Jɔshwa 22 - Krio Fɔs Oli Baybul

Aw Di Fambul Dɛn Na Di Ist Go Om

¹ Jɔshwa kɔl ɔl di Rubɛn, di Gad ɛn af di Manasɛ fambul

² ɛn tɛl dɛn se dɛn dɔn obe ɔl wetin in ɛn Mozis we na PAPA GƆD in wokman dɔn tɛl dɛn fɔ du,

³ ɛn dɛn dɔn de fayn fayn wit ɔl di ɔda fambul dɛn ɛn obe ɔl PAPA GƆD we na dɛn PAPA GƆD in lɔ dɛn.

⁴ I tɛl dɛn se PAPA GƆD we na dɛn PAPA GƆD dɔn du wetin I bin se in go du; I dɔn ɛp dɛn brɔda dɛn gɛt dɛn land. I se as we Mozis bin dɔn gi dɛn land na di ist pat to Riva Jɔdan, dɛn kin go bak na dɛn yon land.

⁵ I se lɛ dɛn mek shɔ se dɛn du ɔl wetin Mozis we na PAPA GƆD in wokman tɛl dɛn se PAPA GƆD se dɛn fɔ de du. I se dat na fɔ lɛk PAPA GƆD we na dɛn PAPA GƆD ɛn du ɔl wetin i se dɛn fɔ de du, biliv in wan ɛn wok fɔ an wit ɔl dɛn at ɛn dɛn sol.

⁶ We Jɔshwa blɛs dɛn, dɛn go na dɛn yon land.

⁷ Mozis bin dɔn gi di land na di ist to Riva Jɔdan to af pan di Manasɛ fambul, ɛn i bin gi di ɔda af pan di Manasɛ fambul togɛda wit ɔda trayb dɛn, di land na di wɛst pat to di Riva Jɔdan. Bifo dɛn go, Jɔshwa blɛs dɛn.

⁸ We Jɔshwa de blɛs dɛn, i se lɛ dɛn go bak na dɛn yon land wit plɛnti jɛntri, plɛnti kaw, plɛnti silva, gold, aluminiɔm ɛn ayɛn ɛn plɛnti klos. I se mek dɛn sheb ɔl wetin dɛn bin kapchɔ na dɛn ɛnimi dɛn an, so ɔlman go gɛt pan dɛn.

⁹ So di Rubɛn, di Gad ɛn Istɛn Manasɛ fambul, kɔmɔt na di Izrɛlayt dɛn we de Shaylɔ dɛn land ɛn go na dɛn yon land na Giliad na di ist say to Riva Jɔdan. Mozis bin dɔn tɛl dɛn lɔlɔntɛm se na di land dawande we PAPA GƆD se in go gi dɛn.

Di Fambul Dɛn Na Di Ist Bil Ɔlta Fɔ PAPA GƆD

¹⁰ We di Rubɛn, di Gad ɛn af di Manasɛ fambul dɛn bin de na rod de go na dɛn yon land we PAPA GƆD bin gi dɛn, dɛn bil wan big fayn fayn ɔlta na Gɛlilɔth nia Riva Jɔdan bifo dɛn krɔs di riva.

¹¹ Di ɔda fambul dɛn bin gɛt fɔ yɛri se dɛn tri fambul dɛn de dɔn bil ɔlta na dɛn yon say na di riva nia Kenan.

¹² We dɛn yɛri se na so dɔn bi, ɔl di man dɛn go gɛda na Shaylɔ fɔ go fɛt di tri fambul dɛn; dat na di Rubɛn, di Gad ɛn af di Manasɛ fambul.

¹³ So dɛn sɛn pipul dɛn fɔ go aks di Rubɛn, di Gad ɛn di Manasɛ fambul dɛn bɔt dat. Dɛn sɛn Finɛas we na Ɛliaza we na man we de mek sakrifays fɔ pipul sin in pikin,

¹⁴ tɛn chif we wan wan kɔmɔt na di tɛn fambul, ɛn di edman dɛn na di difrɛn famili dɛn na Izrɛl.

¹⁵ Dɛn go to di tri fambul; dat na di Rubɛn, di Gad ɛn di Manasɛ fambul dɛn. Finɛas ɛn di wan dɛn we go wit am, tɛl dɛn se,

¹⁶ dɛn go de fɔ go tɔk fɔ PAPA GƆD in pipul dɛn, ɛn aks dɛn se wetindu dɛn tɔn dɛn bak gi PAPA GƆD ɛn go bil ɔlta fɔ dɛnsɛf, ɛn wetindu dɛn fɔ pul at pan PAPA GƆD ɛn du da bad bad tin de.

¹⁷ Dɛn aks dɛn se if di bad bad sin we dɛn bin kɔmit to PAPA GƆD we dɛn ɔl bin de na Pɛɔ we PAPA GƆD bin pɔnish dɛn bad bad wan we ɔlman fil an nɔ du fɔ lan dɛn lɛsin,

¹⁸ we fɔ mek de lɛk tide dɛn nɔ kɔmɔt biɛn PAPA GƆD tɛm lɛkɛ dawande, bikɔs we PAPA GƆD go wan pɔnish, i nɔ go pik; na dɛn ɔl i go pɔnish bambay.

¹⁹ Dɛn tɛl dɛn se if dɛn land gɛt sin we mek dɛn nɔ wan wɔship de, lɛ dɛn krɔs go oba to dɛn bak usay di Ak ɔf di Kɔvinant de, go tap de wit dɛn, nɔ duya, lɛ dɛn nɔ bil ɔlta fɔ dɛnsɛf ɛn tɔn dɛn bak pan PAPA GƆD we na dɛn PAPA GƆD.

²⁰ Finɛas ɛn di bigman dɛn na di wɛst mɛmba dɛn bɔt aw Ekan bin tek di tin dɛn we PAPA GƆD se nɔ fɔ tek we nɔto in waŋren bin sɔfa; na di wanol Izrɛl sɔfa.

²¹ Nain di Rubɛn, di Gad ɛn di Manasɛ fambul dɛn ansa Finɛas ɛn di bigman dɛn na di wɛst, we na dɛn kɔmpin Izrɛlayt dɛn, se,

²² PAPA GƆD Ɔlmayti na di waŋren PAPA GƆD. In na PAPA GƆD ɛn in no wetindu dɛn bil di ɔlta ɛn dat dɛn want dɛn brɔda dɛn na di wɛst sɛf fɔ no. Dɛn tɛl dɛn wɛstɛn brɔda dɛn se if dɛn fɛnɔt se na tɔn dɛn dɔn tɔn dɛn bak pan PAPA GƆD, lɛ dɛn kil dɛn da vɛri de de,

²³ bikɔs i go bi datɛnde se dɛn bil ɔlta fɔ tɔn dɛn bak pan PAPA GƆD; ɔ if i bi se dɛn bil ɔlta fɔ mek sakrifays we dɛn de bɔn na faya, ɔ sid ɔfrin ɔ pis ɔfrin, lɛ PAPA GƆD dil wit dɛn ɛn nɔ sɔri fɔ dɛn.

²⁴ Dɛn kɔntinyu se nɔto ɔl dat mek dɛn bil di ɔlta. Dɛn se dɛn bil an bikɔs dɛn de fred se tumara tumara, dɛn pikin dɛn we de na di wɛst go tɔn aks dɛn pikin dɛn na di ist se us wan na dɛn yon wit PAPA GƆD we na Izrɛl dɛn PAPA GƆD.

²⁵ Dɛn se di pikin dɛn go se PAPA GƆD mek Riva Jɔdan bitwin dɛn we sho se dɛn ɛn di Rubɛn ɛn Gad fambul nɔto wan, ɛn dat kin mek dɛn pikin dɛn na di ist go tɔn dɛn bak pan PAPA GƆD bambay.

²⁶ Dɛn se dɛn nɔ bil di ɔlta fɔ mek sakrifays,

²⁷ bɔt na fɔ lɛ dɛn ɔl pikin dɛn tumara go no se dɛnsɛf di Izrɛlayt dɛn na di ist bin de wɔship PAPA GƆD ɛn bin de mek ɔl di sakrifays dɛn ɛn di ɔfrin dɛn, lɛ dɛn nɔ go tɛl dɛn yon pikin dɛn na di ist se dɛn nɔ no PAPA GƆD.

²⁸ Dɛn se na dat mek dɛn mek di sem kayn ɔlta we dɛn fɔstɛmpapa dɛn mek fɔ PAPA GƆD. Dɛn se dɛn nɔ bil an fɔ mek sakrifays bɔt na lɛ di wɔl go no se, di Izrɛlayt dɛn na di ist ɛn di wan dɛn na di wɛst, na wan.

²⁹ Dɛn swɛ se lɛ PAPA GƆD nɔ gri lɛ dɛn bil ɔlta fɔ mek difrɛn sakrifays dɛn fɔ tɔn dɛn bak pan PAPA GƆD bikɔs na PAPA GƆD we na PAPA GƆD in ɔlta we tinap bifo in tɛnt nɔmɔ dɛn no.

³⁰ We Finɛas ɛn di bigman dɛn na di wɛst yɛri wetin di Rubɛn, di Gad ɛn di Manasɛ fambul dɛn se, dɛn at bin kam dɔŋ.

³¹ Nain Finɛas we na Ɛlieza we na man we de mek sakrifays fɔ pipul sin in bɔypikin, tɛl di tri Izrɛlayt fambul na di ist se na da de de dɛn no se PAPA GƆD de wit dɛn bikɔs di fambul dɛn na di ist nɔ du natin we go mek PAPA GƆD vɛks aftaɔl.

³² Finɛas we na Ɛlieza in bɔypikin ɛn di wanol dɛligeshɔn, kɔmɔt Gilɛad we na di ist, ɛn tɔn bak go mit di pipul dɛn na Kenan we na di wɛst go tɛl dɛn aw dɛn pas.

³³ Di pipul dɛn bin gladi bad bad wan we dɛn yɛri aw dɛn pas. So dɛn blɛs PAPA GƆD ɛn dɛn nɔ tɔk bɔt fɛt biznɛs igen, fɛt we bin fɔ nyakanyaka dɛn kɔmpin Izrɛlayt dɛn we de na di ist, dat na di Rubɛn, di Gad ɛn af di Manasɛ fambul, dɛn land.

³⁴ Di Rubɛnayt ɛn di Gadayt gi di ɔlta nem Witnɛs bikɔs dɛn se nain go mek pikin dɛn bambay no se na di sem Gɔd we na PAPA GƆD di Izrɛlayt dɛn na di ist ɛn di wan dɛn na di wɛst bin de wɔship.