Jɔshwa 24 - Krio Fɔs Oli Baybul

Jɔshwa Mɛmba Izrɛl Wetin PAPA GƆD Dɔn Du Fɔ Dɛn

¹ Jɔshwa sɛn tɛl ɔl di difrɛn difren fambul dɛn na Izrɛl fɔ mit na Shɛkɛm Siti. We dɛn go de, i kɔl ɔl di ol pipul dɛn, di bigman dɛn; di pipul dɛn we de bifo di difrɛn fambul dɛn, di jɔj dɛn ɛn ɔlman na Izrɛl fɔ go tinap bifo PAPA GƆD in Ak ɔf di Kɔvinant.

² Nain i tɛl dɛn se PAPA GƆD we na PAPA GƆD na Izrɛl se, dɛn fɔstɛmpapa dɛn, Ebram in papa, Tɛra, ɛn Naɔ, bin de Mɛsopotemia oba Riva Yufretis, ɛn dɛn bin de wɔship fɔrin gɔd dɛn.

³ Jɔshwa tɛl dɛn se PAPA GƆD se, in bin tek Ebram we na dɛn papa kɔmɔt na da ples de, kɛr an go Kenan usay i mek i gɛt plɛnti plɛnti pikin ɛn grampikin. I se PAPA GƆD se in gi am Ayzak.

⁴ We I gi am Ayzak, i gi Ayzak Jekob ɛn Isɔ. PAPA GƆD gi Isɔ di mawnten na Sɛir bɔt Jekob ɛn in pikin dɛn, go Ijipt.

⁵ Leta PAPA GƆD sɛn Mozis ɛn Erɔn go pul dɛn we i dɔn mek difrɛn bad tin dɛn mit di Ijipshian dɛn.

⁶ Nain PAPA GƆD kɛr dɛn go fɔ go krɔs di rɛd si. Datɛnde, di Ijipshian sojaman dɛn bin de rɔnata dɛn.

⁷ We di Izrɛlayt dɛn pre to PAPA GƆD, I mek di ples dak bifo di Ijipshian dɛm, dɔn i mek di si kɔba dɛn ɛn ɔl di Izrɛlayt dɛn bin si ɔl dat. Di Izrɛlayt dɛn bin spɛnd lɔŋ tɛm na di ɛmti ples we pipul nɔ go ebul tap.

⁸ Jɔshwa se PAPA GƆD se, in kɛr dɛn go na di Amɔrayt dɛn land. I se di Amɔrayt dɛn fɛt dɛn bɔt in mek dɛn bit di Amɔrayt dɛn ɛn kapchɔ dɛn land, ɛn di Izrɛlayt dɛn no bɔt ɔl dat.

⁹ PAPA GƆD se na Balak, Zipɔ in pikin we na kiŋ na Moab, bin grap go fɛt Izrɛl, dɔn i sɛn Balaam fɔ go put swɛ pan Izrɛl.

¹⁰ Instɛd, PAPA GƆD se in mek Balaam blɛs Izrɛl. PAPA GƆD se na da we de in bin pul Izrɛl kɔmɔt na Balaam in an.

¹¹ PAPA GƆD se we di Izrɛlayt dɛn krɔs Riva Jɔdan go Jɛriko di Jɛriko pipul dɛn fɛt dɛn, bɔt in mek Izrɛl bit dɛn. Dɔn di Amɔrayts dɛn o, di Pɛrizayt dɛn o, di Kenanayt dɛn o, di Itayt dɛn o, di Gigashyt dɛn o, di Ivayt dɛn o, di Jɛbyusayt dɛn o, ɔl fɛt Izrɛl, bɔt in mek Izrɛl bit dɛn ɔl.

¹² PAPA GƆD se nain mek dɛn ɔl kɔnfyus ɛn fred we mek di tu kiŋ ɛn dɛn pipul dɛn ɔl rɔnawe; nɔto Izrɛl dɛn bin ebul fɛt dɛn drɛb dɛn.

¹³ PAPA GƆD se nɔto di Izrɛlayt dɛn mek di fam dɛn we de na di land we dɛn de ɛn nɔto dɛn bil di siti dɛn, bɔt in tek an gi dɛn.

¹⁴ So Jɔshwa tɛl di Izrɛlayt dɛn se na ɔl dat mek dɛn fɔ put PAPA GƆD nɔmba wan na dɛn at; dɛn fɔ trowe ɔl dɛn fɔrin gɔd dɛn we dɛn fɔstɛmpapa dɛn bin de wɔship na Mɛsopotemia ɛn Ijipt, sav PAPA GƆD wit ɔl dɛn at ɛn waka tret wit an.

¹⁵ I se, “if yu nɔ wan sav PAPA GƆD, yu fɔ mekɔp yu maynd tide udat yu go wɔship. ‘As fɔ mi ɛn ɔl udat de na mi os, na PAPA GƆD wi go wɔship” if dɛn at nɔ gi dɛn fɔ sav PAPA GƆD, da de de, dɛn fɔ pik bitwin dɛn fɔstɛmpapa dɛn gɔd ɛn di gɔd we di Amɔrayt dɛn bin de wɔship usay dɛn di Izrɛlayt dɛn bin de so datɛnde.

¹⁶ Nain di pipul dɛn se lɛ PAPA GƆD nɔ gri lɛ dɛn tɔn dɛn bak pan PAPA GƆD.

¹⁷ PAPA GƆD we bin du wɔndaful tin dɛn we dɛn ɔl bin si, ɛn pul dɛn ɛn dɛn papa dɛn kɔmɔt slevri na Ijipt? PAPA GƆD we gyad dɛn we dɛn bin de pas insay ɔda neshɔn dɛn land we dɛn bin de kɔmɔt Ijipt?

¹⁸ PAPA GƆD we pul di Amɔrayt dɛn kɔmɔt na di land ɛn gi dɛn nain dɛn go kɔmɔt biɛn? PAPA GƆD fɔbid! PAPA GƆD we dɔn du ɔl dɛn tin dɛn de fɔ dɛn nain na dɛn PAPA GƆD so nain dɛn go sav.

¹⁹ Nain Jɔshwa tɛl di Izrɛlayt dɛn se PAPA GƆD nɔto PAPA GƆD we izi fɔ sav; I oli ɛn i de jɛlɔs ɛn i nɔ go fɔgiv dɛn if dɛn du wetin i se dɛn nɔ fɔ du.

²⁰ I se lɛ dɛn nɔ luk se bikɔs i dɔn du plɛnti gud tin fɔ dɛn dɛn kin jɔs du ɛnitin we dɛn fil o; if dɛn du wetin PAPA GƆD nɔ lɛk, i go chenj pan dɛn ɛn pɔnish dɛn bad bad wan ɛn kin ivin kil kil dɛnsɛf.

²¹ Nain di pipul dɛn tɛl Jɔshwa se ɔl wetin i se na tru bɔt na PAPA GƆD dɛn go sav.

²² Nain Jɔshwa tɛl dɛn se na dɛn na dɛn yon witnɛs dɛn se dɛn se dɛn go sav PAPA GƆD. Nain di pipul dɛn se i nɔ bad; na dɛnsɛf na dɛn witnɛs dɛn.

²³ Nain Jɔshwa tɛl dɛn se if dɛn min wetin dɛn se, lɛ dɛn bɔn bɔn ɔl dɛn lay lay gɔd dɛn we dɛn gɛt ɛn put ɔl dɛn atɛnshɔn to PAPA GƆD we nain na di PAPA GƆD na Izrɛl.

²⁴ Nain di pipul dɛn tɛl an bak se na PAPA GƆD na dɛn PAPA GƆD. Nain nɔmɔ dɛn go wɔship ɛn dɛn go du ɔl wetin i se.

²⁵ Da sem de de na Shɛkɛm, Jɔshwa tinap fɔ di pipul dɛn ɛn mek wan Kɔvinant bitwin Izrɛl ɛn PAPA GƆD.

²⁶ Jɔshwa rayt ɔl di agrimɛnt na di buk we PAPA GƆD in lɔ dɛn rayt. Nain i mek dɛn put wan big big ston ɔnda wan kɔtin tri we de nia di tɛnt we di Ak ɔf di Kɔvinant de.

²⁷ Nain Jɔshwa se na di ston na dɛn witnɛs inkes di Izrɛlayt dɛn kɔmɔ biɛn PAPA GƆD, bikɔs di ston yɛri ɔl wetin dɛn bin de se.

²⁸ We dɛn ɔl dɔn gri dɔn, i tɛl dɛn fɔ go om na dɛn difrɛn difrɛn kɔntri.

Jɔshwa Day

²⁹ Afta ɔl dɛn tin dɛn ya bin dɔn bi, PAPA GƆD in wokman, Jɔshwa we na Nɔn in bɔypikin, day. I bin ol wan ɔndrɛd ɛn tɛn ia.

³⁰ Dɛn bin bɛr am nain yon land we dɛn bin gi am na Timnat Sera, we de Ifrem na Mawnt Gaash.

³¹ We Jɔshwa day, di Izrɛlayt dɛn bin stil de waka wit PAPA GƆD, te ivin afta ɔl di bigman dɛn we day afta Jɔshwa, we bin si ɔl wetin PAPA GƆD du fɔ Izrɛl, bin day.

³² Lɔntɛm bifo Izrɛl bin go tap na Ijipt, wan pan di Izrɛlayt dɛn fɔstɛmpapa we bin nem Jekob, bin bay wan lɔt, wan ɔndrɛd silva kɔpɔ, na Amɔ we na Shɛkɛm in papa, in jɛnareshɔn dɛn an. We di Izrɛlayt dɛn bin de kɔmɔ na Ijipt, dɛn bin tek Josɛf in bon bon kɔmɔ de. I bin de wit dɛm pan ɔl di waka dɛn we dɛn bin de waka. So dɛn bɛr am na da lɔt de we Jekob bin bay na Shɛkɛm.

³³ Elɛaza we na Erɔn yon pikin sɛf bin day; dɛn bɛr in na Gibɛa. Dat na di siti we dɛn bin gi Finɛas in bɔypikin. Di siti de na Ifrem ɔp di mawnten.