva Jɔdan.

¹⁷ So Jɔshwa du wetin PAPA GƆD tɛl am fɔ du.

¹⁸ As di man dɛn we de mek sakrifays fɔ pipul sin, we tot di Ak ɔf di Kɔvinant pul fut na di wata so, Riva Jɔdan ful bak ɛn ovaflo lɛkɛ aw i bin de wantɛm wantɛm.

¹⁹ Na di de we mek tɛn insay di fɔs mɔnt, di Izrɛlayt dɛn bin waka krɔs Riva Jɔdan, ɛn dɛn bin go kamp na Gilgal, na di bɔda na di Ist pat na Jɛriko.

²⁰ Na Gilgai de Jɔshwa bin mek dɛn pak di twɛlv ston we dɛn bin pul kɔmɔt insay Riva Jɔdan.

²¹ Jɔshwa tɛl di Izrɛlayt dɛn se we dɛn pikin dɛn we nɔ bɔn yet go aks dɛn papa dɛn wetin dɛn ston dɛn de min,

²² dɛn fɔ tɛl dɛn bɔt aw Riva Jɔdan bin dray te Izrɛl krɔs dɔn.

²³ I se dɛn fɔ mek dɛn no se na PAPA GƆD we na dɛn PAPA GƆD bin mek ɔl di wata na Riva Jɔdan dray te dɛn krɔs dɔn, jɔs lɛk aw PAPA GƆD we na dɛn PAPA GƆD bin mek di Rɛd Si dray te dɛn krɔs dɔn,

²⁴ so ɔlman na dis wɔl go no se PAPA GƆD gɛt pawa ɛn dɛn go rɛspɛkt PAPA GƆD we na dɛn PAPA GƆD te go.