Jɔshwa 12 - Krio Fɔs Oli Baybul

Di Kiŋ Dɛn We Mozis Bin Kɔnka

¹ Mozis bin dɔn tinap bifo dɛn fɔ go fɛt tu kiŋ na di ist pat to Riva Jɔdan ɛn kapchɔ ɔl dɛn land dɛn we kɔmɔt frɔm Anɔn Vali ɔp na Riva Jɔdan, te rich Mawnt Amɔn.

² Wan pan di kiŋ dɛn we Mozis bin kɔnka na Kiŋ Sayɔn. Na bin Amɔrayt kiŋ we bin de rul Ɛshbɔn; i bin de rul af ɔf Gilgal, dat na di sawt pat we na bin bitwin Jabɔk Riva Vali na di nɔth ɛn Anɔn Vali na di sawt. Di wanol eria we i bin de rul na bin frɔm Ɛshbɔn te rich Aroa Siti bay di Anɔn Vali na di sawt ist, ɛn frɔm Ɛshbɔn te rich di siti na di Anɔn Vali, afwe bitwin Aroa ɛn di Dɛd Si.

³ Di bawndri na di wɛst na bin di Riva Jɔdan; i kɔmɔt Lek Galili na di nɔth te rich Di Dɛd Si na di sawt. Di ist say to di Dɛd Si te rich Bɛth Jɛsmimɔyh ɛn Mawnt Pisga bin de insay in kindɔm.

⁴ Di Ɔda wan na bin Kiŋ Ɔg we na bin kiŋ na Beshan. Na bin wan pan di las Jayant dɛn we dɛn bin de kɔl Refaim. Na Ɛdriay ɛn Ashtarɔt i bin tap.

⁵ Na di nɔth, in land we i bin de rul go te rich Mawnt Amɔn. Di ist say go te rich Salɛka Siti.

⁶ Na Mozis we na bin PAPA GƆD in wokman ɛn di Izrɛlayt dɛn bin kɔnka dɛn. Mozis bin sheb di land gi di Rubɛnayt, di Gadayt ɛn af pan di Manasɛ fambul dɛn.

⁷ Jɔshwa ɛn di Izrɛlayt dɛn bin kɔnka di kiŋ dɛn frɔm Baalgad na di Libanɔn Vali, te rich Mawnt Alak na di sawt nia Idɔm. Jɔshwa gi ɔl di difrɛn fambul dɛn dɛn shia.

⁸ Di land we Jɔshwa bin gi dɛn na bin di siti dɛn na di il, di wan dɛn na flat grɔn, na di Jɔdan Vali ɛn di ples dɛn we rɔf te go dɔŋ di ɛmti land we pɔsin nɔ go ebul tap na di sawt. Ɔda say dɛn na bin di Itayt, di Amorayt, di kenanayt, di pizayt, di Ivayt ɛn di Jɛbyusayt dɛn land dɛn.

⁹ Di Izrɛlayt dɛn bin kɔnka di kiŋ dɛn na dɛn kɔntri dɛn ya: Jɛriko, Ay we de nia Bɛthɛl,

¹⁰ Jerusɛlɛm, Ɛbrɔn,

¹¹ Jamuth, Lakish,

¹² Ɛglɔn, Gɛza

¹³ Dɛbi, Gɛda

¹⁴ Ɔma Arad

¹⁵ Libna, Adulam,

¹⁶ Makɛda, Bɛthɛl

¹⁷ Tapua, Ɛfa

¹⁸ Apɛk, Lasharɔn,

¹⁹ Madɔn, Ezɔ

²⁰ Shimrɔn Mɛrɔn, Akshap,

²¹ Taanak, Mɛgido,

²² Kɛdɛsh, Joknɛam we de na Kamɛl,

²³ Dɔ we de na di kost, Goim we de Galili,

²⁴ ɛn Tiraz; na bin tati wan kiŋ ɔl ɛn ɔl.