Jɔshwa 20 - Krio Fɔs Oli Baybul

Di Siti Dɛn Fɔ Ayd

¹ Apat frɔm ɔl dɛn tin dɛn de we dɔn pas, PAPA GƆD tɛl Jɔshwa lɛ i tɛl di Izrɛlayt dɛn se,

² di tɛm dɔn rich fɔ pik di siti dɛn we in PAPA GƆD bin tɛl Mozis fɔ tɛl dɛn bɔt;

³ dat na di siti dɛn we pɔsin we mistek kil in kɔmpin go rɔn go ayd so dat di pɔsin we dɛn kil in pipul dɛn nɔ go kil an bak wit vɛksteshɔn.

⁴ PAPA GƆD se if di bigman dɛn na di siti we di pɔsin we mistek kil pɔsin rɔn fɔ go ayd biliv wetin i se we i go ɛksplen to dɛn, dɛn go mek i tap de we di pɔsin we i mistek kil in fambul dɛn nɔ go ebul go kil an bak de.

⁵ I se ivin if di pɔsin we i mistek kil, in yon pipul dɛn rɔnata an go de fɔ go kil am bak, dɛn nɔ fɔ gri bikɔs nɔto bay wilful i kil in kɔmpin ɛn dɛn tu nɔ bin gɛt plaba.

⁶ PAPA GƆD se di pɔsin we mistek kil in kɔmpin go de na di siti te dɛn pruv se nɔto bay wilful i kil in kɔmpin, ɛn i go de de te di bigman pan di man dɛn we de mek sakrifays fɔ pipul sin day; datɛnde, i kin go bak nain kɔntri.

⁷ So, na di wɛst pat to Riva Jɔdan, dɛn pik Kɛdɛsh we de na Galili we de na di mawnten na Naftali, Shɛkɛm we de na di mawnten na Ifrem ɛn Ɛbrɔn we de na di il dɛn na Juda.

⁸ Na di ist pat to Riva Jɔdan, dat na di flat grɔn we de na di ist Jɛriko, dɛn pik Bɛza we de na Rubɛn fambul kɔntri, Ramɔt we de Gilyad na di Gad fambul kɔntri ɛn Golan we de na Beshan na Manasɛ kɔntri.

⁹ Ɛni Izrɛlayt ɔ fɔrina we mistek kil pɔsin kin go ayd na wan pan dɛn siti dɛn ya. I go de de te dɛn kɛr am go kɔt fɔ no aw dat apin ɛn di pɔsin we wan rivɛnj fɔ in pɔsin we i mistek kil, nɔ sɔpoz fɔ kil am, pas te dɛn fɛnɔt se i gilti.