Jɔshwa 2 - Krio Fɔs Oli Baybul

Reab Ayd Tu Izrɛlayt Spay

¹ We di Izrɛlayt dɛn bin kamp na Akeshia, Jɔshwa we na Nɔn in pikin sɛn tu man fɔ go ayd wach Kenan aw i tan. We dɛn go na Kenan, dɛn go tap na wan rare gyal we nem Reab in os.

² Da sem nɛt de, wɔd rich di kiŋ se sɔm Izrɛlayt dɛn dɔn go insay in kɔntri fɔ go wach aw di land tan.

³ Nain di kiŋ na Jɛriko sɛn wɔd to Reab se, mek i put di man dɛn we kam nain os, na do bikɔs dɛn go de fɔ go wach aw di land tan.

⁴ Bɔt Reab nɔ du an; bifo dat i ayd di Izrɛlayt dɛn ɛn tɛl di kiŋ in man dɛn se sɔm man dɛn bin go to an bɔt i nɔ no usay dɛn kɔmɔt,

⁵ ɛn na we tɛm bin dɔn de rich fɔ lɛ di get lɔk da nɛt de, nain dɛn go. I se bɔt in nɔ no usay dɛn go. I tɛl di kiŋ in man dɛn se mek dɛn mekes rɔnata dɛn kech dɛn bifo dɛn go fa.

⁶ Bɔt ɔl da tɛm de, i bin ayd dɛn ɔp in ruf usay i bin pak sɔm tik dɛn fayn fayn wan.

⁷ Wantɛm wantɛm, di kiŋ in man dɛn go. Tinkin dat dɛn de rɔnata dɛn, di kiŋ in man dɛn go te dɛn rich na di ist pat lɛk we yu de go Riva Jɔdan. As dɛn bin kɔmɔt se dɛn de go rɔnata di Izrɛlayt dɛn so, dɛn bin lɔk di get.

⁸ Bifo di tu Izrɛlayt dɛn we Jɔshwa bin sɛn fɔ go wach Kenan slip da nɛt de, Reab go mit dɛn ɔp di ruf

⁹ ɛn tɛl dɛn se in no se, PAPA GƆD dɔn gi Izrɛl di land, ɛn bikɔs di pipul dɛn na Kenan de fred dɛn, dat dɔn mek dɛn fil lɛkɛ kripul dɛn bifo Izrɛl.

¹⁰ Reab se dɛn bin dɔn yɛri bɔt aw PAPA GƆD mek di rɛd si dray lɛ di Izrɛlayt dɛn krɔs. I se dɛn bin yɛri igen bɔt aw dɛn bin nyakanyaka dɛn tu Amorayt kiŋ, Sayɔn ɛn Og we bin de na di ist pat na Riva Jɔdan.

¹¹ Reab tɛl dɛn se, as dɛn yɛri bɔt dat so, dɛn bigin fred; dɛn fut dɛn bigin trimbul ɔnda dɛn bikɔs dɛn de fred di Izrɛlayt dɛn, ɛn dɛn fred di Izrɛlayt dɛn bikɔs PAPA GƆD we na di Izrɛlayt dɛn PAPA GƆD, na di PAPA GƆD na ɛvin ɛn na di ath.

¹² Reab tɛl dɛn fɔ swɛ na PAPA GƆD in nem ɛn prɔmis an se, we in dɔn sev dɛn layf, dɛnsɛf go sev in ɛn in fambul dɛn layf we dɛn go go fɔ go nyakanyaka Jɛriko. I se dɛn fɔ tɛl an wetin go mek i biliv se dɛn go sev dɛn.

¹³ I se dɛn fɔ si dat dɛn nɔ kil in papa, in mama, in brɔda ɛn sista dɛn ɛn dɛn wɛf, man ɛn pikin dɛn.

¹⁴ So di tu man dɛn we Jɔshwa bin sɛn go wach di land tɛl Reab se if i nɔ tɛl nɔbɔdi bɔt dɛn ɛn wetin dɛn go de fɔ ɛn stil sev dɛn layf, dɛnsɛf go waka tret wit am ɛn sev in ɛn in fambul dɛnsɛf yon layf we PAPA GƆD go mek dɛn ebul kapchɔ di land.

¹⁵ Reab in os bin de na di siti in wɔl. So i mek dɛn klem kam dɔŋ di wɔl wit rop.

¹⁶ So Reab advays dɛn fɔ go ayd ɔp di il dɛn so dat di kiŋ in man dɛn nɔ go mit dɛn na rod. I se we di kiŋ in man dɛn go dɔn luk fɔ dɛn fɔ tri de, dɛn go tɔn bak go Jɛriko. Datɛnde, dɛn go fri fɔ go bak na dɛn kamp.

¹⁷ Bifo di man dɛn go, dɛn prɔmis Reab se dɛn go du wetin dɛn dɔn swɛ se dɛn go du.

¹⁸ Dɛn tɛl Reab se, di de we dɛn go atak di siti, i fɔ tay da rɛd rop we dɛn de tek go dɔŋ di winda ɛn fɔ gɛda ɔl in fambul dɛn we i wan lɛ dɛn sev nain yon os.

¹⁹ Dɛn se if ɛni wan pan dɛn go na trit ɛn dɛn kil am, nɔbɔdi nɔ go blem dɛn, bɔt if dɛn kil ɛnibɔdi insay di os, dɛn fɔ blem dɛn ɛn di swɛ go kech dɛn.

²⁰ Di tu man we Jɔshwa sɛn fɔ kam wach di land wɔn Reab siriɔs wan se if i tɛl ɛnibɔdi bɔt wetin dɛn dɔn plan, nɔbɔdi nɔ go blem dɛn tu if ɛnitin apin to Reab dɛn ɛn di swɛ go go bɔf.

²¹ Reab tɛl dɛn se in gri to ɔl di kɔndishɔn dɛn. So di tu man we Jɔshwa sɛn fɔ go wach di land klem kam dɔŋ ɛn go, dɔn Reab tay di rɛd rop nain os winda.

²² We di tu man we Jɔshwa bin sɛn go wach di land kɔmɔt de, dɛn go ɔp di il dɛn go ayd, ɛn dɛn bin de de tri de, te di kiŋ na Jɛriko in man dɛn tɔn bak go Jɛriko, afta dɛn dɔn luk ɔlsay fɔ dɛn ɛn nɔ ebul fɛn dɛn.

²³ Afta dat di tu man dɛn we Jɔshwa bin sɛn fɔ go wach di land kam dɔŋ na di il go na di Jɔdan vali to Jɔshwa we na Nɔn in pikin ɛn tɛl am ɔl wetin apin to dɛn.

²⁴ Dɛn tɛl am se fɔ tru tru, PAPA GƆD dɔn gi dɛn da land de, ɛn ɔl di pipul dɛn dɔn fred dɛn di Izrɛlayt dɛn.