Jɔshwa 21 - Krio Fɔs Oli Baybul

Jɔshwa Ɛn Di Bigman Dɛn Gi Di Livayt Fambul Land

¹ We di Izrɛlayt dɛn bin kamp nia Shaylɔ we de na Kenana, di bigman dɛn na di Livayt fambul go mit di man we de mek sakrifays fɔ pipul sin we na Ɛlieza, Jɔshwa ɛn di bigman dɛn na ɔl di ɔda fambul na Izrɛl

² ɛn tɛl dɛn se PAPA GƆD bin tɛl Mozis traŋa wan se dɛn fɔ gi dɛn di Livayt fambul land fɔ dɛnsɛf ɛn i fɔ bi land we gɛt plɛnti gras fɔ dɛn animal dɛn.

³ Bikɔs na PAPA GƆD bin dɔn tɛl dɛn traŋa wan se fɔ gi dɛn da kayn land de, Jɔshwa ɛn di bigman dɛn na Izrɛl du wetin PAPA GƆD se.

⁴ As we dɛn bin dɔn aks PAPA GƆD, na di Kɔath famili fɔs bin gɛt land na di Livayt fambul. Di Livayt dɛn we na Erɔn in bɔnshɔ, gɛt tɔtin siti we dɛn bin tek tek pan di Juda, Simiɔn ɛn Bɛnjamin fambul dɛn yon land dɛn gi dɛn.

⁵ Di balans na di Kɔath famili bin gɛt tɛn siti we dɛn tek tek pan di Ifrem, Dan ɛn af pan di Manasɛ fambul land gi dɛn.

⁶ Di Gashɔnayt dɛnsɛf bin gɛt land as we dɛn bin aks PAPA GƆD. Dɛn bin gɛt tɔtin siti we dɛn tek tek pan di Isaka fambul, di Asha fambul, di Naftali fambul ɛn di ɔda af pan di Manasɛ fambul na Beshan dɛn land dɛn bin tek tek pan gi dɛm.

⁷ Di Mɛraritis famili dɛn bin gɛt twɛlv siti, ɛn na di Rubɛn famili, di Gad famili ɛn di Zɛbyulɔn famili dɛn land dɛn bin tek tek pan gi dɛn.

⁸ Na bay we di ansa we di Izrɛlayt dɛn gɛt we dɛn aks PAPA GƆD aw fɔ sheb di land, dɛn tek sheb di siti dɛn ɛn di land dɛn we gɛt plɛnti gras fɔ dɛn animal dɛn fɔ it.

⁹ Na di siti dɛn dɛnwanya we di Juda fambul ɛn di Simiɔn fambul,

¹⁰ gi di koath famili we na Erɔn in granpikin dɛn, ɛn na di Livay fambul dɛn kɔmɔt. Na dɛn fɔs bin gɛt land pan di wan dɛn we nɔ bin gɛt yet.

¹¹ Dɛn gi dɛn Aba (Aba na bin Anak in papa), we naw na Ɛbrɔn we de na di mawnten na Juda, ɛn di land we gɛt plɛnti gras fɔ animal fɔ it we de rawnd an.

¹² Bɔt na Kelɛb we na Jɛfunɛ in pikin dɛn bin gi di say dɛn fɔ plant na di siti ɛn di vilej dɛn.

¹³ As fɔ Erɔn we na man we de mek sakrifays fɔ pipul sin in yon granpikin dɛn, dɛn gi dɛn Ɛbrɔn, we na wan pan di siti dɛn fɔ ayd we dɛn mistek kil pɔsin; dɛn gi dɛn wit di land dɛn we de de we gɛt plɛnti gras fɔ animal fɔ it. Igen, dɛn gi dɛn Libna wit di land we gɛt plɛnti gras fɔ animal fɔ it.

¹⁴ Di ɔda siti dɛn we dɛn gi dɛn na Jatir, Ɛshtɛmoa

¹⁵ Holon, Dɛbir

¹⁶ Ain, Juta ɛn Bɛth Shɛmɛsh wit dɛn land dɛn we gɛt plɛnti gras fɔ animal fɔ it. Na nayn siti di Juda fambul ɛn di Simiɔn fambul gi dɛn.

¹⁷ Di Bɛnjamin fambul dɛn gi dɛn fo siti. Dɛn na Gibɛɔn ɛn Gɛba wit ɔl dɛn land dɛn we gɛt plɛnti gras fɔ animal fɔ it,

¹⁸ ɛn Anatɔt ɛn Almɔn wit ɔl dɛn land dɛn we gɛt plɛnti gras fɔ animal fɔ it.

¹⁹ Ɔl ɛn ɔl, na tɔtin siti dɛn dɛn gi di man dɛn we de mek sakrifays fɔ pipul sin we na Erɔn in granpikin dɛn.

²⁰ Na pan di Ifrem fambul dɛn land dɛn bin kɔt gi di balans Kohathayt dɛn na di Livayt famili.

²¹ Di siti dɛn we dɛn gi dɛn na Shɛkɛm we de na di mawnten, we na wan pan di siti dɛn we pɔsin we mistek kil pɔsin kin go ayd, Gɛza ɛn ɔl di land dɛn we plɛnti gras de gro fɔ animal fɔ it,

²² Kibzaim ɛn Bɛth Ɔrɔn wit ɔl dɛn land dɛn we plɛnti gras de gro fɔ animal fɔ it. Na fo siti dɛn bin tek na di Ifrem fambul dɛn an gi dɛn.

²³ Dɛn bin tek fo siti na di Dan fambul dɛnsɛf yon an gi dɛn. Di siti dɛn na Ɛltɛkɛ ɛn Gibɛthɔn wit ɔl dɛn land dɛn we plɛnti gras de gro fɔ animal fɔ it.

²⁴ Di ɔda siti dɛn na Aijalɔn ɛn Gathrimɔn wit ɔl dɛn land dɛn we plɛnti gras de gro fɔ animal fɔ it.

²⁵ Dɛn bin tek tu pan di Manasɛ fambul dɛnsɛf yon land gi di balans kɔathayt dɛn na di Livayt fambul.

²⁶ Ɔl ɛn ɔl, na tɛn siti wit ɔl dɛn land dɛn we gɛt plɛnti gras fɔ animal fɔ it, di Koathayt dɛn bin gɛt.

²⁷ Dɛn bin gi di Gashɔnayt dɛn we dɛnsɛf na wan pan di famili dɛn na di Livayt fambul, land we dɛn kɔt kɔmɔt pan af di Manasɛ fambul land. Di siti dɛn we dɛn gi dɛn na Golan we de na Beshan, we na wan pan di siti dɛn we pɔsin we mistek kil pɔsin kin go ayd, ɛn Bishtara wit ɔl dɛn land dɛn we plɛnti gras de gro fɔ animal fɔ it.

²⁸ Pan di Isaka fambul dɛn yon land, na fo siti dɛn bin kɔt gi di Gashɔnayt famili. Di siti dɛn na Kishiɔn ɛn Dabɛrath wit ɔl dɛn land dɛn we plɛnti gras de gro fɔ animal fɔ it,

²⁹ ɛn Jamuth ɛn Ɛnganim wit ɔl dɛnsɛf yon land dɛn we plɛnti gras de gro fɔ animal fɔ it.

³⁰ Pan di Asha fambul dɛn yon land, na fo siti dɛn kɔt gi di Gashɔnayt famili. Di siti dɛn na Mishal ɛn Abdɔn wit ɔl dɛn land dɛn we plɛnti gras de gro fɔ animal fɔ it,

³¹ ɛn Ɛlkɛth ɛn Rɛɔb wit ɔl dɛnsɛf yon land dɛn we plɛnti gras de gro fɔ animal fɔ it.

³² Pan di Naftali fambul dɛn land, na tri siti wit ɔl dɛn land dɛn we plɛnti gras de gro fɔ animal fɔ it, dɛn kɔt gi di Gashɔnayt famili. Di siti dɛn na Kɛdɛsh we de Galili, ɛn na wan pan di siti dɛn we pɔsin we mistek kil pɔsin kin go ayd, Amɔth ɛn Katan.

³³ Ɔl ɛn ɔl, na tɔtin siti wit ɔl dɛn land dɛn we plɛnti gras de gro fɔ animal fɔ it di Gashɔnayt fambul gɛt.

³⁴ Dɛn bin gi di balans famili na di Livayt fambul, dat na di Mararitɛ famili dɛn, fo siti wit ɔl dɛn land dɛn we plɛnti gras de gro fɔ animal fɔ it, pan di Zɛbyulɔn fambul dɛn land. Di siti dɛn na Joknɛam, Kata,

³⁵ Dimna ɛn Naalal.

³⁶ Pan di Rubɛn fambul dɛn land, dɛn gi dɛn Bɛza ɛn Jaaz,

³⁷ Kɛdɛnɔth ɛn Mɛfaath wit ɔl dɛn land dɛn we plɛnti gras de gro fɔ animal fɔ it.

³⁸ Pan di Gad fambul dɛn yon land, na fo siti wit ɔl dɛn land dɛn we plɛnti gras de gro fɔ animal fɔ it, dɛn kɔt gi di Mararitɛ famili. Di siti dɛn na Ramɔt na Giliad (Ramɔt na wan pan di siti dɛn we pɔsin we mistek kil pɔsin kin go ayd) Maanaim,

³⁹ Ɛshbɔn ɛn Jeza.

⁴⁰ Ɔl ɛn ɔl, na twɛlv siti di Mararitɛ famili bin gɛt. Dɛn na di balans famili dɛn na di Livayt fambul we nɔ bin gɛt land yet.

⁴¹ Na fɔti-et siti wit ɔl dɛn land dɛn we plɛnti gras de gro fɔ animal fɔ it, di ɔda fambul dɛn na Izrɛl bin gi di Livayt fambul.

⁴² Plɛnti pan dɛn siti dɛn de gɛt land dɛn rawnd dɛn we plɛnti gras de gro fɔ animal fɔ it.

PAPA GƆD Du Wetin I Prɔmis Se In Go Du

⁴³ PAPA GƆD bin dɔn prɔmis di Izrɛlayt dɛn fɔstɛmpapa dɛm se in go gi dɛn di land ɛn ɔl wetin i bin prɔmis, I du so. Di Izrɛlayt dɛn dɔn gɛt di land to dɛnsɛf.

⁴⁴ PAPA GƆD mek dɛn bit ɔl dɛn ɛnimi dɛn bikɔs I bin prɔmis dɛn fɔstɛmpapa dɛm se in go mek dɛn ɛnjɔy pis na di land we in go gi dɛn. PAPA GƆD du wetin i bin prɔmis se i go du ɛn nɔn pan dɛn ɛnimi dɛn nɔ bin ebul bit dɛn.

⁴⁵ PAPA GƆD bin mek plɛnti prɔmis dɛn to Izrɛl ɛn i nɔ pwɛl nɔn.