Jɔshwa 3 - Krio Fɔs Oli Baybul

Aw Di Izrɛlayt Dɛn Krɔs Riva Jɔdan

¹ Di nɛks de, Jɔshwa ɛn ɔl di Izrɛlayt dɛn grap kwik na mɔnin. Dɛn kɔmɔt usay dɛn bin kamp na Akasia ɛn put ed wɛst de go Riva Jɔdan. Na de dɛn kamp de wet te di tɛm rich fɔ dɛn fɔ krɔs Riva Jɔdan.

² Afta tri de, di bigman dɛn na Izrɛl go rawnd di kamp

³ ɛn tɛl di Izrɛlayt dɛn se, we dɛn si di man dɛn we de mek sakrifays fɔ pipul sin tot PAPA GƆD we na dɛn Gɔn in Ak ɔf di Kɔvinant de go, dɛn ɔl fɔ de biɛn am,

⁴ so dɛn nɔ go mis rod fɔ go usay dɛn gɛt fɔ go bikɔs dɛn nɔ pas na da rod de wande. I se dɛn nɔ fɔ go nia di Ak ɔf di Kɔvinant atɔl, dɛn fɔ de niali wan mayl frɔn ɛnisay we di Ak ɔf di Kɔvinant go de.

⁵ Jɔshwa tɛl di pipul dɛn se mek dɛn mek dɛnsɛf klin bifo PAPA GƆD bikɔs PAPA GƆD go du wɔnda di nɛks de.

⁶ I tɛl di man dɛn we de mek sakrifays fɔ pipul sin fɔ tot di Ak ɔf di Kɔvinant de go bifɔ. Dɛn tek di Ak ɔf di Kɔvinant ɛn go bifo.

⁷ Nain PAPA GƆD tɛl Jɔshwa se na da de de in go mek ɔlman no se na Jɔshwa na lida na Izrɛl, so dat dɛn go no se jɔs lɛkɛ aw in nɔ bin de lɛf Mozis, na so i go de wit am.

⁸ PAPA GƆD tɛl Jɔshwa igen se, lɛ i tɛl di man dɛn we de mek sakrifays fɔ pipul sin we tot di Ak ɔf di Kɔvinant se, we dɛn rich Riva Jɔdan, lɛ dɛn jɔs waka go insay di wata lili bit ɛn tinap de.

⁹ Nain Jɔshwa kɔl ɔl di pipul dɛn lɛ i go tɛl dɛn wetin PAPA GƆD we na dɛn PAPA GƆD se in go du.

¹⁰ I tɛl dɛn se we PAPA GƆD go dɔn drɛb ɔl di pipul dɛn we de na di land; dat na di Kenanayt dɛn, di Itayt dɛn, di Ivayt dɛn, di Pɛrizayt dɛn, di Gigashayt dɛn, di Amorayt ɛn Jɛbyusayt dɛn, na datɛnde dɛn go biliv se, fɔ tru tru PAPA GƆD de wit dɛn.

¹¹ I se PAPA GƆD we na di PAPA GƆD fɔ ɔl di pipul dɛn na di wanol wɔl, in Ak ɔf di Kɔvinant go go bifo ɛn go rich Riva Jɔdan bifo dɛn.

¹² Jɔshwa tɛl dɛn se dɛn fɔ pik wan wan man pan di twɛlv fambul dɛn.

¹³ I se as di man dɛn we de mek sakrifays fɔ pipul sin we de tot PAPA GƆD we na di PAPA GƆD fɔ ɔl di pipul dɛn na di wanol wɔl, in Ak ɔf di Kɔvinant, put dɛn fut insay Riva Jɔdan so, di wata go lɛf fɔ rɔn; di wata we de kɔmɔt ɔp say go jɔs tinap wan ples ay wan.

¹⁴ Di pipul dɛn kɔmɔt na di kamp ɛn go fɔ krɔs riva Jɔdan. Di man dɛn we de mek sakrifays fɔ pipul sin we tot di Ak ɔf di Kɔvinant bin dɔn go bifo wit di ak.

¹⁵ Di tɛm we ɔl dis bin de bi, na bin di tɛm we pipul kin avɛst, ɛn na datɛnde Riva Jɔdan kin ful te i ovaflo. Di man dɛn we de mek sakrifays fɔ pipul sin we tot di Kɔvinant bɔks put dɛn fut insay di wata.

¹⁶ As dɛn du dat so, di wata we bin de kɔmɔt ɔp say jɔs tinap wan ples ay wan fawe na di siti we dɛn kɔl Adam, we de nia Zarɛthan. Di wan we bin de rɔn go na di Dɛd Si, kɔtɔf totali. Nain di pipul dɛn krɔs Riva Jɔdan go oba say fesin Jɛriko.

¹⁷ We di Izrɛlayt dɛn bin de krɔs Riva Jɔdan we di wata bin dɔn dray, di man dɛn we de mek sakrifays fɔ pipul sin we bin tot PAPA GƆD in Ak ɔf di Kɔvinant, bin tinap na di dray grɔn insay Riva Jɔdan te ɔl di pipul dɛn krɔs dɔn.