Jɔshwa 16 - Krio Fɔs Oli Baybul

Di Land We PAPA GƆD Gi Di Ifrem Ɛn Af Di Manasɛ Fambul

¹ Di sawt bawndri na di nɔth na di land we PAPA GƆD gi Josɛf in jɛnareshɔn bigin na di ist say usay wata de kɔmɔt ɔnda grɔn we dɛn kɔl Jɛriko Spriŋ we de nia Riva Jɔdan. Di bawndri kɔmɔt Jɛriko na di nɔth wɛst go na di ɛmti ples we pɔsin nɔ go ebul tap, go ɔp di kɔntri dɛn na di il ɛn go as fa as Bɛthɛl.

² Di land kɔmɔt Bɛthɛl Siti te rich Luz Siti ɛn pas na Atarɔth Siti Usay di Akitis pipul dɛn de.

³ Di bawndri kɔmɔt Atarɔth Siti go dɔŋ ɛn tɔn na di wɛst go to di Jaflɛtayt dɛn eria ɛn go te rich di bɔtɔm say na Bɛth Hɔrɔn, dɔn i go te rich Gɛza go tap na di Mɛditarenian Si.

⁴ Na di land dat we PAPA GƆD bin gi Josɛf in jɛnareshɔn, Manasɛ ɛn Ifrem fambul.

⁵ Di Ifremayt dɛn land we dɛn bin sheb famili bay famili in bɔda na di sawt bin kɔmɔt Atarɔth Ada te go ist na di ɔp pat na Bɛth Hɔrɔn,

⁶ ɛn go te rich di Mɛditarenian Si. Dɛn bɔda na di nɔth bigin na Taanat Shilɔ Siti ɛn tɔn wɛst go to Mikmɛtath Siti dɔn i fala di Kana Riva te rich di Mɛditarenian Si.

⁷ Di istɛn bɔda bigin na Mikmɛtath Siti ɛn tɔn sawt go Taanat Shaylɔ Siti we de nia di Jɔdan Vali, Janɔa Siti, Atarɔth Siti, Naara Siti go tap na Riva Jɔdan nia Jɛriko.

⁸ Na di Ifrem fambul dɛn land dat we dɛn sheb famili bay famili.

⁹ Na di Manasɛ fambul land, bɔt na di Ifrem fambul Jɔshwa bin gi.

¹⁰ Di Izrɛlayt dɛn nɔ bin drɛb di Kenanayt dɛn we bin de na Gɛza, so dɛn de wit di Ifremayt dɛn as dɛn slev dɛn te di tɛm we dɛn bin de rayt dis buk.