Jɔshwa 17 - Krio Fɔs Oli Baybul

Di Land We PAPA GƆD Gi Di Sɛkɛn Af Pan Manasɛ Fambul

¹ Jɔshwa gi di Manasɛ fambul we na Josɛf in fɔs-bɔy-pikin in jɛnareshɔn dɛn big land pas ɔl di ɔda fambul dɛn na Izrɛl. Makaya na bin Manasɛ in big bɔypikin ɛn insɛf bin gɛt bɔypikin we nem Gilyad. Makaya na bin gud gud sojaman we ɔlman no ɛn Jɔshwa bin gi Mayka, Gilyad Siti ɛn Beshan Siti we de na di ist pat to Riva Jɔdan.

² Jɔshwa gi di sɛkɛn af pan di Manasɛ fambul di land we de na di wɛst pat na Riva Jɔdan. Di man dɛn we kɔmɔt na di Manasɛ fambul na Abieza, Ɛlɛk, Asriɛl, Shɛkɛm, Ɛfa ɛn Shɛmida. Dɛn ɔl na bin edman fɔ dɛn famili dɛn ɛn ɔl di famili dɛn bin gɛt land na di wɛst pat na Riva Jɔdan.

³ Manasɛ in grampikin bin gɛt bɔypikin we nem Ɛfa. Ɛfa nɔ bin bɔn bɔypikin; na fayv gial pikin dɛn nɔmɔ i bin gɛt; dat na Maia, Noa, Ɔgla, Milka ɛn Tiza.

⁴ PAPA GƆD bin tɛl Mozis se bikɔs Zɛlɔfɛad nɔ gɛt bɔypikin, lɛ i sheb di land we dɛn papa sɔpoz fɔ gɛt gi in gial pikin dɛn. Jɔshwa du wetin PAPA GƆD se ɛn sheb an gi dɛn di sem tɛm we i bin de sheb land gi di man dɛn.

⁵ Wetin du di Manasɛ fambul gɛt tɛn difrɛn ples na di land apat frɔm Gilyad ɛn Beshan we de na di ist pat,

⁶ na bikɔs Jɔshwa nɔ gi land to di man dɛn nɔmɔ, i gi sɔm uman we dɛnsɛf na bin Manasɛ in jɛnareshɔn

⁷ Na di nɔtwɛst, di Manasɛ fambul dɛn land in bawndri tap na di Asha fambul dɛn land. Dɛn bɔda na di sawt kɔmɔt frɔm Mikɛmthath Siti we de na di ist pat to Shɛkɛm go tap na sawt usay di Ɛntapua pipul dɛn de.

⁸ Na di Manasɛ fambul gɛt di land we nem Tapua, bɔt na Ifrem in jɛnareshɔn gɛt Tapua Siti we de na di bawndri bitwin di Manasɛ fambul dɛn land ɛn di Ifrem fambul dɛn yon land.

⁹ Frɔm usay di Ɛntapua dɛn de, di bawndri na di sawt fala Kana Riva te go to di Mɛditarenian Si. Di Manasɛ fambul dɛn yon land de na di nɔth to Kana Riva, bɔt na di Ifrem Fambul dɛn gɛt di siti dɛn we de na di sawt ɔl we dɛn de na di Manasɛ fambul dɛn land.

¹⁰ Di Ifrem fambul dɛn land de na di sawt ɛn di Manasɛ fambul dɛn land de na di nɔth ɛn na di Mɛditarenian Si na dɛn bawndri na di wɛst say, Asha na dɛn bawndri na di nɔth wɛst say ɛn na di nɔth ist say, na Isaka na dɛn Bawndri.

¹¹ Insay Asha ɛn Isaka, di Manasɛ fambul bin gɛt siti dɛn ɛn dɛn vilej dɛn de. Dɛn na Bɛth Shan, Iblɛam, Dɔ, Ɛndɔ, Taanak ɛn Mɛdigo.

¹² Bɔt di Manasɛ fambul dɛn nɔ bin ebul drɛb di kenanayt dɛn we bin tap de kɔmɔ na dɛn land dɛn de, so dɛn bin stil tap de.

¹³ As di Izrɛlayt dɛn de plɛnti ɛn gɛt pawa, dɛn mek di Kenanayt pipul dɛn slev.

Di Ifrem Ɛn Wɛst Manasɛ Fambul Aks Fɔ Mɔ Land

¹⁴ We Jɔshwa bin de sheb di land gi di difrɛn fambul dɛn, sɔm pan Josɛf in pipul dɛn, dat na di Manasɛ ɛn Ifrem fambul dɛn, go mit am ɛn aks an wetindu na wan pat land nɔmɔ i gi dɛn ɔlwe PAPA GƆD mek dɛn yon fambul plɛnti. Dɛn se dɛn sɔpoz fɔ gɛt mɔ land.

¹⁵ Jɔshwa ansa dɛn se if di land we i gi dɛn we na Ifrem we de na di il nɔ du fɔ dɛn, lɛ dɛn go klia di Pɛrizayt ɛn di Refaim dɛn bush ɛn put put sɔm pan dɛn pipul dɛn de.

¹⁶ Nain Josɛf in pipul dɛn se di land we de na Ifrem we de na di il nɔ du fɔ dɛn, bɔt di Kenanayt dɛn we de na di flat land na Bɛth Shan ɛn di siti dɛn we de nia de, ɛn na Jazril Vali, gɛt ayɛn karej dɛn.

¹⁷ Nain Jɔshwa tɛl Josɛf in pipul dɛn we na Ifrem ɛn Manasɛ se, na tru se dɛn plɛnti ɛn gɛt pawa; nɔto waŋren land dɛn fɔ gɛt..

¹⁸ I se dɛn go tek di il dɛn ɔl we na bush bush. Dɛn go klia am ɛn tek am te rich na di bɔda dɛn. I se dɛn go drɛb di kenanayt dɛn ɔl we dɛn traŋa ɛn gɛt ayɛn karej