Jɔshwa 14 - Krio Fɔs Oli Baybul

Aw Jɔshwa Sheb Di Land Na Di Wɛst Pat Na Riva Jɔdan

¹ Ɛlieza we na man we de mek sakrifays fɔ pipul sin, Jɔshwa we na Nɔn in pikin ɛn di Papa dɛn na Izrɛl, sheb di land na kenan we de na di wɛst pat na Riva Jɔdan gi di Izrɛlayt dɛn.

² Dɛn bin balɔt fɔ sheb di land gi di nayn fambul ɛn af di Manasɛ fambul we mek nayn ɛn af bikɔs na so PAPA PAPA GƆD bin tɛl Mozis fɔ du.

³ Mozis bin ɔlrɛdi dɔn gi land oba Riva Jɔdan to tu ɛn af fambul, bɔt i nɔ gi di Livay fambul natin pan di land.

⁴ Dɛn bin sheb Josɛf in pipul dɛn to tu fambul we na di Manasɛ fambul ɛn di Ifrem fambul. Dɛn nɔ gi di Livay fambul natin pas siti dɛn fɔ tap ɛn ples fɔ mɛn dɛn animal dɛn ɛn fɔ du smɔl smɔl famin.

⁵ Di Izrɛlayt dɛn du wetin PAPA GƆD tɛl Mozis fɔ du ɛn sheb di land.

Mozis Gi Kelɛb Ɛbrɔn

⁶ Bifo Jɔshwa sheb di land na di wɛst pat na Riva Jɔdan gi di ɔda fambul dɛn, Jɛfunɛ, wan Kɛnizayt in pikin, Kelɛb, ɛn sɔm pipul dɛn na di Juda fambul go mit Jɔshwa na Gilgal usay di Izrɛlayt dɛn bin kamp, ɛn tɛl an se i fɔ mɛmba wetin PAPA GƆD bin tɛl Mozis we na bin Man ɔf PAPA GƆD, bɔt dɛn tu, dat nain Kelɛb ɛn Jɔshwa na Kadɛsh Banɛa.

⁷ Kelɛb tɛl an se in bin ol fɔti ia we di tɛm we dɛn bin de Kadɛsh Banɛa we Mozis bin sɛn an go wach aw Kenan tan, ɛn we in bin go bak to Mozis, i nɔ bin lay gi am bɔt di land.

⁸ I tɛl an se na di ɔda man dɛn we dɛn ɔl bin go bin tɔk tin dɛn we bin mek di pipul dɛn fred; in bin obe PAPA GƆD we nain PAPA GƆD.

⁹ I se Mozis bin prɔmis am da de de se in go gi am ɔl di say dɛn we i bin dɔn waka as in yon prɔpati fɔ in ɛn in pikin dɛn bikɔs in bin biliv PAPA GƆD.

¹⁰ Kelɛb tɛl Jɔshwa se ɔl dat bin apin fɔti fayv ia we dɔn pas ɛn PAPA GƆD mek in de ɛn na we Izrɛl bin de travul na di ɛmti ples we pɔsin nɔ go ebul tap, dat apin, ɛn in dɔn eti fayv ia.

¹¹ I se in stil traŋa lɛk aw in bin traŋa di tɛn we Mozis bin sɛn an fɔ go wach aw Kenan tan; i se in gɛt trɛnk fɔ fɛt wa ɛn fɔ du ɛni ɔda tin.

¹² I se i go gud fɔ lɛ Jɔshwa gian di kɔntri dɛn na di il bikɔs i bin de da de de ɛn bin yɛri we PAPA GƆD bin de tɔk bɔt dɛn se, na jayant dɛn de de we bil ay ay wɔl dɛn rawnd dɛn siti dɛn. Kelɛb se sɔntɛnde, PAPA GƆD go ɛp an drɛb dɛm kɔmɔt de bikɔs na so PAPA GƆD bin se.

¹³ Nain Jɔshwa blɛs Kelɛb we na Jɛfunɛ in pikin ɛn gian di land fɔ in ɛn in pikin dɛn.

¹⁴ Bikɔs Kelɛb bin biliv PAPA GƆD, nain gret gret granpikin dɛn de na Ɛbrɔn te di tɛm we dɛn bin de rayt dis buk.

¹⁵ Bifo datɛnde, dɛn bin de kɔl Ɛbrɔn, Aba Siti we na bin di jayant we dɛn bin rɛspɛkt pas ɔl di ɔda wan dɛn. Frɔm datɛnde, wanwɔd bin de na di land.