Jɔshwa 11 - Krio Fɔs Oli Baybul

Jɔshwa Bit Kiŋ Jabin ɛn ɔda kiŋ dɛn

¹ We Kiŋ Jabin yɛri bɔt aw Izrɛl dɔn kapchɔ ɔl dɛn ɔda land dɛn na di sawt, i sɛn wantɛm wantɛm to ɔl di kiŋ dɛn na di nɔth se mek dɛn ɔl jɔynan fɔ go fɛt Izrɛl. I sɛn to Kiŋ Jobab na Madɔn, di kiŋ dɛn na Shimrɔn ɛn Akshap,

² di kiŋ dɛn na di il na di nɔt, na di Jɔdan Vali we de na di sawt pat na to Lek Galili, di wan dɛn na di flat grɔn ɛn di wan dɛn we de na di kost nia da kɔntri we nem Dɔ.

³ I sɛn mɛsej to di Kenanayt kiŋ dɛn na di il kɔntri. I sɛn igen to di Ivayt dɛn.

⁴ Dɛn ɔl go wit dɛn sojaman dɛn bɔku bɔku wan; dɛn bin plɛnti lɛkɛ sansan na bich. Dɛn bin gɛt plɛnti plɛnti ɔs ɛn karej dɛn

⁵ Ɔl di kiŋ dɛn mek dɛn kamp na Mɛrɔm Watasay. Dɛn ɔl mek wanwɔd fɔ bot Izrɛl.

⁶ Nain PAPA GƆD tɛl Jɔshwa se mek i nɔ fred natin bikɔs in we na PAPA GƆD go kil dɛn ɔl; bay da sem tɛn de di nɛks de, dɛn ɔl go dɔn day. I tɛl Jɔshwa se we dɛn go dɔn bit dɛn dɔn, dɛn fɔ brok ɔl dɛn ɛnimi dɛn ɔs dɛn fut dɛn ɛn bɔn dɛn karej dɛm.

⁷ Jɔshwa ɛn in sojaman dɛn jɔs bɔs pan dɛn bay Mɛrɛm watasay ɛn fɔdɔm pan dɛn.

⁸ PAPA GƆD mek di Izrɛlayt dɛn kil kil dɛn ɛn rɔnata dɛn go fa fa na di nɔth te rich Misrɛpɔth Maim ɛn Saydɔn. Na di ist say, dɛn rɔnata dɛn te rich Mizpa Vali. Dɛn fɛt te nɔn pan dɛn ɛnimi dɛn nɔ lɛf.

⁹ Jɔshwa du ɔl wetin PAPA GƆD bin tɛl an fɔ du; i brok brok ɔl di ɔs dɛn fut dɛn ɛn bɔn dɛn karej dɛn.

¹⁰ Dɛn tɛn dɛn de, na di kiŋ na wan siti we nem Ezɔ bin bi di edman kiŋ fɔ ɔl dɛn ɔda siti dɛn. So we Jɔshwa ɛn in man dɛn dɔn kapchɔ di ɔda siti dɛn dɔn, dɛn go atak Ezɔ;

¹¹ dɛn kapchɔ di siti, kil di kiŋ ɛn ɔl in pipul dɛn ɛn bɔn di siti. Wan pɔsin sɛf nɔ bin lɛf.

¹² Jɔshwa kapchɔ ɔl dɛn siti dɛn de, kil ɔl di kiŋ dɛn ɛn dɛn pipul dɛn ɛn bɔn sɔm pan dɛn to ashis jɔs lɛkɛ aw Mozis bin tɛl an fɔ du.

¹³ Bɔt Jɔshwa nɔ bin mek dɛn bɔn di siti dɛn we dɛn bin bil pantap usay ɔda ol siti bin de pas Ezɔ nɔmɔ.

¹⁴ Na dɛn siti dɛn de we dɛn nɔ bɔn, di Izrɛlayt dɛn kil ɔl di pipul dɛn we wan nɔ lɛf ɛn tek ɔl dɛn tin dɛn ɛn dɛn animal dɛn.

¹⁵ Jɔs lɛk aw PAPA GƆD bin tɛl Mozis we nain wokman fɔ du, na so insɛf tɛl Jɔshwa, ɛn na so Jɔshwa insɛf du ɔltin di we we PAPA GƆD bin tɛl Mozis we bin tɛl an.

Di Say Dɛn We Jɔshwa Bin Kapchɔ

¹⁶ Jɔshwa ɛn in sojaman dɛn bin kapchɔ ɔl di land. Dat na di siti dɛn we de na di il, di wan dɛn we de dɔŋ di il, Goshɛn ɛn di dray kɔntri we de na di nɔth say to Goshɛn, ɛn di Jɔdan Vali.

¹⁷ Da eria kɔmɔt Mawnt Alak we de na di sawt nia Sɛir te rich Baalgad we de na di Libanɔn Vali bɔtɔm Mawnt Amɔn. Jɔshwa ɛn in sojaman dɛn bin kapchɔ ɔl dɛn land dɛn de ɛn kil ɔl di kiŋ dɛn

¹⁸ ivin do dɛn bin tek dɛn lɔŋ tɛm.

¹⁹ Na waŋren pipul dɛn Izrɛl bin mek pis wit ɛn dat na di Ivayt dɛn we de na Gibɛɔn. Dɛn kɔnka ɔl di ɔda wan dɛm.

²⁰ Na PAPA GƆD bin mek dɛn pipul dɛn de mek bigat so dat di Izrɛlayt dɛn nɔ go sɔri fɔ dɛn ɛn go kil dɛn bikɔs nain bin dɔn tɛl Mozis traŋa wan se fɔ kil ɔl di pipul dɛn na da land de.

²¹ Na datɛnde Jɔshwa dɛn bin kil ɔl dɛn jayant dɛn we dɛn bin de kɔl Anakim we bin de na di siti dɛn we de na di il; dat na frɔm Ɛbrɔn, Dabi, Anab ɛn ɔl di siti dɛn we de na di il dɛn na Juda ɛn Izrɛl. Jɔshwa dɛn kil dɛn ɔl ɛn nyakanyaka dɛn siti dɛn.

²² Dɛn kil ɔl di Anakim dɛn we bin de na di land, pas sɔm we bin de na Gaza, Gath ɛn Asdɔd.

²³ Jɔshwa dɛn kɔnka di wanol land, divayd di difrɛn fambul dɛn ɛn gi dɛn ɔl dɛn yon pat na di land ɛn dɛn ɔl bin de wit kol at.