Jɔshwa 13 - Krio Fɔs Oli Baybul

Di Balans Land We PAPA GƆD Se Fɔ Kapchɔ

¹ Wande, di tɛn we Jɔshwa bin dɔn ol bad bad wan, PAPA GƆD tɛl an se i dɔn ol bad bad wan bɔt i stil gɛt plɛnti land mɔ we i nɔ kapchɔ yet.

² PAPA GƆD tɛl an se i fɔ kapchɔ ɔl di Filistin dɛn land we gɛt fayv siti we na Gaza, Ashdɔd, Ashkɛlɔn, Gath ɛn Ɛkrɔn

³ ɛn di Gɛshurayt dɛn land we de na di ist pat na Ijipt ɛn di Avim dɛn yon na di sawt. Di ɔda say we PAPA GƆD bin tɛl Jɔshwa fɔ kapchɔ na di land we bigin na Shiɔ watasay na di Ijipshian bɔda te rich Ɛkrɔn siti na di Nɔth.

⁴ So i bin stil gɛt fɔ kapchɔ di Kenanayt dɛn wanol kɔntri, frɔm Mɛara Siti we de Saydɔn, te rich Afɛka Siti na di Amɔrayt bɔda.

⁵ Ɔda say dɛn we GƆD se Jɔshwa gɛt fɔ kapchɔ na bin Gɛbal Siti, di eria na Libanɔn we kɔmɔt Baalgad Siti na Mawnt Amɔn, te rich di rod fɔ go insay Amath,

⁶ ɛn ɔl di pipul dɛn we de frɔm Libanɔn Mawnten te rich Misrɛfɔt-Maim. I se di Sidonian dɛnsɛf i go drɛb fɔseka Izrɛl. I tɛl Jɔshwa igen se i fɔ sheb di land gi di Izrɛlayt dɛn jɛs lɛk aw i bin tɛl an.

⁷ PAPA GƆD tɛl Jɔshwa se i fɔ divayd da patikla land de fɔ nayn fambul ɛn af pan di Manasɛ fambul na Izrɛl.

Aw Jɔshwa Sheb Di Land

⁸ Mozis we na bin PAPA GƆD in wokman bin dɔn gi di Rubɛnayt, di Gadayt ɛn di ɔda af pan di Manasɛ fambul dɛn yon land na di ist pat oba Riva Jɔdan ɛn dɛn bin ɔlrɛdi dɔn tap de.

⁹ Di land we dɛn gɛt kɔmɔt na di ist pat oba Riva Jɔdan te rich Aroa Siti de nia Anɔn Vali. Na dɛn gɛt di siti we de midul di vali, di flat land dɛn frɔm Mɛdɛba te rich Dibɔn,

¹⁰ di siti dɛn we de te rich di Amonayt dɛn bawndri we Kiŋ Sayɔn, da Amɔrayt kiŋ we bin tap na Ɛshbɔn, bin de rul,

¹¹ Gilgal, di say we di Gɛshurayt ɛn di Maakatayt dɛn bin de, di wanol Mawnt Amɔn ɛn frɔm Beshan te rich Salɛka,

¹² ɛn ɔl Kiŋ Og, di las jayant we bin lɛf, we bin de na Ashtarɔt ɛn Ɛdriay we Mozis bin dɔn kɔnka in wanol kindɔm na Beshan.

¹³ Bɔt di Izrɛlayt dɛn nɔ bin drɛb di Gɛshurayt ɛn di Maakatayt dɛn; bifodat dɛn ɔl bin de togɛda te di tɛm we dɛn bin de rayt dis buk.

¹⁴ Mozis nɔ bin gi di Livay fambul land bikɔs PAPA GƆD bin dɔn se na wetin dɛn de gɛt we pipul dɛn mek sakrifays to in PAPA GƆD we na Izrɛl dɛn GƆD, na dɛn yon prɔpati we i gi dɛm.

Di Say Dɛn We PAPA GƆD Gi Di Rubɛnayt Fambul

¹⁵ Mozis gi di Rubɛn fambul dɛn yon land famili bay famili.

¹⁶ Dɛn land kɔmɔt Aroa we de bay Anɔn Vali, te rich di siti we de midul di vali ɛn ɔl di land dɛn we de nia Mɛdɛba,

¹⁷ Ɛshbɔn ɛn ɔl in siti dɛn we de na di flat land ɔp mawnten we na Dibɔn, Bamɔth Baal, Bɛth Baalmɛɔn,

¹⁸ Jaaz Kɛdɛmɔth, Mɛfaath,

¹⁹ Kiriathaim, Sibma, Zɛrɛt Shaa we de na di il we de na di vali.

²⁰ Bɛthpeɔ, di rɔndɔŋ dɛn na Mawnt Pisga ɛn Bɛth Jɛshmɔth.

²¹ Ɔl dat na di siti dɛn we de na di flat grɔn dɛn ɔp di mawnten, ɔl Kiŋ Sayɔn we na bin di Amɔrayt kiŋ we bin de na Ɛshbɔn we Mozis bin kɔnka in ɛn Ɛvi, Rɛkɛm, Zu, Hu ɛn Rɛba, di bigman dɛn na Midian we bin de ɛp an rul.

²² Wan pan di pipul dɛn we di Izrɛlayt dɛn bin kil, na bin di lukgrɔn man we nem Bɛɔ in pikin we nem Balama.

²³ Na Riva Jɔdan na bin di Rubɛnayt dɛn bawndri. Na di siti ɛn vilej dɛn dɛnwandɛnde we Mozis bin sheb gi di Rubɛnayt fambul dɛn, famili bay famili.

Di Say Dɛn We PAPA GƆD Gi Di Gadayt Fambul

²⁴ Mozis bin gi di Gadayt fambul dɛn dɛn yon land famili bay famili.

²⁵ Dɛn wanol land na bin Jeza, ɔl di siti dɛn na Gilyad, af di Amonayt dɛn land te rich Aroa we de na di ist pat na Raba,

²⁶ frɔm Ɛshbɔn to Ramat Mizpɛ ɛn Bɛtinim, frɔm Maanaim to di bɔda na Lodɛba.

²⁷ Di say dɛn na di vali we dɛn gɛt na Bɛth Aman, Bɛthnimra, Sukɔth, Zafɔn ɛn di balans pan kiŋ Sayɔn we bin de Ɛshbɔn in kindɔm. Dɛn bɔda na di wɛst kɔmɔt Riva Jɔdan te rich Lek Galili na di nɔth.

²⁸ Na di siti dɛn ɛn vilej dɛn dɛn wandɛnde we Mozis bin sheb gi di Gadayt fambul, famili bay famili.

Di Say Dɛn We PAPA GƆD Gi Di Istɛn Manasɛ Fambul

²⁹ Mozis gi af pan di Manasɛ fambul dɛn yon land famili bay famili.

³⁰ Dɛn land we kɔmɔt Maanaim Siti, we yu gɛt di wanol Beshan, siksti vilej we Jair bin kapchɔ at wan tɛm. Kiŋ Ɔg na Beshan bin dɔn rul ɔl da eria de.

³¹ Mozis bin gi af pan di Manasɛ dɛn fambul we kɔmɔt to Makaya we na Manasɛ in pikin af pan Gilyad, i gi dɛn Ashtarɔt ɛn Ɛdriay, di siti dɛn Ɔg na Beshan in kindɔm

³² Mozis bin divayd Moab we de na Jɔdan Vali we de na di ist pat na Jɛriko gi di Izrɛlayt dɛn.

³³ Mozis nɔ bin gi di Livay fambul land bikɔs PAPA GƆD bin dɔn se na wetin dɛn de gɛt we pipul dɛn mek sakrifays to in PAPA GƆD we na Izrɛl dɛn PAPA GƆD na dɛn yon prɔpati we i gi dɛn.